31. यीशु मसीह पैनी पड़ च़लते।

पंच़ हज़ार लोकन रोट्टी खुवानेरां बाद, यीशुए अपने चलन किश्ती मां गंनेरे लेई ज़ोवं। तैनी तैन झ़ीलारे होरी पासे गंनेरे लेई ज़ोवं, हालांकि तै एप्पू थोड़े वक्तेरे लेई तैड़ी रुको। चेले च़ले जे ते यीशुए भिड़ारे लोक वापस भेज़े, कि तैना अपने घरे जो गांन। ते एसेरां बाद यीशु प्राथना केरनेरे लेई पहाड़े पुड़ जेव। ते तैड़ी तै अकैलो थियो, ते तैनी राती ठड्डी तगर प्राथना की।

तैस वक्ते चेले किश्ती च़लेई रावरे थिये, पन तैन केरे सामने बड़ो बात च़लोरो थियो। बड़ी रात भोनेरे बावजूद भी तैना झीलारे मझ़ाटे पुज़ोरे थिए।

तैस वक्ते यीशुए प्राथना केरनी ख़त्म की ते अपने चेलन कां जो च़लो। तै किशतारे पासे गंनेरे लेईं पैनी पुड़मेंईं च़लने लगो।

ज़ैखन चेलेईं तै लाव। त तैना डेरी जे किजोकी तैनेंईं सोचोरू थियुं कि एन कोई भूते। यीशु ज़ानतो थियो कि तैना डरोरेन, एल्हेरेलेई तैनी हक़ देइतां ज़ोवं, “डरा न्न, अवंईं!”

तैखन पतरसे यीशु सीं ज़ोवं, “हे प्रभु अगर तू आस त मीं पैनी पुड़ च़ेलतां तीं कां एजनेरो हुक्म दे।” यीशुए पतरसे सीं ज़ोवं, “एई।”

पतरस किश्ती पुड़रां ओसो ते यीशु कां गननेरे लेई पैनी पुड़मेंइ च़लने लगो। पन थोड़े दूर गेइतां, तैनी एपनी एछ़ी यीशु एरे पासेरां फिरेई ते बेड़ी छ़ेलही ते तेज़ हवा महसूस की।

तैखन पतरस डरो ते डुबने लगो। तै चिन्डां मारने लगो, “हे प्रभु, मीं बंच़ा!” यीशुए तैखने हथ अग्रोवं केरतां तै ट्लाव। तैखन तैनी पतरसे सीं ज़ोवं, “तेरो विश्वास बड़ो घटे! एपनी रक्षारे लेई तीं मीं पुड़ भोरोसो की न कियो?”

तैखन यीशु ते पतरस किश्ती मां च़ड़े ते एकदम हवा च़लनी ते छ़ेल्ली बन्द भोई। ते चेलेईं ज़ैन्धू केरे भारे झुकतां मथ्थो टेको। तैनेईं तैसेरी आराधना की ते तैस सीं ज़ोवं, “सच़्च़े तू परमेशरेरू मट्ठू आस।”