16. मुक्ति देनेबालो

यहोशू एरे मरनेरे बाद इस्राएली लोकेईं परमेशरेरे हुक्म न मन्ने। तैनेईं परमेशरेरे नियम न मन्ने। ते तैनेईं तैस करार मुल्खे मां बच़ोरे कनानी लोक बेइर न कढे। इस्राएली लोकेईं अपनो सच़्च़ो परमेशर यहोवा शैरतां कनानी लोकां केरे देबतां केरि पूज़ा केरनी शुरू की। इस्राएली लोकां केरो कोई राज़ो न थियो, एल्हेरेलेई ज़ैस ज़ेरू ठीक लग्गू तैनी तेन्च़रे कियूं।

परमेशरेरे हुक्म न मन्नेरे ज़रिये इस्राएली लोकन मां अक रीत च़लनी शुरू भोई ज़ै कई बार दोरहेवरी थी। एह रीत इस तरीके सीं च़ली: किछ सालन तगर इस्राएली परमेशरेरे हुक्म न मन्ने, तैखन परमेशर तैन तैन केरे दुश्मून्न करां हारनेरे ज़रिये तैन्न सज़ा देलो। तैना दुश्मन इस्राएली लोकां केरि चीजां लुटेले, ते तैन केरि जैइदाद नाश केरेले, ते तैन्न मरां बड़े लोकन मैरी छ़डेलो। फिरी ज़ैखन इस्राएली लोक अपने पापां केरो पश्चाताप केरेले ते अपने बंच़नेरे लेंई परमेशरे कां प्राथना केरेले।

हर बार ज़ैखन इस्राएली लोक पश्चाताप केरेले त परमेशर तैन बच़ालो। तै एक्की छुटानेबालेरे ज़िरिये एरू केरेलो। अक एरो मैन्हु ज़ै तैन केरे दुश्मनन सीं लड़ेलो ते तैन हारालो। ज़ैखन मुल्खे मां सुख शान्ति भोली ते तै छुटानेबालो तैन पुड़ रोड़ेच़ारे राज़ केरेलो। परमेशरे तैना लोक बच़ानेरे लेई बड़े छुटानेबाले भेज़े। परमेशरे तैन केरे नेड़े रानेबाली अक कौम, मिद्यानी केरे ज़िरिये इस्राएली हारानेरे ज़िरिये एरू कियूं।

मिद्यानि लोकेईं सत सालन तगर इस्राएली लोकां केरि फसलां लुट्टी। इस्राएली लोक बड़े डरोरे थिए, ते तैना कुढ़न मां छ़पे ताकि मिद्यानी लोक तैन तोपी न बटन। आखरकार अपनो आप बंच़ानेरे लेई तैनेई परमेशर फुकारो।

गिदोन नव्वेंरो अक इस्राएली मैनू थियो। एक्की दिहाड़े, तै एक्की छ़ेपोरी ठारी मां गेहुँ मडने लगोरो थियो, ताकि मिद्यानी लोक तैन च़ोरी न बटन। ते यहोवा परमेशरेरे दूते गिदोने कां एइतां तैस सीं ज़ोवं, “हे बहादर जुवाना, परमेशर तीं सीं साथीए, गा ते इस्राएली लोकन मिद्यानी लोकन करां बंच़ा।”

गिदोनेरे बाजे अक वेदी बनावरी थी तैस पुड़ मूरतन जो बालि चड़ते थिए। सेभन पेइली गल ज़ै परमेशरे गिदोन केरनेरे लेई ज़ोवं, तै ई थी कि तै वेदी ट्लोड़ी गाए। पन गिदोन लोकन करां डरतो थियो। एल्हेरेलेई तैनी रात भोने तगर बलगू। फिरी तैनी तै वेदी ट्लोड़तां टुकड़े-टुकड़े किए। ते तैनी परमेशरेरे लेई अक नव्वीं वेदी बनाई ते तैस पुड़ परमेशरेरे लेई बलि च़ाड़ी।

होरसां झ़ेझ़ां लोकेईं कुन हेरू कि केन्चे वेदी ट्लोड़तां तैसारे टुकड़े-टुकड़े कियोरेन। एल्हेरेलेई तैना लोक झ़ेझ़ां सेरकोरे थिए। तैना गिदोने मारनेरे लेई तैसेरे घरे जे, पन गिदोनेरे बाजे ज़ोवं, “तुस अपने देबतेरी मदत केरनेरी कोशिश केरने लगोरेथ? अगर तै देबतोए त तैस अपनी हिफाज़त एप्पु केरने देथ!” किजोकी तैनी एन्च़रे ज़ोवं, एल्हेरेलेई लोकईं गोदोन न मारो।

ते फिरी मिद्यानी लोक इस्राएली लोकन लुटने आए। तैना एत्रे थिए कि तैन केरि गिनती भी न थी भोई सकती। गिदोने तैन्न सीं लड़नेरे लेई सारे इस्राएली लोक कुजेइतां अकोट्ठे किये। गिदोने परमेशरे करां दूई निशान मग्गे। ताकि तैस विश्वास भोए कि परमेशर सच़्च़े तैस इस्राएली लोकन बंच़ानेरे लेई लगोरोए ज़ोने लेवोरे।

