26. यीशु मसीह अपनी सेवा शुरू केरते।

अज़मेशी मां शैतानेरे गल्लां केरो इन्कार केरनेरे बाद, यीशु वापस गलील इलाके मां अव, ई तैए जगाए ज़ैड़ी तै रातो थियो। पवित्र आत्मा तैस बड़ी शक्ती देइ रहोरो थियो, ते यीशु एक्की जगरां होरि जगाई जेव ते लोकन शिक्षा दित्ती। ते सेभेईं तैसेरे बारे मां रोड़ी गल्लां ज़ोई।

यीशु नासरत नगरे मां जेव। एन तैन ड्लावें ज़ैड़ी यीशुएरू बचपन गुज़रोरो थियूं। आरामेरे दिहैड़ी मां तै परमेशरेरे भवने मां जेव, ते तैठेरे सेवकेई तैस यशायाह नेबेरी किताब दित्ती। तैना चाते थिए कि तै तैस मरां पड़े। ते यीशुए किताब खोलतां तैस मरां अक हिस्सो लोकां केरे लेई पढ़ो।

यीशुए इन पड़ू, “परमेशरे मीं पुड़ अपनो आत्मा दित्तो, ताकि अवं कंगालन खुशखबरी शुनेईं। तैनी अवं एल्हेरेलेईं भेज़ोरोईं कि कैदन आज़ाद केरि, ते तैन छुटकरो देई ज़ैन होरे लोक ढ्लेन्ची रवरेन। ई तै वक्ते ज़ैखन परमशर असन पुड़ महरबान भोलो ते इश्शी मदत केरेलो।”

फिरि यीशु बिश्शो। सब लोक बड़े ध्याने सीं तैसेरे पासे तकने लगोरे थिए। तैना ज़ानते थिए कि पवित्रशास्त्रेरो ज़ै हिस्सो तैनी हुना पड़ोरो थियो, तै मासीहेरे बारे मां थियो। यीशुए ज़ोवं, “ज़ैना गल्लां मीं तश्शे लेईं हुना पेड़ी, तैन हुना भोई रावरेन।” सब लोक हेरान थिए। तैनेईं ज़ोवं, “कुन एन युसफेरू मट्ठू नईं?”

तैखन यीशुए ज़ोवं, “इन सच़्च़े कि लोक कोन्ची एरे नबी कुबूल न केरन ज़ै तैनकेरे नगरे मां पलोरो बेडोरो भोए। एलिय्याह नेबेरे वक्ते मां, इस्राएले मां बेड़ी विधवा कौन्शां थी। पन ज़ैखन साड़े ट्लाई साल झ़ाड़ी न भोई त परमेशरे एलिय्याह इस्राएले मां कोन्ची विधवा कौन्शरी मदत केरने न भेज़ो। इसेरे बजाए, तैनी एलिय्याह कोन्ची होरि मुलखेरे विधवा कौन्शी कां भेज़ो।”

यीशुए ज़ोनू ज़ारी रख्खू, ते एलीशा नेबेरे वक्ते मां, इस्राएलेरे बड़े लोकन कोड़ थियूं। पन एलीशाहे तैन मरां कोई भी बझ़ाव। तैनी सिर्फ इस्राएलेरे दुशमन सेनारो परधान नमान बझ़ाव।” पन ज़ैना लोक यीशुएरी गल्लां शुन्ने लगोरे थिए तैना यहूदी थिए। ते एल्हेरेलेई ज़ैखन तैनेईं तैस करां इन ज़ोनू शुनू त तैना तैस पुड़ सेरकोए।

नासरेतेरे लोकेईं यीशु ट्लाव ते तै प्राथना घरे मां निसतां बेइर अव। तैनेईं तै मारनेरे लेई पहाड़े पुड़ नियो, कि तैस तैठां बछ़ोड़न। पन यीशु लोकां केरे भीड़ी मरां निसतां जेव ते नासरत नगर छ़ेडतां च़लो जेव।

फिरि यीशु ग्लीलेरे सैरी इलाके मां जेव, ते बड़े लोक तैस कां आए। तैनेईं एरे बड़े लोक तैस कां आने ज़ैना बिमार ते काने, टोंन्ते, लैट्टे ते टव्वने थिए। ते यीशुए तैना बझ़ाए।

इसेरे इलावा, बड़े एरे लोक यीशु अक आए ज़ैन मां दुष्टात्मां थीं। यीशुए दुष्टात्मां तैन मरां नीस्नेरो हुक्म दितो। तैना दुष्टात्मा हमेशा चीन्डां मैरती थी, ते इन ज़ोती थी “तू परमेशरेरू मट्ठू आस। इन लेइतां लोक हेरान थिए, ते तैनेईं परमेशरेरी तारीफ की।

फिरि यीशु 12 मैनू च़ुने ज़ैन जो तैनी प्रेरित ज़ोवं। तैना प्रेरितेईं तैस सीं साथी कई सफ़र किये ते तैस करां शिक्षा हासिल की।