32. यीशु एक्की मैनू ज़ैस पुड़ भूतेरो सायो थियो ते एक्की बिमार कौन्शी बाझ़ाते।

यीशु ते तैसेरे चेले एपनी किश्ती मां तैस इलाके मां जे। ज़ैड़ी गिरासेनी लोक रहते थिए। तैना तैस इलाके मां पुज़तां किश्ती मरां ओस्से।

तैड़ी अक मैनू थियो ज़ैस पुड़ भूतेरो सायो थियो।

तै मैनू एत्रो तगतबर थियो कि कोई भी तैस कैबू मां न थियो केरि बटतो। बड़े बार लोकेईं तैसेरे हाथ-पाव शांगलेंईं बनधे, पन तै तैन्न ट्लोड़तो थियो।

तै मैनू तैस इलाके मां कबरन मां रहतो थियो। ते रात दिहैड़ी चिन्डां मारतो थियो। तै लिकड़ां न थियो लातो। ते हमेशा अपने-आपे घोड़ेईं सीं ज़खमी केरतो थियो।

तै मैनू देवड़तां यीशु कां अव ते तैस कां ज़ैन्धू केरे भारे बिशी जेव। तैखन यीशुए तैस मैनेरे अन्तर बिशोरे भूते सीं ज़ोवं, “इस मैनू मरां बेइर निस!”

तैन भूत ज़ोरे-ज़ोरे चिन्डां लगु मरने, ते ज़ोवं, “हे यीशु, परम प्रधान परमेशरेरा मट्ठा, तेरू मीं सीं कुन कम? महरबानी केरतां मीं दुख न दे।” तैखन यीशुए भूते पुछ़ू, “तेरू नंव कुने?” तैनी जुवाब दित्तो, “मेरू नंव सेनाए, किजोकि आस बाड़ेम।”

तैन भूतेंई यीशु कां गुज़ारिश की, “महरबानी केरतां असन इस इलाके मरां बेइर न भेज़!” तैड़ी नेड़े पहाड़े पुड़ सुरां केरो अक घान च़राने लगोरो थियो। ते एल्हेरेलेई तैन भेतेईं यीशु कां गुज़ारिश की, महरबानी केरतां असन उन सुरन मां भेज़।” यीशुए ज़ोवं, “ठीके, तैन्न मां गात।”

ते तैना भूतां तैस मैनू मरां निसतां तैन सुरन मां जेआं। तैना सुर दौवड़ते गेइतां ते एक्की छ़ून्डे पुड़रां डैल्ले मां जो छालां मैरतां जे, ते मेरि जे। तैस सुरां केरे घाने मां लगभग 2,000 सूर थिए।

तैड़ी तैना सुरां केरि देखभाल केरनेबाले लोक थिए। ते ज़ैन किछ भेवरू थियुं ज़ैखन तैनेईं लाव त तैना नगरे मां जो नश्शे। यीशुए ज़ैन कियोरू थियुं तैनेईं नगरेरे मैन्न सीं ज़ोवं। तैना नगरेरे मैनू आए ते तैनेईं तै मैनू लाव ज़ैस पुड़ भूतेरो सायो थियो। तै आरामे सीं लिकड़ां लेइतां बिशोरो थियो। ते एक्की आम मैनेरो ज़ेरो बरताव केरि राहोरो थियो।

तैना लोक बड़े डरोरे थिए ते तैनेईं यीशु सीं ज़ोवं, कि इश्शे इलाके मरां च़लो गा। यीशु किश्ती पुड़ च़ड़ो ते तै मैनू ज़ैस पुड़ भूतेरो सायो थियो तैनी यीशु सीं साथी गंनेरी गुज़ारिश की।

पन यीशुए तैस सीं ज़ोवं, “नईं। अवं चाताईं कि तू घरे गेइतां सेभन सीं ज़ो कि परमेशरे तेरे लेई कुन कियोरूए। तैन्न सीं ज़ो कि परमेशरे केन्च़रे तीं पुड़ दिया कियोरी।”

ते एल्हेरेलेई तै मैनू वापस अपने घरे जो च़लो जेव। ते सेभन सीं एल्हेरे बारे मां ज़ोवं ज़ैन यीशुए तैसेरे लेई कियोरू थियुं। तैसेरी कहानी शुन्ने बालो हर कोई हेराने रेइ जेवरो थियो।

यीशु डैलहेरे होरि पासे वापस अव। तैसेरे तैड़ी पुज़नेरे बाद, लोकां केरि अक बड़ी भीड़ तैसेरे असे-पासे खड़ी भोई ते लोक तैस पुड़ बिछ़ड़ते थिए। तैस भीड़ी मां अक कौन्श थी ज़ैस 12 सालन करां खून च़लनेरी बिमारी थी। तैसां अपनो सारो पेइंसो अलाज़ेरे लेई बेदन दितोरो थियो, पन तैसारी बिमारी होरी भी बधोरी थी।

तैसां शुनेरू थियुं कि यीशुए कई बिमार लोक बाझ़ेवरे थिए ते तैसां सोचू, “मीं विश्वासे कि अगर अवं यीशुएरे लिकड़े सिं हुरेली, त अवं बाझ़ोनीं!” ते एल्हेरेलेई तै यीशुएरे पतोरां आई ते तैसेरे लिकड़े सीं हुरी। ते ज़ेरी तै तैस सीं हुरी, तैसारो खून च़लनो बंद भोई जेव।

अकदम यीशु पतो लगो, कि मीं मरां शक्ति निसोरीए ते तैनी पत्रोवं फिरतां पुछू, “मीं सीं कौन हुरो?” चेलेईं जुवाब दित्तो, “इड़ी एत्रे लोकेईं तेरे च़ेवरे पसन भीड़ लेवरीए, ते तीं पुड़ जो बिछ़ड़ने लगोरेन। त तीं किजो पुछ़ू कि मीं सीं कौन हुरो?”

तै कौन्श डरती ते थरकती यीशु कां अई ते अपने ज़ैन्धू केरे भारे बिश्शी। तैखन तैसां तैस सीं ज़ोवं, कि तैसां कुन कियोरूए, ते इन भी कि अवं बेझ़ोरीं। यीशुए तैस सीं ज़ोवं, “तेरे विश्वासे तू बझ़ावरीस हुनी तू सुखे सीं गा।”