29. बेरहम नौकरेरी कहानी।

एक्की दिहाड़े पतरसे यीशु पुछ़ू, “हे प्रभु, मीं अपने ढ्लाए केत्रे बार माफ़ कियोरू लोड़े, अगर तै मेरे खिलाफ पाप केरे? कुन सत बार? यीशुए ज़ोवं, सत बार नईं, पन सत्तां केरे सत्तर बार!” एसेरे ज़िरिहे, यीशुएरो मतलबे कि असेईं हमेशा माफ़ केयोरू लोड़े। तैखन यीशु मसीहे ई कहानी ज़ोइ।

यीशुए ज़ोवं, “परमेशरेरू राज़ एक्की राज़ेरू ज़ेरूए ज़ै अपने नौकरन करां हिसाब नेनो चातो थियो। तैसेरो अक नौकर 2,00,000 सालां केरे बराबर मज़दूरारे लेई कर्ज़दार थियो।”

पन तैनी नौकरे अपनो करज़ो चुकेई न बटो, एल्हेरेलेई राज़े ज़ोवं, “एस मैनू कर्ज़ो चुकानेरे लेई एस ते ऐसेरे टबरे गुलाम भोनेरे लेई बेच़ा।”

तैनी नौकरे राज़ेरे सामने अपने ज़ैन्धू केरे भारे बिशतां जोवं, ‘महरबानी केरा ते हेजू बलग, ते अवं अपनो कर्ज़ेरी पुरी रकम चुकालो। ते राज़े तैस नौकरे पुड़ दया की, ते एल्हेरेलेई तैनी तैसेरो सारो कर्जो माफ़ कियो ते तै गांने दित्तो।

पन ज़ैखन तै नौकर राज़े करां बेइर जेव, त तैस तैसेरो अक साथी नौकर मैलो ज़ै तैसेरे च़ेवर महीना केरि मज़दूरारो कर्ज़दार थियो। तैनी नौकरे अपनो साथी दास ट्लाव ते ज़ोवं, ‘ज़ै तीं पुड़ मेरो कर्जोए तै दे!’

तैनी सैथी नौकरे ज़ैन्धू केरे बिश्तां ज़ोवं, ‘महरबानी केरतां मीं होरो थोड़ो वक्त दे, ते अवं अपने कर्ज़ेरी पुरी रकम चुकालो। पन इसेरे बाजए, तैनी नौकरे अपने सैथी नौकर कैदखाने मां छ़डाव, ज़ां तगर कि तै तैसेरो कर्ज़ो न चुकाए।’

ज़ैन किछ भोवरू थियुं तैन होरी किछ दासेईं लाव ते तैना बड़े परेशान भोए। तैना राज़े कां जे ते तैनेईं सब किछ ज़ोवं।

राज़े तै नौकर कुजेइतां ज़ोवं, ‘हे दुष्ट नौकरा! मीं तेरो कर्ज़ो एल्हेरेलेई माफ़ कियोरो थियो, किजोकी तीं मीं कां मिनत कियोरी थी। ते तीं भी तैन्ने कियोरू लोड़तू थियुं। राज़ो एत्रो सेरकोरो थियो कि तैनी तै दुष्ट नौकर कैदखाने मां छ़डाव ज़ां तगर कि तै अपनो सारो कर्ज़ो न चुकाए।’

तैखन यीशुए ज़ोवं, “मेरो बाजी ज़ै सुर्गे मं माजूदे तुस्न मरां हर एक्की सीं एन्ने केरेलो अगर तुस अपने ढ्लाए दिले सीं माफ़ न केरेले।”