21. परमेशर मसीहेरे एजनेरो वादो केरते।

ज़ैख परमेशरे इस संसारेरी सृष्टि कियोरी थी। त तै ज़ानतो थियो कि मीं बादे मां कैखन मसीह भेज़नो पेनोए। तैनी आदम ते हाव्वी सीं वादो कियो कि तै एरू केरेलो। तैनी ज़ोवं, कि हाव्वारे वंशे मरां अक बच्चो ज़र्मेलो ज़ै अप्पेरी क्रोड़ी ढ्लेन्च़ेलो। ज़ैनी सप्पे हव्वी धोखो दितोरो थियो तै शैतान थियो। परमेशरेरो मतलब थियो कि मसीह पूरे तरीके सीं शैताने हारालो।

परमेशरे अब्रहामे सीं वादो कियोरो थियो, कि तैसेरे ज़िरिये संसाररेरी सैरी कौमां बरकत हासिल केरेली। ते परमेशर बादे मां कोन्ची वक्ते मां मसीह भेज़ेनेरे ज़िरिये एस वादे पूरो केरेलो। तै मसीह संसारेरे हर कौमी मरां लोकन तैनकेरे पापन करां छुटालो।

परमेशरे मूसा सीं वादो कियोरो थियो, कि एजने बाले वक्ते मां तै मूसेरो ज़ेरो अक होरो नबी भेज़ेलो। ते एह नबी मसीह भोलो। इस तरीके सीं, परेमेशरे फिरि वादो कियो कि तै मसीह भेज़ेलो।

परमेशरे दाऊदद राज़े सीं वादो कियोरो थियो, कि तैसेरे खानदाने मरां मसीह भोलो। तै राज़ो भोलो ते परमेशरेरे लोकन पुड़ हमेशा राज़ केरेलो।

परमेशरे यिर्मयाह नेबी सीं ज़ोवं, कि एक्की दिहाड़े तै अक नंव्वो करार केरेलो। तै इस्राएले सीं कियोरो पूराने करारेरो ज़ेरो न भोलो। ज़ैखन लोकन सीं तै अपनो करार केरेलो। त तै तैन पुड़ अपने-आपे बंदो केरेलो। ते हर कोई मैनू तैसे सीं प्यार रख्खेलो ते तैसेरे कानूने मन्नेरी इच्छा रख्खेलो। परमेशरे ज़ोवं कि एन तैसेरे कानून तैनकेरे दिलन पुड़ लिखनेरू ज़ेरू भोलू। तैना तैसेरे लोक भोले, ते परमेशर तैनकेरे पाप माफ़ केरेलो। तै मसीह भोलो ज़ै तैन्न सीं नंव्वो करार केरेलो।

परमेशरेरे नेबेईं इन भी ज़ोवं, कि मसीह अक नबी भोलो। नबी ज़ैन वचन शुनाते ते फिरि लोकन पुड़ परमेशरेरे वचनेरी घोषणा केरते। ज़ैस भेज़नेरो परमेशरे वादो कियोरो थियो तै मसीह अक मुशुर नबी भोलो। मतलब तै परमेशरेरो सन्देश रोड़े च़ारे शुनालो, ते तै लोकन तैना सन्देश रोड़े­च़ारे शिखालेलो।

इस्राएली याजकेईं लोकां केरे लेईं परमेशरे कां बलिदान च़ाड़नू जारी रख्खू। एन बलिदान लोकन केरे पापां केरे लेई तैना परमेशरेरे तरफां सज़ा दिते गंनेरे जिगाई च़ाड़े गाते थिए। याजकेईं लोकां केरे लेंई प्राथना की। पन तै मसीह सिद्ध महायाजक भोलो ज़ै परमेशरे जो देनेरे लेईं एक्की सिद्ध बेलारे रूपे मां अपने-आपे च़ाड़ेलो। मतलब, तै कधी पाप न केरेलो, ते ज़ैखन तै अपने-आपे बली भोनेरे लेई देलो, त संसारे होरी केंन्ची भी बेलरी ज़रूरत न भोली।

