19. नबी

परमेशर हमेशा इस्राएली लोकन कां नबी भेज़तो रहतो थियो। नबी परमेशरे करां सन्देश शुन्ते थिए ते फिरि तै बिस्तार लोकन देते थिए।

ज़ैखन अहाब इस्राएलेरो राज़ो थियो। तैस वक्ते अक नबी एलिय्याह थियो। अहाब अक बुरो मैनू थियो। तैनी झूठे देबतां केरि भागती केरनेरे लेई लोक मजबूर कियोरे थिए। एल्हेरेलेई एलिय्याहे अहाबे सीं ज़ोवं, कि परमेशर तैन लोकन सज़ा देने बालो थियो। तैनी तैस सीं ज़ोवं, “ज़ैखन तगर अवं फिरि झ़ड़ी भोनेरे लेईं न ज़ोईं तैखन तगर इस्राएले मां न झ़ड़ी भोली ते न ओश पेली।” ते इस गल्लां अहाब एत्रो सरकाव कि तैनी एलिय्याह मारनेरो फैसलो कियो।

एल्हेरेलेई परमेशरे एलिय्याहे सीं ज़ोवं, कि तै नेशतां जंगले मां गेइतां अहाबे करां छ़ेपी गाए। एलिय्याह जंगले मां तैस पैनी कां जेव ज़ैड़ी गांनेरे लेईं परमेशरे तैस ज़ेवरू थियूं। रोज़ झ़ेझां-ड्लावझ़ी काव एलिय्याहेरे लेईं रोट्टी ते मास आनतो थियो। ते तैस पूरे वक्ते अहाब ते तैसेरी सेना एलिय्याहे तोपती राई, पन तैनेई तै तोपी न बटो।

झ़ड़ी न भोनेरे किछ वक्तेरां बाद पानी शुकी जेवं। ते एल्हेरेलेई एलिय्याह नेड़ेरे इक्की मुल्खे मां च़लो जेव। तैस मुल्खे मां अक गरीब विधवा थी, जैस अक मट्ठू थियुं। तैस कां रोट्टी लगभग ख़तम भेवरी थी। किजोकी तैड़ी केंन्ची भी किसमेरी फसल न थी बनोरी। पन फिर भी, तैसां कौन्शां एलिय्याहेरी देखभाल की, एल्हेरेलेई परमेशरे तैसारी ते तैसारे मट्ठेरी ज़रूरतां पूरी की। ते एस वजाई सीं तैसेरू अटेरू भांड ते तेलेरी कुप्पी कधी खाली न भोई। तैस पूरे अकाले मां तैन्न कां खाने जो थियुं। एलिय्याह किछ सालन तगर तैड़ी राव।

साड़े ट्लाई सालना बाद, परमेशरे एलिय्याहे सीं ज़ोवं कि तै फिरि झ़ड़ी बखालो। तैनी एलिय्याहे फिरी वापस इस्राएलेरे राज़े अहाबे कां गेइतां गल्लां केरनेरे लेई ज़ोवं। एल्हेरेलेई एलिय्याह अहाबे कां जेव। ज़ैखन अहाबे तै लाव त तैनी ज़ोवं, “हछा तूएस, मुसीबत पैदा केरने बालो!” त एलिय्याहे जुवाब दित्तो, मुसीबत पैदा केरने बालो त तू आस! तीं यहोवा परमेशर शारो। तैए सच़्च़ो परमेशरे, सिर्फ तू बाल देबतेरी भागती केरने लगोरोस। हुनी तू सब लोक कर्मेल पहाड़े पुड़ आन।”

ते सारे लोक कर्मेल पहाड़े पुड़ जे। बाल देबतेरे पुजारी आए। तैना सब 450 थिए। एलिय्याहे लोकन सीं ज़ोवं, “कैखन तगर तुस अपनो मन परमेशरे करां दूर रखेले? अगर यहोवा परमेशरे त तैसेरी आराधना केरा! ते अगर बाल परमेशरे त तैस्सेरी आराधना केरा!”

तैखन एलिय्याहे बालेरे पुजैरन सीं ज़ोवं, “अक जनबार बली केरतां तैसेरे मासे बालिदान भोनेरे लेई वेदी पुड़ रखा, पन अग न लेइयथ। ते तैसेरां बाद अवं भी तैने केरेलो, ते एकी अलग वेदी पुड़ अवं तैन मास रख्खेलो। ते अगर परमेश वेदी पुड़ जो अम्बरे मरां अग छ़डेलो त तुस ज़ानेले कि तैए सच़्च़ो परमेशरे।” तैखन बालेरे पुजैरेईं अक बलि तियार की पन अग न लाइ।

ज़ैखन बालेरे पुजारी प्राथना केरने लगे, “हे बाल, इश्शी शुन!” पूरे दिहैड़ी प्राथना की ते चिन्डां मारने लगे, इड़ी तगर कि तैनेई अपनो आप चैकेईं सीं ज़ख्मी कियो। पन बाले कोई जुवाब न दित्तो, ते न तैनी अम्बरेरां कोई अग बछ़ोड़ी।

