18. बेन्टोरू राज़।

दाऊदे राज़े 40 साल इस्राएले पुड़ राज़ कियूं। तैखन तै मेरि जेव, ते तैसेरे मट्ठे सुलैमाने पुड़ राज़ केरनू शुरू कियूं। परमेशरे सुलैमाने सेइं गल की ते तैस पुछ़ कि सेभन कुन चाते कि परमेशर तैसेरे लेई केरे। सुलैमाने परमेशरे करां मग्गू कि तै बड़ो अक्लमन्द बनेव। सुलैमाने बेड़ी गल्लां शिख्खी ते तै अक अक्लमन्द राज़ केरनेबालो थियो। परमेशरे तै बड़ो अमीर भी बनेवरोए थियो।

यरूशलेम नगरे मां सुलैमाने तै भवन बनेव ज़ैसेरे लेई तैसेरे बाजे योजना बनेवरी थी ते सामान अकोट्ठू कियोरू थियूं। हुनी लोक मिलापबाले तेम्बेरे बिजाए भवने मां परमेशरेरी आराधना केरते थिये। ते तैसेरे लेई बलि च़ाढ़ते थिये। परमेशरेरी हज़ूरी भवने मां रहती थी, ते तैड़ी तै अपने लोकन सीं साथी बास केरतो थियो।

पन सुलैमाने होरि मुल्खां केरि कुइयन सेइं प्यार कियो। तैनी लगभग 1000 कुइयन सीं ड्ला बनेइतां परमेशरेरे हुक्म न मन्ने! इन मरां बेड़ि कौन्‍शां बखले मुल्खन मरां एई ते एप्पु सीं साथी अपने देबते आने ते तैन केरि पूज़ा केरती रैई। ज़ैखन सुलैमान बुढो भोई जेव त तैनी भी तैन केरे देबतां केरि पूज़ा की।

इस वजाई सीं परमेशर सुलैमाने सीं क्रोधे भोव। तैनी ज़ोवं कि तै इस्राएल मुल्खेरे दुई हिस्से बनेइतां तैस सज़ा देलो। तै सुलैमानेरे मरनेरां बाद एरू केरेलो।

सुलैमानेरे मरनेरां बाद, रहबाम राज़ो बनो। इस्राएल मुल्खेरे सब लोक तैस अपने राज़ेरे रूपे मां कबूल केरनेरे लेई साथी अकोट्ठे भोए। तैनेईं रहबामी सीं शिकायत की, कि सुलैमाने तैन करां सकत महनत करावरी थी। तैनी बड़े कर तैन करां वसूल कियोरे थिये। तैनेईं रहबामे करां मिनत की कि तैन करां घट महनत कराए।

पन रहबामे तैन बड़े बेवकूफी सीं जवाब दित्तो, “तुस ज़ोतथ कि मेरे बाजी सुलैमाने तुसन करां सखत महनत कराई। पन अवं तुसन तैस करां भी जादे सखत महनत करालो। ते अवं तैस करां भी जादे तकलीफी मां छ़ेड़ेलो।”

ज़ैखन लोकेईं एरू ज़ोते शुनू त तैन मरां बड़ेईं तैसेरे खलाफ बगावत की। दश गोट्लेई तै शारो। तैस सीं साथी हुनी सिर्फ दुई गोट्ल बच़े। इन दुई गोट्लेईं एप्पू जो यहूदारी रियासत ज़ोवं।

बाकी दश गोट्लेईं यारोबाम नंव्वेरो मैनू अपनो राज़ो बनेव। इना दश गोट्ल उत्तर-पूर्वी हिस्से मां थिये। तैनेईं अपने आपे जो इस्राएल ज़ोवं।

पन यारोबामे परमेशरेरे खलाफ बगावत की, ते लोकन करां पाप कराव। तैने अपने लोकां केरे ज़िरिये पूज़ा केरनेरे लेई दुई मूर्ती बनेई। तैना हुनी यहूदा प्रदेशेरे यरूशलेम नगरे मां परमेशरेरे भवने मां तैसेरी आराधना केरनेरे लेई न जे।

यहूदा ते इस्राएल एप्पू मांमेइं दुश्मन बेनी जे ते हमेशा एक्की होरि सीं लड़ने लगे।

इस्राएलेरे नंव्वे मुल्खे मां सारे राज़े दुष्ट थिये। इन मां बाकी राज़े तैन केरे ठैरी राज़ो बन्नेरी इच्छा रखनेरे लेई मारे जे।

इस्राएल प्रदेशेरे सारे राज़ेईं ते जादे तर लोकेईं मूर्ती केरि पूज़ा की। ज़ैखन तैनेईं एरू कियूं, त तैना अकसर वेश्यान सीं साथी झ़ुल्ले ते इड़ी तगर कि बड़े बार मूरती केरे सामने बच्चे भी बलि किये।

यहूदा प्रदेशेरे राज़े, दाऊदेरे खानदानेरे थिये। इन राज़न मरां बड़े रोड़े मैनू थिये, ज़ैनेईं इन्साफे सीं राज़ कियूं ते परमेशरेरी आराधना की। पन यहूदारे जादे राज़े दुष्ट थिये। तैनेईं दुष्टे सीं राज़ कियूं, ते मूरती केरि पूज़ा की। इड़ी तगर इन मरां किछ राज़ेईं झूठे देबतां केरे सामने अपने बच्चे भी बलि किये। यहूदारे जादे तर लोकेईं भी परमेशरेरे खलाफ पाप कियो ते बाकी देबतां केरि पूज़ा की।