लोकन पुड़ राज़े ते प्रधान राज़ केरतन, ते कधी-कधी तैना गलती भी केरतन। दाऊद राज़े सिर्फ इस्राएली लोकन पुड़ राज़ कियूं। पन दाऊद राज़ेरे खानदाने मरां एजने बालो मसीह पूरे संसारे पुड़ राज़ केरेलो, ते तै हमेशारे लेई राज़ केरेलो। ते एल्हेरे इलावा तै हमेशा इन्साफे सीं राज़ केरेलो।

परमेशरेरे नेबेईं मसीहेरे बारे मां बेड़ी गलां ज़ोइ। ज़ेन्च़रे कि, मालाकी नबी ज़ोते मसीहेरे एजनेरे पेइले अक नबी एजनोए। तै अक बड़ो खास नबी भोलो। इसेरे इलावा, यशायाह नबी ज़ोते कि मसीह एक्की कुवैरी कुइअरे ज़िरिये ज़र्म घिन्नेलो। ते मीका नेबे ज़ोवं कि मसीह बैतलहम नगर मां ज़र्म घिन्नेलो।

यशायाह नेबे ज़ोवं, कि मसीह गलील इलाके मां रालो। ते ज़ैना लोक बड़े दुखीन मसीह तैन शान्ति देलो। तै कैदन भी आज़ाद केरेलो। मसीह बिमारन ते टावन्न, ते कान्न, ते लैट्टन, टोंन्टन ठीक केरेलो।

यशायाह नेबे इन भी ज़ोवं, कि लोक मसीह सीं नफरत केरेले ते तैस कुबूल न केरेले, पन तैसेरू इनकार केरेले। ते होरी नेबेईं ज़ोवं, कि तैसेरो अक साथी तैस ट्लुव्वानेरे लेई चैन्दरे 30 सीक्के नेलो। इसेरे इलावा, किछ नेबेईं ज़ोवं, कि लोक मसीह मैरी छ़डेले, ते इन भी कि तैसेरे लिकड़ां केरे लेई पेरची छ़ेड्डी।

नेबेईं इन भी ज़ोवं, कि मसीहा केन्च़रे मरेलो। यशायाह नेबे भविषयवाणी की कि मसीह पुड़ थुकेले, तैसेरो मज़ाक उड़ाले, ते तैस मारेले-पीटेल। तैना तैस कोशेले ते तै कष्टे मां मरेलो, हलाकि तैनी किछ भी गलती नईं कियोरी भोनी।

नेबेईं इन भी ज़ोवं, कि मसीह पाप न केरेलो। तै सिद्ध भोलो। पन तै एल्हेरेलेई मरेलो, किजोकी परमेशर तैस होरी लोकां केरे पापां केरि सज़ा देलो। तैसेरे मौतरे वजाई सीं लोक परमेशरे सीं मेल मिलाप केरेले। एल्हेरेलेई परमेशर चाते कि मसीह मरे।

नेबेईं इन भी ज़ोवं, कि परमेशर मसीह मुड़दन मरां ज़ींतो केरेलो। ते एन इन साबित केरते एन नंव्वो करार केरनेरी परमेशरेरी योजना थी, ताकि तै तैन बंच़ेई बटे ज़ैनेई तैसेरे खिलाफ पाप कियोरोए।

परमेशरे नेबी केरे ज़िरिये मसीहेरे बारे मां बेड़ी गलां बैंदी कियोरी थी, पन मसीह तैन्न मरां केन्ची भी नेबेरे सामने न थियो एवरो। भविषयवैणी दित्ते गंनेरे 400 सालन करां भी जादे, सही वक्ते पुड़, परमेशर मसीह इस संसार मां भेज़ेलो।