30. यीशु मसीह पंच़ हज़ार मैन्न रोट्टी खुवाते।

यीशु मसीहे अपने प्रेरित प्रचार केरने ते लोकन शिक्षा देने लेई बड़े अलग-अलग ड्लव्वन मां भेज़े। ज़ैखन तैना यीशु मसीह कां वापस आए त तैनेईं तैस सीं ज़ोवं, कि तैनेईं कुन कियोरू थियुं। तैखन यीशुए तैना झीलारे होरी पासे तैस सीं साथी एक्की शांत जिगाई आराम केरनेरे लेईं कुजाए। ते तैना किश्ती पुड़ च़ड़े ते झीलरे होरी पासे च़ले जे।

पन तैड़ी बड़े एरे लोक थिए ज़ैनेईं यीशु ते चेले किश्ती मां गांते लेवरे थिए। ते इनां लोक तैन करां अगरी झीलारे होरी पासे गंनेरे लेई कन्ढ़े-कन्ढ़े दौड़े। ते ज़ैखन यीशु ते चेले पुज़े ते लोकां केरि अक बड़ी भीड़ तैन बेलगी राहोरी थी ते तै भीड़ तैन करां पेइली तैड़ी थी।

तैस भीड़ी मां बच्चे ते कौन्शां केरि गिनतरे इलावा 5,000 मड़द थी, ते यीशुए तैन्न पुड़ बड़ो तरस अव यीशुएरे लेई तैना लोक बगैर पुहालेरी भैडां केरे ज़ेरे थिए। ते एल्हेरेलेई तैनी तैन शिक्षा दित्ती ते तैन्न मां ज़ैनां लोक बिमार थिए तैना बझ़ाए।

ते ड्लवाझ़रे वक्ते, चेलेईं यीशु सीं ज़ोवं, “हुनी ठढ़ भेवरीए ते आसे-आसे कोई ड्लवां भी नईं। इना लोकन गंने दे ताकि गेइतां अपने रोट्टारो इतज़ाम केरन।

पन यीशु चेलन सीं ज़ोवं, “तुस एन किछ खाने जो देथ!” तैनेईं जुवाब दित्तो, अस एन केंन्च़रे केरी सखतम? असन कां सिर्फ पच़ रोट्टी ते दुई मेछ़ली आन।”

यीशुए अपने चेलन सीं ज़ोवं भीड़ारे लोकन पंज़ा-पंज़ा केरतां बारां सीं बिशनेरे लेई ज़ोथ।

तैखन यीशुए पंच़ रोट्टी ते दूई मेछ़ली ट्लेइतां सुर्गेरे पासे तक्कू, ते तैन्न रोट्टी ते मेछ़ली केरे लेई परमेशरेरू शुक्र कियूं।

फिरी यीशुए रोट्टी ते मेछ़ली ट्लोड़तां टुकड़े किये। ते तैनी लोकन देनेरे लेंई अपने चेलन तैना टुकड़े दित्ते। चेलेईं तैना लोकन बन्टे ते मुकने न लगे! ते तैना सब लोक खैइतां रज़्ज़े।

तैसेरां बाद, चेलेई तैना टुकड़े अकोठे किये ज़ैना खानेबालन करां बंच़ोरे थिए ते तैन सीं 12 टोकरी भेरोइ! एना सैरी पंच़ रोट्टन ते दुई मेछ़लन करां एवरी थी।