बालेरे पुजैरन प्राथना केरने मां लगभग पुरी दिहाड़ी बीती। ते फिरी तैनेईं प्राथना केरनी बंद की। तैखन एलिय्याहे होरी जानबरेरू मास परमेशरेरे वेदी पुड़ रख्खू। तैसरां बाद, तैनी पैनेरां बड्डां-बड्डां भांडां तैस मासे पुड़ उलटानेरे लेईं ज़ोवं, ज़ैखन तगर कि मास कैड़ू, वेदी ते वेदारे असे-पासेरी ज़मीन पूरे तरीके सीं अड्ली न भोई।

तैखन एलिय्याहे प्रार्थना की, “हे यहोवा, अब्राहम, इसहाक, ते याकूबेरे परमेशर, असन हिरा कि तू इस्राएलेरो परमेशरस ते इन भी अवं तेरो दासाईं। मीं जुवाब दे ज़ैस सीं की इनां लोक ज़ान्न कि तूए सच़्च़ो परमेशरस।”

अकदमे, अम्बरे मरां अग बिछ़ड़ी ते तैसां मास कैड़ू, घोड़, मिती, ते इड़ी तगर की वेदारे आसे-पासेरू पानी भी शुकेइ छ़डू। ते ज़ैखन लोकेईं एन हेरू, त तैना ज़मीनी पुड़ी लेटे ते ज़ोवं, “यहोवा ही पमेशरे! यहोवा ही पमेशरे!”

तैखन एलिय्याहे ज़ोवं, “बालेरो अक भी नबी इट्ठां बेच़तां न लोड़े गेइ बटोरो!” एल्हेरेलेई लोकेईं बालेरे नबी ट्लाए ते तैना तैट्ठां अलग नेइतां मारे।

तैखन एलिय्याहे अहाब राज़े सीं ज़ोवं, “जल्दी अपने घरे जो नश, किजोकी झ़ड़ी एजनेबालीए।” ते जल्दी घनी बिदलार भोई जेई, ते भारी झ़ड़ी शुरू भोई। यहावा तैस शोहे ख़त्म केरने लगोरो थियो। ते एस सीं इन बांदू भोवं कि योहावा सच़्च़ो परमेशरे।

जैखन एलिय्याहे अपनु कम ख़त्म कियूं, त परमेशरे एलीशा नंव्वेरो अक मैनू अपनो नबी भोनेरे लेई च़ुनो। परमेशरे एलिय्याहेरे ज़िरीहे बड़े चम्तकार किये। अक चम्तकार नामान नंव्वेरे मैनू सीं भी भोवं। तै दुशमनां केरे सेनारो परधान थियो, पन तैस कोड़ थियूं। नामाने एलिय्याहेरे बारे मां शुनोरू थियुं, ते एल्हेरेलेई तै एलिय्याहे कां अव ते तैस सीं ठीक केरनेरी अरज़ की। एलिय्याहे नामाने सीं ज़ोवं, कि गेइतां यरदन दरीयाएरे पैनी मां सत बार डुबकी दे।

नमान सेरकोव। तैनी एन केरने करां इनकार कमावं, किजोकी तैस एन बेवकूफरू कम लग्गू। पन बादे मां तैनी अपनो मन बदलो ते गेइतां यरदन दरियाए मां डुबकी दित्ती। ते ज़ैखन तै आखरी डुबकी देइतां पैनी मरां बेइर निस्सो त परमेशरे तै ठीक कियो।

परमेशरे इस्राएली लोकन कां होरे कई नबी भेज़े। तैना सेभेईं तैन मूर्ती केरि पूज़ा केरनी बन्द केरनेरे बारे मां ज़ोवं। इल्हेरे बजाए, तैन्न एकी-होरी सीं इन्साफे सीं बर्ताव कियोरो लोड़े। ते एक्की-होरि पुड़ दया कियोरी लोड़े। तैन नेबेईं लोक खबरदार किये ते परमेशरेरे हुक्म मन्नेरे लेई ज़ोवं। अगर तैन लोकेईं एन कियूं त परमेशर तैन केरो इन्साफ केरेलो ते तैन्न सज़ा देलो।

ते जादे वक्ते त तैना लोकेई परमेशरेरे हुक्म न मन्ने। तैनेईं नेबन सीं बुरो बर्ताव कियो। इड़ी तगर कि किछ नबी तैनेईं मारे। एक्की फेरे तैनेईं यिर्मयाहे नबी मरनेरे लेई शुक्कोरे खूए मां छ़ड्डो। तै खूहेरे थले च़िकरी मां डुबने लगो। पन तैखन राज़े तैस पुड़ तरस अव, ते तैनी अपने सेवकन हुक्म दित्तो कि यिर्मयाहे मरने करां पेइले एस खूहे मरां बेइर कढा।

नेबेईं परमेशरेरे तरफां ज़ोनु जारी रख्खु। भाले लोकेई तैन्न सीं नफ़रत की। तैना लोकन खबरदार केरते राए कि अगर तैनेई तोबा न की त परमेशर तैन नाश केरेलो। तैनेईं लोकन इन भी याद करावावं कि परमेशरे तैन्न कां अक मसीह भेज़नेरो वादो कियोरोए।