20. गुलामी ते गुलैमी मरां वापस एजनु।

इस्राएलेरे राज़े ते यहूदारे राज़े दूइयेंई परमेशरेरे खिलाफ पाप कियो। तैनेंइ तै करार ट्लोड़ो ज़ै परमेशरे सीनै पहाड़े पुड़ कियोरो थियो। परमेशरे तैन्न फिरि तोबा केरने ते फिरि परमेशरेरी आराधना केरनेरी खबरदरी देनेरे लेई अपने नबी भेज़े, पन तैनेईं तैनकेरी मन्ने करां इनक़ार कियूं।

ते परमेशरे तैनकेरे दुशमन तैनकेरो नाश केरने मां तैना कबल केरनेरे ज़िरिहे दूइये रज़ान सज़ा दित्ती। अशुर अक गैर ज़तारो मुल्ख थियो ज़ै बड़ो शक्तीशाली भोई जेवरो थियो। तैना होरी मुल्खां केरे लेंइ साखत दिलेरे थिए। तैनेईं एइतां इस्राएलेरू राज़ नाश कियूं आशुरी लोकेईं इस्राएले राज़े मां एइतां बड़े लोक मारे।। ज़ै चाओ तै लुट्टो, ते मुल्खेरे कई हिस्से फुके।

अशुरी लोकेईं सब प्रधान, ते धनवान, ते एरे लोक ज़ैना कीमती चीजां बनेइ सखते थिए एक्की जिगाई अकोठे किये। ते तैनेईं तैना अशुर मुल्खे जो नीये। इस्राएले मां सिर्फ किछ गरीब इस्राएली लोक बंच़े।

फिरि अशुरी लोकेईं तैस मुल्खे मां रानेरे लेई परदेशी लोक आने। तैना परदेशी मैनेईं तैना नगर फिरि बनाए। ज़ैना इस्राएली तैड़ी बंच़ोरे थिए तैन सीं तैनेईं ड्ला बनाए। ते एना लोकां केरि ज़ै औलाद भोई तैन्न जो सामरी ज़ोते थिए।

यहूदारे राज़ेरे लोकेईं हेरू कि केन्च़रे परमेशरे तैन विश्वास न केरने ते तैसेरी गल न मन्नेरे वजाई सीं इस्राएलेरे राज़ेरे लोकन सज़ा दितोरी। पन फिर भी तैनेईं कनानी लोकां केरे देबतां केरि मूर्ती पूज़ा की। परमेशरे तैन खबरदारी देनेरेलेई नबी भेज़े पन तैनेईं इन्कार कियूं।

लगभग 100 सालां केरे बाद अशूरी लोकेईं इस्राएलेरू राज़ नाश कियूं। परमेशरे बेबीलोनेरो राज़ो, नबूकदनेस्सर यहूदारे राज़े पुड़ हमलो केरनेरे लेई भेज़ो। बेबीलोन अक शक्तिशाली मुल्ख थियो। ते यहूदारो राज़ो नबूकदनेस्सरेरो दास बन्ने ते हर साल तैस बड़ू धन देनेरे लेई राज़ी भोव।

पन किछ सालां केरे बाद, यहूदारो राज़ो बेबीलोनेरे राज़ेरे खिलाफ़ भोव। ते बेबीलोनेरे लोकेईं वापस एइतां यहूदारे राज़े पुड़ हमलो कियो। ते नगर ते भवनेरे खज़ाने लुटतां निये।

खलाफ भोनेरे वजाई सीं यहूदारे राज़े सज़ा देनेरे लेई, नबूकदनेस्सरेरे सेना राज़ेरू मट्ठू तैसेरे सामने मारू ते फिरी तैन कानू कियूं। तैसेरां बाद, तैना राज़ो घिन्तां जे। कि तै बेबीलोनेरे कैदखाने मां मारो गए।

नबूकदनेस्सर ते तैसेरी सेना यहूदारे राज़ेरे लगभग सारे लोक बीलोने जो घिन्तां जेइ, सिर्फ़ गरीब लोक पत्रोवं छ़ड्डे, ताकि तैना उडारन मां फसल लांन। तैस वक्ते जो गुलैमी मां गानेरो वक्त ज़ोतन। ज़ैस मां परमेशरेरे लोक वादेरे मुल्खे मरां निसतां गांनेरे लेई मजबूर कियोरे थिए।

चाए परमेशरे अपने लोकन तैन केरे पापां केरे वजाई सीं गुलैमी मां नेनेरे ज़िरिहे सज़ा दिती, फिरी भी तैनी तैना ते अपनो वादो न थियो बिसरोरो। परमेशरे अपने लोकन पुड़ अपनी निगरानी केरनी जारी रख्खी ते अपने नेबी केरे ज़िरिहे तैन्न सीं गलां केरतो राव। तैनी वादो कियो कि 70 सालां केरे बाद, तै फिरि तैन वादेरे मुल्खे मां वापस आनेलो।

लगभग 70 सालां केरे बाद, फारसेरे राज़े कुस्रू ज़ै थियो तैनी बेबीलोन हाराव, एल्हेरेलेई बेबीलोनेरे राज़ेरे बजाए फारसेरे राज़े कई मुल्खन पुड़ हमलो कियो। इस्राएली लोकन जो हुनी यहूदी ज़ोते थिए। तैन्न मरां बाड़ेईं अपनी पुरी जिन्दगी बेबीलोने मां गुज़ारोरी थी। सिर्फ थोड़े बुढ़े यहूदन यहूदारो मुल्ख याद थियो।

फारसी लोक बड़े तगतबार थिए, पन तैनेईं अपने ज़ीतोरे लोक पुड़ दया कियोरी थी। फारसी लोकां केरू राज़ बन्नेरे थोड़े वक्तेरां बाद, कुस्रू राज़े अक हुक्म दित्तो। कि यहूदी ज़ै यहूदा जो गांनु चातो थियो, तै फारसेरां निसतां वापस यहूदा मां गेइ सकते। इड़ी तगर कि तैनी तैन फिरि भवन बन्नेरे लेई बड़ू धन भी दित्तू गुलैमरे 70 सलना बाद, यहूदी केरो अक नीक्ड़ो जथो यहूदा मां यरूशलेम नगरे जो वापस अव।

ज़ैखन तैना लोक यरूशलेम नगरे मां पुज़्ज़े त तैनेईं भवन ते च़ेवरे पासे दीवार फिरी बनाई। फारसी लोक हेजु भी तैन पुड़ राज़ केरते थिए। पन एक्की बार फिरि तैना वादेरे मुल्खे मां राने लगोरे थिए ते भवने मां आराधना केरि रावरे थिए।