17. दाऊदे सीं परमेशरेरो करार।

शाऊल इस्राएली लोकां करो पेइलो राज़ो थियो। तै लम्मो ते हेरनो बड़ो रोड़ो थियो, ज़ेरो तैना लोक चाते थिए तै तेरो थियो। पन बादे मां तै अक दुष्ट मैनू बेनी जेव ज़ैनी परमेशरेरी गल न मन्नी। एल्हेरेलेई परमेशरे अक होरो मैनू च़ुनो, ज़ै कि एक्की दिहाड़े तैसेरे जिगाई पुड़ राज़ो बनेलो।

परमेशरे दाऊद नंव्वेरो अक जवान इस्राएली च़ुन्तां एक्की दिहैड़ी शाऊलेरे जिगाई पुड़ राज़ो भोनेरे लेई तियार केरनो शुरू कियो। दाऊद बैतलहम नगररो अक पुहाल थियो। कई बार, दाऊदे इछ़ ते ड्लाघ दुइए मरोरे थिए। किजोकी ज़ैखन दाऊद गब्बां केरो पेरहो केरतो थियो, त तैनेई गब्बन पुड़ हमलो कियोरो थियो। दाऊद अक नरम ते धर्मी मैनू थियो। तैनी परमेशरे पुड़ भरोसो कियो ते तैसेरी गलां मेनी।

ज़ैखन दाऊद हेजु जवाने थियो, तैनी लम्बे-चौड़े गोलियते सीं लड़ाई की। गोलियत अक बड़ो ताकतबर फलिशती सिपाही थियो। तै बड़ो मजबूत ते लगभग ट्लाई मीटर लम्मो थियो! पन परमेशरे गोलियत मारने ते इस्राएले बंच़ाने मां दाऊदेरी मदत की। इसेरे बाद, दाऊदे इस्राएली लोकां केरे दुशमुन्न पुड़ कई बार ज़ींत हासिल की। ते दाऊद अक बड़ो बहादर सिपाही बेनी जेव, ते तैनी बड़े जंगन मां इस्राएली सेनारी अगुवाही की। ते लोकेईं तैसेरी बड़ी तारीफ़ की।

ते लोकेईं दाऊदे सीं एत्रो प्यार कियो, कि शाऊल तैस सीं ज़लने लगो। आखरकार शाऊल तैस मारने चातो थियो, एल्हेरेलेई दाऊद तैस करां ते तैसेरे सैनिकन करां छ़पनेरे लेईं जंगले मां जो नशो। अक्सां ज़ैखन शाऊल ते तैसेरे सिपाही दाऊदे तोपने लगोरे थिए त शऊल एक्की कुढ़ी मां जेव। एह तैए कुढ़ थी जैसमां दाऊद छ़ापारो थियो। पन शाऊले तै न थियो लाहोरो। दाऊद शाऊले कां बड़े नेड़े जेव ते तैसेरे लिकड़ेरो अक टुकड़ो काटो। बादे मां, जैखन शाऊल तैस कुढ़ी मरां निस्सो त दाऊदे हक देइतां तै लिकड़ेरो कटोरो टुकड़ो तैस हिराव। एस तरीके सीं, शाऊले इन ज़ानू कि दाऊदे राज़ो बन्नेरे लेईं तैस मारने करां इन्कार कियोरो थियो।

किछ वक्तेरां बाद, शाऊल जंगी मां मेरि जेव, ते दाऊद इस्राएलेरो राज़ो बेनी जेव। तै अक अच्छो राज़ो थियो, ते लोकेई तैसे सीं प्यार रखो। परमेशरे दाऊदे बरकत दित्ती ते तै कामयाब बनाव। दाऊदे बेड़ी जंगां लेड़ी, ते परमेशरे इस्राएलेरे दुश्मनन हाराने मां तैसेरी मदत की। दाऊदे यरूशलेम नगर ज़ींतू तै अपनी राजधानी बनाई, ज़ैड़ी तै राव ते राज़ कियूं। दाऊद 40 सालन तगर राज़ो राव। तैस वक्तेरे दौरान इस्राएली ताकतबर ते अमीर भोते जे।

दाऊद यहोवारे लेई अक भवन बनानो चातो थियो ज़ैड़ी सारे इस्राएली परमेशरेरी आराधना केरि सखन ते तैसेरे लेईं बलिदान च़ैड़ी सखन। लगभग 400 सालन करां लोक मूसेरे बनेवरे मिलापे बाले तेम्बु मां परमेशरेरी आराधना केरि राहोरे थिए, ते तैसेरे लेईं बलिदान च़ैड़ी राहोरे थिए।

