24. यूहन्ना यीशु बपतिस्मा देते।

एलीशिबा ते जकर्याहेरू मट्ठू यूहन्ना, बड्डू भोइतां अक नबी बनो। तै जंगल मां रहतो थियो, ते जंगली माछ़ी ते टिट्टां खातो थियो, ते ऊंटेरे बालन सीं बनोरे लिकड़ां लातो थियो।

बड़े लोक यूहन्नरी गल्लां शुन्ने जंगले मां आए। ते तैनी इन ज़ोइतां तैन ई प्रचार कियो, “तोबा केरा किजोकि सुर्गेरू राज़ नेड़े पुज़ोरूए!”

ज़ैखन लोकेईं यूहन्नारो परचार शुनो, त तैन मरां बड़े लोकेईं अपने पापां केरे लेई पश्चाताप कियो, ते यूहन्ने तैन बपतिसमो दित्तो। यूहन्ना हेरनेरे लेई बड़े धार्मेरे अगुवाहे भी आए, पन तैनेईं अपने पापां केरो पश्चाताप न कियो ।

यूहन्ना धार्मिक अगुवन स ज़ोवं, “हे ज़ेहरले सपव! पश्चाताप केरा ते अपनो बरताव बदला। परमेशर हर तैस बुट्टे काटेलो ज़ै रोड़ो फल न दे। ते तै तैन आगी मां छ़ाडेलो।” ज़ैन नेबेईं ज़ेवरू थियूं, यूहन्ने तैन पूरू कियूं, “हेर, जल्दी अवं तीं का अख बिस्तार देनेबालो भेज़तई ज़ै तेरे लेई बत तियार केरेलो।

किछ धार्मिक अगुवेईं यूहन्ना पूछ़ू कि कुन तू मसीह आस। यूहन्ने जूवाब दितो, “अवं नई, पन तै मेरे बाद एज्जी राहोरोए। तैए तै इत्रो महाने कि अवं तैसेरे बुटेरे तासमे खोल्नेरे भी कबल नईं।

होरसां यीशु बपतिसमो नेनेरे लेईं यूहन्ना कां अव। ज़ैखन यूहन्ना तै लव, त तैनी ज़ोवं,“हेरा! परमेशरेरू गबड़ू ज़ैन दुनियारे पापन एप्पु पुड़ नेते।”

यूहन्ना यीशु सीं ज़ोवं, “अवं तीं बपतिसमो देनेरे काबल नईं। बजाए इल्हेरे कि ज़रूरी कि तू मीं बपतिसमो दे।” पन यीशुए ज़ोवं, “तीं मीं बपतिस्मो दित्तोरो लोड़े, किजोकी इन सही कम्मे।” ते यूहन्ने यीशु बपतिसमो दित्तो, हलाकि यीशुए कधी पाप न थियो कियोरो।

बपतिसमो दित्तो गंनेरां बाद ज़ैखन यीशु पैनी मरां बेइर अव त परमेशरेरो आत्मा कबूतरेरी शकली मां बांदो भोव, ते तैस पुड़ बिश्शो। तैसे वक्ते, परमेशरे स्वर्गे मरां गल की। तैनी ज़ोवं, “तू मेरू मट्ठूस। ते अवं तीं पुड़ बड़ो खुशाईं।”

परमेशरे यूहन्ना सीं ज़ोवरू थियूं, “ज़ैस तू पुड़ पवित्र आत्मा एइतो लालो, तैन्ने परमेशरेरू मट्ठूए। यूहन्ने यीशु बपतिस्मा दित्तो, ते तैनी बाजी परमेशर गल्लां केरतो शुनो।