2. पाप दुनियाई मां एइते।

आदम ते तैसेरी कौन्श परमेशरेरे बनेवरे खूबसूरत बागी मां बड़े खुश रहते थिये। तैन दुइयन मरां कोन्चे लिगड़ां न थियां लेवरां, पन दुनियाई मां कोई पाप न थियो, एल्हेरेलेई तैना दुइये ज़ना शरमाते न थियां, तैना रोज़ बागी मां च़लतां थियां। ते परमेशरे सीं गल्लां केरतां थियां।

पन बागी मां अक च़लाक सप थियो। तैने कौन्शी पुच़्छ़ू, “कुन परमेशरे सच़्च़े इन ज़ोवरूए कि बागरे कोन्ची भी बुटेरो फल नईं खानो?”

कौन्शां जवाब दित्तो, “परमेशरे असन सीं ज़ोवरूए कि भले ते बुरेरे ज्ञानेरे बुट्टेरे फलेरे अलावा अस कोन्ची भी बुटेरे फले खेइ सकतम। परमेशरे ज़ोवं, ‘अगर तुस तै फल खाथ या इड़ी तगर कि तैस सीं हुरथ भी, त तुस मेरि गाले।’”

सप्पे कौन्शी जवाब दित्तो, “ऐन सच़ नईं! तुस न मरेले। परमेशर इन ज़ानते कि ज़ैखन तुस तैस फले खाले, त तुस परमेशरेरे ज़ेरे भोई गाले ते ज़ेन्च़रे भले ते बुरे तै समझ़ते तुस भी सेमझ़ी सकेले।”

कौन्शां हेरू कि फल खूबसूरते ते हेरने मां सुवादेबालोए। तै अक्लमन्द भी बन्नी चाती थी, एल्हेरेलेई तैसां फल नेइतां खाव। फिरी तैसां किछ अपने मुन्शे भी दित्तो, ज़ै तैस सीं साथी थियो, ते तैने भी खाव।

अचानक, तैन केरि एछ़्छ़ी खुल्ली जेइ, ते तैन पतो लग्गो कि तैना नग्गे आन। ते तैनेईं अपनो आप ढकनेरे लेई पट्लां केरे लिगड़ां बनानेरी कोशिश की।

फिरी आदम ते तैसेरी कौन्शां बागी मरां परमेशरेरी च़लनेरी आवाज़ शुनी। तैना दुइये परमेशरे करां छ़ेप्पी जेआं। तैखन परमेशरे आदमे जो हक दित्ती, “तू कोड़ि अस?” आदमे जुवाब दित्तो, “मीं तू बागी मां च़लते शुने, ते अवं डेरि जेवरो थियो, किजोकि अवं नग्गो थियो। एल्हेरेलेई अवं छ़ेप्पी जेव।”

तैखन परमेशरे पुच़्छ़ू, “केने ज़ोवं कि तू नग्गो आस? ज़ैस बुट्टेरो फल मीं तीं खानेरे लेइ ठाकोरो थियो, कुन तीं तैसेरो फल खेवरोए?” आदमे जवाब दित्तो, “तीं ई कौन्श मीं दित्ती, ते तैसां तै फल मीं दित्तो।” तैखन परमेशरे कौन्शी पुच़्छ़ू, “तीं इन कुन कियूं?” कौन्शां ज़ोवं, “सप्पे मीं धोखो दित्तो।”

परमेशरे सप्पे सीं ज़ोवं, “तू लानती आस।” तू पेटेरे भारे च़लेलो, ते ज़िन्दगी भर मित्ती च़टतो रालो। तू ते कने कौन्श एक्की होरि सीं नफरत केरेले, ते तेरी औलाद ते तैसारी औलाद भी एक्की होरि सीं नफरत केरेली। कौन्शरू वंश तेरे क्रोड़ी ड्लेन्च़ेलू, ते तू तैसेरी थूड़ी पुड़ टक देलो।

फिरी परमेशरे कौन्शी सीं ज़ोवं, “अवं तेरे गल्हे बिशनेरी तकलीफ बड़ी बधेइलो। तेरी खुवैइश तेरे मुन्शेऱे पासे भोली, ते तै तीं पुड़ राज़ केरेलो।”

परमेशरे मड़दे सीं ज़ोवं, “तीं अपने कौन्शरी गल मन्नी ते मेरो हुक्म न मन्नो। हुनी ज़मीन तेरे वजाई सीं लानतीए, ते तीं तैसेरी फसल खानेरे लेई बड़ी महनत केरनी भोली। फिरी तू मेरि गालो, ते तुश्शो शरीर वापस मित्ती मां मिली गालो। आदमे अपने कौन्शरू नंव हव्वा रख्खू, ज़ैसेरो मतलब सेभी केरि अम्मा, किजोकि तै सेभी इन्सानां केरि अम्मा भोली। ते परमेशरे जानबरेरी खैड़ी सीं आदम ते हव्वा ढक्की।

तैखन परमेशरे जोवं, “मैनू भलू ते बुरू ज़ान्नेरे वजाई सीं इश्शो ज़ेरो भोवरोए ते हुनी तैस ज़िन्दगरे बुट्टे मरां फल खानेरे अज़ाज़त न दित्ती गाए। ते परमेशरे खूबसूरत बागी मरां आदम ते हव्वा बेइरोवं कढां। परमेशरे ज़िन्दगरे बुट्टेरो फल खानेरे करां रोकनेरे लेइ शक्तिशाली स्वर्गदूत रख्खे।