27. दया केरनेबालो अक सामरी।

एक्की दिहाड़े, यहूदी पवित्र कितबरो अक ज्ञानी मैनू यीशु कां अव। तै सेभन इन हिरानू चातो थियो, कि यीशु गलत तरीके सीं शिक्षा देइ रहोरो थियो। ते एल्हेरेलेई तैनी ज़ोवं, “हे गुरु जी, हमेशारी जिन्दगी हासिल केरनेरे लेईं अवं कुन केरी?” यीशुए जुवाब दित्तो, “परमेशरेरे किताबी मां कुन लिखोरूए?”

तैनी मैने ज़ोवं, “परमेशरेरी किताब ज़ोचे कि परमेशरे सीं अपने सारे मने, अपने सारे प्राण, शेक्ती, ते अक्ली सीं प्यार रख्ख। ते अपने पड़ोसी सीं अपने जानारो ज़ेरो प्यार रख।” यीशुए जुवाब दित्तो, “तू बिलकुल सही आस! अगर तू एन्च़रे केरस, त तीं हमेशारी ज़िन्दगी हासिल भोली।”

पन तै ज्ञानी मैनू लोकन हिरानू चातो थियो कि तैसेरो ज़िन्दगी ज़ीनेरो तरीको सही थियो। एल्हेरेलेई तैनी यीशु पुछ़ू, “ठीके, त फिरी मेरो पड़ोसी कौने?”

यीशुए तैस ज्ञैनी मैनू अक कहानी शुनेइतां जुवाब दित्तो।” अक यहूदी थियो तै यरूशलेमेरां यरीहो जो च़लोरो थियो।”

“पन किछ डैकेईं तै लव ते तैस पुड़ हमलो कियो। तैनेईं तैसेरू सब किछ निवं ते तैस एत्री मार दित्ती। ते फिरि तैना च़ले जे।”

“तैन केरे बाद, अक याजक तैस बत्तां निस्सो। तैनी याजके तै मैनू सड़की मां पेवरो लाव ते ड्खमेईं निसतां जेव, तैनी तै मैनू पूरे तरीके सीं नज़र अंदाज़ कियो।”

किछ वक्त बीतनेरां बाद, अक लेवी तैस बत्तां अव। (लेवी यहूदी केरू अक गोट्ल थियूं ज़ैन केरू कम परमेशरेरे भवने मां याजकां केरि मद्दत केरनी थी।) तै भी ड्खमेईं निस्तां तै मैनू नज़रानदाज़ कियो।

“ते होरो मैनू तैस बत्तां अव तै सामरी मैनू थियो। (सामरी ते यहूदी एक्की-होरी सीं नफ़रत केरते थिए।) तैनी सैमरी मैने तै मैनू बत्ती मां पेवरो लाव। तैनी हेरू कि तै मैनू यहूदी थियो। पन फिर भी तैनी तैस पुड़ दया की। ते तै तैस कां जेव तैसेरे ज़खमन पुड़ पट्टी बंधी।”

फिरी तैनी सैमरे तै मैनू अपने गधे पुड़ च़ैढ़तां नियो ते धर्मशाली मां पुज़ाव। ज़ैड़ी तैसेरी देखभाल की गाए।

होरसां तैनी सामरी मैने अपने सफर जारी रख्खू। ते तैनी तैस धर्मशालरे मालिके किछ पेंइसे दित्ते, ते तैस सीं ज़ोवं, “इस मैनेरी देखभाल भाल केरा। ते अगर इनां पेइंसे केरे इलावा तेरो किछ पेइंसो लगेलो त वापस एइतां अवं तीं देलो।”

ते फिरी यीशुए तैस ज्ञैनी पुछ़ू, “तू कुन सोचतस? इना ट्लेइयने मरां कौन तैस मैनेरो पड़ोसी भोव ज़ै लुटरो ते मारोरो पीटोरो थियो?” तैनी जुवाब दित्तो, “तैए ज़ैनी तैस पुड़ महरबानी कियोरी थी।” यीशुए तैस सीं ज़ोवं, “तू भी गेइतां एन्च़रे केर।”