पन तैड़ी नातान नबी रहतो थियो। ते परमेशरे तै दाउदे सीं इन ज़ोन भेज़ो: “तीं बेड़ी जंगां लेड़ोरीन, एल्हेरेलेई तू मेरे लेईं भवन न बनेई बटेलो, पन तेरू मट्ठू तैस बनालू। फिरी भी अवं तीं बड़ी बरकत देलो। तेरे खानदाने मरां अक हमेशरे लेई मेरे लोकन पुड़ राज़ केरेलो।” ते हमेशारे लेई राज़ केरने बालो दाउदेरे खानदाने मरां तै मसीह थियो। मसीह परमेशरेरो च़ुनोरो थियो ज़ै इस दुनियारे लोकन तैन केरे पापन करां छुटालो।

जैखन दाऊदे नातान नेबेरी गल्लां शुनी त तैनी परमेशरेरू शुक्र कियूं, ते तैसेरी तारीफ की। परमेशर तैसेरी इज़्ज़त बधाने लगोरो थियो। ते तैस बेड़ी बरकतां देने लगोरो थियो। बेशक, दाऊद न थियो ज़ानतो कि परमेशर इनां गलां कैखन केरेलो। इस वक्ते अस ज़ानतम की इस्राएली लोकन लम्मे वक्ते तगर, लगभग 1,000 सालन तगर मसीहेरू एजनू बलगनू थियूं।

दाऊदे कई सालन तगर न्यायए सीं अपने लोकन पुड़ राज़ कियूं। तैनी बड़े दिले सीं परमेशरेरी गलां मेन्नी ते परमेशरे तैस बरकत दिती। हलाकि, एपनी ज़िन्दगरे आखरी मां तैनी परमेशरेरे खिलाफ बड़ो पाप कियोरो थियो।

एक्की दिहाड़े दाऊदे अपने महले मरां बेइर जो तक्कू ते अक खूबसूत कौन्श लाई। तै तैस न थियो ज़ानतो, पन तैनी पतो कियो कि तैसरू नवं बतशेबा आए।

अपनी नज़र फरनेरे बाजाए, दाऊदे तै एप्पू कां अन्नेरे लेई कोई भेज़ो। तै तैस कां झ़ुल्लो ते फिरि तै वापस घरे जो भेज़ी। ते थोड़े वक्तेरां बाद बतशेबां दाऊदे जो ई बिस्तार भेज़ो कि तै दोज़ींती आए।

बतशेबरो मुन्श उरियाहा नंव्वेरो मैनू थियो। तै दउदेरे खास सेनकन मरां अक थियो। ते इस वक्ते तै जंग लड़नेरे लेई जेवरो थियो। ते दाऊदे तैस जंगी मरां वापस कुजेइतां अपने लैड़ी सीं साथी रांनेरे लेई ज़ोवं। पन बाकी सिपाही जंगी मां थिए ते एल्हेरेलेई ऊरिय्याहे घरे गांनेरे लेईं इन्कार कमावं। ते दाऊदे तै जंगी मां फिरि वापस भेज़ो ते सेनारे प्रधाने सीं तैस एरे जगाई रखनेरे लेई ज़ोवं ज़ैड़ी दुशमन तागतबार भोए। ताकि तै मेरी गए। ते एरू भोवं की उरियाहा जंगी मां मारो जेव।

उरियाहेरे जंगी मां मेरि गांनेरे बाद दाऊदे बतशेबा सीं ड्ला बनाव। बादे मां, तैसां दाऊदेरे मट्ठे ज़र्म दित्तू। दाऊदे ज़ैन कियूं तैसेरे वजाई सीं परमेशर बड़ो सेरकोरो थियो। एल्हेरेलेई तैनी नातान नबी दाऊदे जो ई बिस्तर देने भेज़ो, तैसेरो पाप केत्रो बुरो थियो। ते दाऊदे अपने पापरे लेई पश्चाताप कियो ते परमेशरे तैस माफ़ कियूं। अपने बाकी जिन्दगी मां दाऊद परमेशरे पतपत्ती च़ालतो राव ते तैसेरे हुक्म मन्ने।

पन दाऊदेरो तै बच्चो मेरि जेव। एन्च़रे सीं परमेशरे दाऊदे सज़ा दित्ती। इसेरे इलावा, दाऊडदेरे मरने तगर, तैसेरे पारीवारेरे किछ लोकेई तैसे सीं लड़ाई की, ते दाऊदेरी अपनी शक्ति घाटोरी थी। पन परमेशर वफादार थियो ते हुनी भी तैनी तैन कियूं ज़ैन केरनेरो तैनी दाऊदे सीं वादो कियोरो थियो। कि तै तैन केरेलो भले ही तैस करां परमेशरेरे हुक्म ट्लुटोरे थिए। बादे मां दाऊद ते बतशेबारे होरे भी बच्चो भोव, ते तैनेईं तैसेरू नवं सुलैमान रख्खू।