22. यूहन्नारू ज़र्म।

असलीती मां, परमेशरे अपने नेबन सीं गलां कियोरी थी। एल्हेरेलेई तैनेईं लोकन सीं गलां केरी बेटोरी थी, पन तैस वक्ते करां फिरि 400 साल बीतने परमेशरे तैन सीं गल न की। तैखन परमेशरे जकर्याह नंव्वेरे एक्की नेबी कां अपनो स्वर्गदूत भेज़ो। जकर्याह ते तैसेरी लाडी एलीशिबा परमेशरेरी आदर केरतां थियां, तैना बड़ां बूढां भेवरां थियां, ते तैन कोई बच्चो न थियो भोवरो।

तैनी स्वर्गदूते जकर्याह सीं ज़ोवं, “तेरे लैड़ी अक बच्चो भोलो। तू तैसेरू नवं यूहन्ना रेख्खां। परमेशर तैस पवित्र आत्मा सीं भरेलो, ते यूहन्ना लोकन मसीह कबूल केरनेरे लेई तियार केरेलो।” जकर्याहे जूवाब दित्तो, “अवं ते मेरी लाड़ी बच्चो पैदा केरनेररे लेई बुढम! अवं केन्च़रे मेन्नी कि तू सच़ लगोरोस ज़ोने?”

तैनी स्वर्गदूते जकर्याहे जुवाब दित्तो, “तीं कां खुशरी खबर भेज़नेरे लेई अवं परमेशरे भेज़ोरोईं। किजोकि तीं मेरो विश्वास न कियो, एल्हेरेलेई बच्चेरे ज़र्म घिन्न्ने तगर तू गल न केरि बाटेलो।” ते तैखने जकर्याह गल्लां न लगो केरि बटने। तैखने तै स्वर्गदूत तैस करां च़लो जेव। ते एसेरे बाद, जकर्याह घरे वापस अव ते तैसेरी लाड़ी दोज़ींती भोई।

ज़ैखन एलीशिबा दोज़ींती भोवेरे 6 महीने भोवरे थिए, त तै स्वर्गदूत अचानक एलीशबरी रिश्तेदारी पुड़ बंदो भोव ज़ैसारू नवं मरियम थियूं। मरियम कुँआरी थी, ते यूसुफ नंव्वेरी एक्की मैनू तैसरी कुड़माई भेवरी थी। स्वर्गदूते ज़ोवं, “तू दोज़ींती भोनीस ते तीं अक बच्चो भोलू। ते तैसेरू नवं यीशु रखनू। तैन सर्व-शक्तिमान परमेशरेरू मट्ठू भोलू ते हमेशारे लेईं राज़ केरेलू।”

मरियमां जुवाब दित्तो, “कि एन केन्च़रे भोलू, किजोकि अवं त कुँआरी?” तैनी स्वर्गदूते तैस समझ़वं, “पवित्र आत्मा तीं पुड़ एजेलो, ते परमेशरेरी शक्ति तीं पुड़ सायो केरेली। एल्हेरेलेई तै बच्चो पवित्र भोलो, ते तै बच्चो परमेशरेरू मट्ठू भोलू।” ते ज़ैन स्वर्गदूते ज़ोवं मरियमां तैस पुड़ विश्वास कियो।

एन भोनेरां बाद, मरियम गेइतां एलीशिबा सीं मिली। ते ज़ेरू मरियमां तैस जो नमसकार कियूं, त एलीशिबरू मट्ठू तैसरे पेटे मां उछ़ड़ू। तैनकेरे लेई परमेशरे ज़ैन किययोरू थियूं तैसेरे वजाई सीं तैना दुइए खुश भोई। ते एलीशिबा सीं साथी ट्लाई महीन रांनेरां बाद, मरियम वापस अपने घरे जेई।

एसेरे बाद, एलीशिबां अपने मठे ज़र्म दित्तू। जकर्याह ते, एलीशिबां तैस मट्ठेरू नवं यूहन्ना रख्खू, ज़ेन्च़रे कि तैनी स्वर्गदूते हुक्म दित्तोरो थियो। तैखन परमेशरे जकर्याहे फिरि गलां केरनेरे लेई कबूल कियो। जकर्याहे ज़ोवं, “परमेशरेरी तारीफ़ भोए, किजोकि तैनी अपने लोकां केरि मदत केरनेरे लेई याद रख्खू! हे मेरे मट्ठा, तू सर्व-शक्तिमान परमेशरेरो नबी भोलो। तू लोकन ज़ोलो कि तैना केन्च़रे अपने पापां केरि माफ़ी हासिल केरेले!”