25. शैतान यीशु मसीहेरी अज़माइश केरते।

यीशु एरे बपतिसमेरे बाद, एकदम पवित्र अतमा तै जंगले मां नियो। यीशु तैड़ी 40 दिहाड़े ते 40 रात राव। तैस वक्ते तैनी बरत रख्खू, ते शैताने यीशु कां एइतां पाप करानेरे लेई तैसेरी अज़माइश की।

पेइलू, शैताने यीशु सीं ज़ोवं, “अगर तू परमेशरेरू मट्ठू आस त इनां घोड़न रोटी बना ताकि तू खाई सखस!”

पन यीशए शैताने सीं ज़ोवं कि, “परमेशरेरे वचने मां इन लिखोरूए, मैनू ज़ींते रानेरे लेई सिर्फ रोट्टरी ज़रूरत न भोए, पन हर तैस गल्लरी ज़रूरत भोचे ज़ै परमेशर तैन सीं ज़ोते!”

तैखन शैताने यीशु भवनेरे सेभनां उच्चे जिगाई पुड़ नीयो। ते ज़ोवं, “अगर तू परमेशरेरू मट्ठू आस त इठां उन्ढे बिछड़, किजोकि लिखोरूए, ‘कि परमेशर तीं ट्लानेरे लेई अपने स्वर्गदूतन हुक्म देलो, कि तेरे पव्वन ठोकर न लगे।”

पन यीशुए तैन न कियूं ज़ैन शैताने तैस केरनेरे लेई ज़ेवरू थियूं। इसेरे बजाए, तैनी ज़ोवं, “परमेशर हर केंन्ची सीं ज़ोते, “तू प्रभु अपने परमेशरेरी अज़मेश न केरां।”

फिरी शैताने तैस दुनियारां सारां राज़ां हिरां। तैनी तैस हिरावं तैना राज़ां केत्रां शक्तीशाली थियां, ते तैन मां दुनीयारे सेभी सुखेरी चीजां थी। तैनी यीशु सीं ज़ोवं, “अवं इन सब तीं देलो अगर तू ज़ैन्धू केरे भारे बिश्तां मीं कां मथ्थो टेकस।”

यीशुए जुवाब दितो, “हे शैतान, मीं करां दूर च़लो गा! परमेशरेरे वचने मां तै हुक्म देते, ‘सिर्फ अपने प्रभु परमेशरेरी आराधना केरा। सिर्फ तैसेरी आदर केरा।’”

यीशुए शैतानेरे अज़मेशी करां हार न मन्नी, ते एल्हेरेलेई शैतान तैस करां च़लो जेव। तैखन स्वर्गदूत एइतां तैसेरी सेवा केरने लगे।