1. सृष्टी

सारे ब्रह्मांडेरी शुरुआत एन्च़रे सीं भोई। परमेशरे शेई दिहाड़न मां ब्रह्मांड ते ज़ैन किछ तैस मां आए तैसेरी रच़ना की। परमेशरेरे धरती बनानेरां बाद धरती आंधरे सीं भेरतां ते सुनसान थी, ते तैस मां किछ भी बनेवरू न थियूं। पन परमेशरेरी आत्मा पैनी पुड़ थी।

तैखन परमेशरे ज़ोवं, “लो भोए!”, त लो भोइ जेई। परमेशरे लो हेरी कि रोड़ी आए; ते परमेशरे लोई जो “दीस” ज़ोवं। परमेशरे लो आंधरे करां अलग की, ते आंधरे जो परमेशरे “रात” ज़ोवं। पेइले दिहाड़े परमेशरे लोअरी रच़ना की।

रच़नेरे दुइयोवं दिहाड़े, परमेशरे ज़ोवं, पैनी पुड़ एरो फासलो भोए ते अक फासलो भोई जेव ते परमेशरे तैस फासले जो अम्बर ज़ोवं।

रच़नेरे ट्लेइयोवं दिहाड़े, परमेशरे ज़ोवं ते पानी शुकोरी ज़मीनी करां अलग कियूं। परमेशरे ज़मीनी जो “धरती” ज़ोवं; ते ज़ैन पानी अकोट्ठू भोवं तैस जो तैने “समुन्दर” ज़ोवं।

फिरी परमेशरे ज़ोवं, “ज़मीनी पुड़ हर किसमेरे बुट ते पौधे लग्गन।” ते तेन्च़रे भोइ जेवं। परमेशरे हेरू कि ज़ै रच़ना तैने कियोरीए तै रोड़ीए।

रच़नारे च़ेवरोवं दिहाड़े, परमेशरे ज़ोवं ते दिहाड़ो, चाँदनी ते तारे बनाए। परमेशरे ज़मीनी पुड़ लो देनेरे लेइ, ते दीस त कने रात, ते मौसम ते सालां केरि पिशानरे लेइ तैना बनाए।

रच़नेरे पंच़ोवं दिहाड़े, परमेशरे ज़ोवं ते पैनी मां तेरनेबाले सब जीप जन्तु ते सब च़ड़ोल्लू बनआं। परमेशरे हेरू कि रोड़ूए, ते तैन बरकत दित्ती।

रच़नेरे शेइयोवं दिहाड़े, परमेशरे ज़ोवं, “हर किसमेरे ज़मीनरे जानबर भोइ गान!” त ज़ेन्च़रे परमेशरे ज़ोवं तेन्च़रे भोवं। किछ ज़मीनी पुड़ पेटेरे भारे च़लनेबाले, किछ उडरने बाले जीप, ते किछ जंगली जानबर थी। ते परमेशरे हेरू कि ऐन रोड़ू आए।

फिरी परमेशरे ज़ोवं। “अस मैनू अपने रूपे मां अपनो ज़ेरो बनामेले। तैन कां धेरतरो ते सब जानबर पुड़ अधिकार भोलो।”

फिरी परमेशरे किछ मित्ती नेही, ते तैस सीं अक मैनू बनव, ते तैस मां ज़िन्दगरी साँस छ़ड्डी। तैस मैनेरू नवं आदम थियूं। परमेशरे आदमेरे रानेरे लेइ अक बाग बनाई, ते बागरी हेर गेश केरनेरे लेइ तै तैड़ी रख्खो।

बागरे मझ़ाटे परमेशरे दुई खास बुट लाए, अक ज़िन्दगरो बुट ते होरो भले ते बुरेरे ज्ञानेरो बुट थियो। परमेशरे आदमे सीं ज़ोवं कि तै भले ते बुरेरे ज्ञानेरे बुटेरे फलेरे अलावा बागरे कोन्ची भी बुटे मरां फल खेइ सकते। पन अगर तै इस बुटेरो फल खालो, त तै मेरि गानोए।

फिरी परमेशरे ज़ोवं, “मड़देरू अकैल्लू रानू ठीक नईं।” पर जानबरन मरां कोई भी मड़देरो मद्दत केरनो बालो न बेनि सकतो थियो।

एल्हेरेलेइ परमेशरे आदमे पुड़ भारी निड्ल छ़ड्डी। तैखन परमेशरे आदमेरे देलोड़लन मरां एक्की सीं कौन्श बनाई ते तै आदमे कां आनी।

ज़ैखन आदमे तै लाई, तैने ज़ोवं, “आखर! ई मेरी ज़ेरि आए! तै मड़दे मरां बनेवरीए एल्हेरेलेइ तैस ज़ो “कौन्श” ज़ोवं जेव” ई वजा आए कि अक मड़द अपने अम्मा-बाजी शैरतां एपनी कौन्शी सीं अक भोइ गाते।

परमेशरे अपने रूपेरो ज़ेरो मड़द ते कौन्श बनाई। ते परमेशरे हेरू कि ऐन रोड़ू आए। तैनी तैन बरकत दित्ती ते तैन सीं ज़ोवं, “बड़ी औलाद पैदा केरा ते धेरती मां भेरोई गाथ!” इन सब किछ रच़नेरे छ़ेइयोवं दिहाड़े भोई जेवं।

ज़ैखन सत्तोवं दिहाड़ी आई, परमेशरे अपनु कम पूरू कियोरू थियूं। एल्हेरेलेइ परमेशरे ज़ैन किछ तै केरि रावरो थियो तैन सब केरने करां आराम कियो। तैने सत्तोवं दिहाड़े बरकत दित्ती ते तै पवित्र ठहराई। किजोकि तैस दिहैड़ी परमेशरे अपने कम्मे करां आराम कियोरो थियो। एन्च़रे सीं परमेशरे इन ब्रह्मांड ते सब किछ ज़ैन तैस मां आए बनावं।