23. यीशु मसीहेरू ज़र्म।

युसफ नंव्वेरे एक्की धर्मी मैनू सीं मरियमरी कुड़मई भेवरी थी। ते ज़ैखन तैनी शुनू कि मरियम दोज़ींती त तै ज़ानतो थियो, कि तै तैसेरो बच्चो नई। पन, तै मरियामी बदनाम केरनी न थियो चातो थियो, एल्हेरेलेई तैनी तैस पुड़ महरबानी केरनी ते तैस सीं ड्ला न बनाने न चाव। पन इस करां पेइले की तै एन केरेथो, एक्की स्वर्गदूते सुपने मां एइतां तैस सीं गल की।

तैनी स्वर्गदूते ज़ोवं, “हे युसफ, मरियमी अपनी लाड़ी बनाने करां न डर। तैसारे पेटे मां ज़ै बच्चोए तै पवित्र आत्मारे तरफांए। तै अक मट्ठू ज़ाली। ते तू तैसेरू नवं यीशु रेख्खां ज़ैसेरो मतलबे, यहोवा बंच़ाते, किजोकि तै लोकन तैनकेरे पापन करां बंच़ालो।”

युसफे मरियामी सीं ड्ला बनाव ते तै अपनी लाड़ी बनेइतां अपने घरे आनी, पन तैस बच्चे ज़र्म देने तगर तै तैस सीं साथी न झ़ुल्लो।

ज़ैखन मरियामी बच्चो ज़ानेरो वक्त नेड़े थियो, त युसफे ते तैसां बैतलहम नगरे जो गंनेरू लम्मू सफ़र कियूं। तैनेई तैड़ी गानू थियूं, किजोकि रोमी अधिकारी इस्राएले मां राने बाले सेभी लोकां केरि गिनती केरनी चाते थिए, कि सब लोक तैड़ी गान ज़ैड़ी तैन केरे बुज़ुर्ग रहते थिए। दाऊद राज़ेरू ज़र्म बैतलहमे मां भेवरू थियुं, ते तै मरियम ते युसफ दूइयां केरो पूर्वज थियो।

मरियाम ते युसफ बैतलहमे जेआं, पन तैड़ी जानबारां केरे रखनेरे अलावा होरि कोई जगा न थी मैलोरी। मरियामां तैड़ी बच्चे ज़र्म दित्तू। तैसां तै बच्चो खुलरी मां रख्खो, किजोकी तैड़ी तैसेरे लेई कोई बिस्तरो न थियो। ते तैनेईं तैसेरू नवं यीशु रख्खू।

तैस राती, तैड़ी नेड़े उडरान मां किछ पुहाल अपनां गबां केरो पेरो केरी रहोरो थिए। अचानक, एक्की स्वर्गदूते ज़ोवं, “डरा न्न, किजोकि मीं कां तुश्शे लेई खुशखबरी। बैतलहमां मसीह, प्रभु एरू ज़र्म भेवरूए।

गेइतां तै बच्चे तोपा, ते तुसन तै लीकड़े मां पलैटोरो ते खुरली मां मैलेलो।” अचानक, अम्बार स्वर्गदूतन सीं भेरोवं। ते तैना परमेशरेरी महिमा केरने लगोरे थिए। तैनेईं ज़ोवं, “सारी महिमा स्वर्गे मां रानेबाले परमेशरे मैले। ते धेरती पुड़ तैन लोकन शांती भोए ज़ैन केरि परमेशर फिक्र केरते।

तैखन स्वर्गदूत च़ले जे। तैना पुहाल भी अपनां गब्बां छ़ेडतां तैस बच्चे हेरने जे। ते जल्दी तैना तैस जिगाई पुज़े, ज़ैड़ी यीशु मसीह थियो, ते तैनेईं तै खुरली मां लव, ज़ेन्च़रे स्वर्गदूते ज़ोवरू थियूं। तैना बड़े खुश थिए। ते फिरी तैना पुहल वापस जे ज़ैड़ी तैन केरि भैड्डां थी। तैनेईं ज़ैन किछ भी शुनू ते लावं तैसेरे लेईं तैना परमेशरेरी महिमा केरने लगोरे थिए।

पूर्बे मुल्ख मां किछ जोष्टी थिये। तैनेईं तारां केरि पड़हाई कियोरी थी। ते तैना बड़े बुद्धिमान थिए। तैनेईं अक खास तारो अम्बरे मां लव। तैनेई ज़ोवं, कि एल्हेरो मतलबे कि यहूदी लोकां केरे एक्की राज़ेरू ज़र्म भोवरूए। ते एल्हेरेलेई तैनेईं तैस बच्चे हेरनेरे लेई अपने मुल्खे मरां सफ़र केरनेरो फ़सलो कियो। एक्की लम्मे सफरेरां बाद, तैना बैतलहम नगरे मां आए ते तैन, तैन घर मैलू ज़ैड़ी यीशु ते तैसेरे अमां बाजी रूकोरे थिए।

ज़ैखन एन मैनेई यीशु अपने अम्मा ते बाजी सीं साथी लावं त तैनेई ज़ैन्धू केरे भारे झुकतां तैसेरी आराधना की। तैनेई यीशु कीमती चीज़ां दित्ती। ते फिरी तैना घेरजो वापस जे।