पेइले निशानेरे लेई, गिदोने भैडरी ऊन ज़मीनी पुड़ रेखतां परमेशरे सीं ज़ोवं, कि झ़ेझारी ओश सिर्फ भैडरे ऊनी पुड़ पे, ते ज़मीनी पुड़ न पे त परमेशरे एन्च़रे कियूं। होरसां ड्लवझ़ी, तैनी परमेशरे सीं ज़ोवं, कि ज़मीन सिज़्ज़े ते पन भैडरी ऊन शुकोरी राए। ते परमेशरे एरू भी कियूं। इना दूई निशनां केरे ज़रिये, गिदोने विश्वास कियो, कि सच़्च़े परमेशर चाते कि तै इस्राएली लोकन मिद्यानि लोकन करां बंच़ाए।

तैखन गिदोने सिपाही एप्पू कां अकोठे किये ते 32,000 मड़द आए। ते गोदोने तैन मरां 22,000 घरजो वापस भेज़े, ज़ैना जंगी करां डरते थिए। ते परमेशरे गिदोने सीं ज़ोवं, एना हेजू भी जादे आन। एल्हेरेलेई गिदोने 300 सिपेही केरे इलावा सब घरजो वापस भेज़े।

तैस राती परमेशरे गिदोने सीं ज़ोवं, “मिद्यानी लोकां केरे सेनारे डेरे मां गा ते तैन गलां केरते शुन। ज़ैखन तू शुनस कि तैना कुन गलां लगोरेन केरने त तू तैन पुड़ हमलो केरने करां न डेरां।” एल्हेरेलेई तैस राती, गिदोन बुन तैन केरे सेनारे डेरे कां जेव ते तैनी अक मिद्यानी सिपाही अपने दोसते सीं तै गल ज़ोते शुनो। ज़ैना तैनी सुपने मां लेवरी थी। तैनी सिपाही दोसते ज़ोवं, “ऐस सुप्नेरो मतलबे कि गिदोनेरी सेना इश्शे मिद्यानी सेना हाराए!” ज़ैखन गिदोने एन शुनू त तैनी परमेशरेरी तारीफ़ की।

तैखन गिदोन वापस अव त तैन्न मरां सेभन अक-अक नार्शिन्गो, अक घड़ो, ते अक मसाल दित्ती। तैनेई मिद्यानी सेनारे डेरन घेरो दित्तो, ज़ैड़ी मिद्यानी सिपाही झ़ुलोरे थिए। गिदोनेरे 300 सैथेंई एपनी मसालां घड़न मां छेडोरी थी एल्हेरेलेई मिद्यानी लोकेई तैन केरि मिसालां केरि लौ न लेई बटी।

तैखन गिदोनेरे सब सेनकेईं अपने घड़े एक्की वक्ते पुड़ ट्लोड़तां अचानक मसलां केरि आग लहोइयोई। तैनेईं अपने नरशिंगे बाज़ाए ते लाल्कारू, “यहोवारी ते गिदोनेरी तलवार!”

परमेशरे मिद्यानी घेरे, एल्हेरेलेई तैना एक्की-होरी मारने-काटने लगे। ते अकदामे, गिदोने बिस्तारदेने बालेंई बड़े इस्राएली मिद्यान्न पती ख़तने मां तैनकेरी मदत केरनेरे लेई कुजानेरे लेई भेज़े। तैनेई तैन मरां बड़े मारे ते बाकी रहोरन पती खेत्तां तैना इस्राएल मुल्खे मरां बेइर कढ़े। तैस दिहाड़े 1,20,000 मिद्यानी मारे जे। एस तरीके सीं परमेशरे इस्राएली लोक बंच़ाए।

तैना लोक गिदोने अपनो राज़ो बनानो चाते थिए। पन गिदोने तैन्न एन केरने न दित्तू, पन तैनी तैन करां सोन्नेरे तैना गेने मग्गे ज़ैना तैन मरां हर एक्के मिद्यानी लोकन करां लूटी मां अनोरे थिए। ते तैनेई गिदोने बड़ू सोन्नू दित्तू।

तैखन गिदोने तैस सोन्ने सीं अक ख़ास लिकड़ बनावं ज़ेरां लिगड़ां महायाजक लाते थिए। पन लोकेई तैसेरी भागती केरनी शुरू की ज़ेन्चरे कि तै अक मूर्ति भोए। तैखन परमेशरे फिरी इस्राएले सज़ा दित्ती किजोकी तैनेई मूर्तरी पूज़ा कियोरी थी। परमेशरे तैन केरे दुश्मन तैन्न हाराने मां कबल बनाए। आखरकार तैनेई फिरी मदत केरनेरे लेई परमेशरे कां प्राथना की। ते परमेशरे तैन कां तैन बंच़ानेरे लेई अक होरो छुटाने बालो भेज़ो।

एह गल कई बार भोंती राई। इस्रएली लोक पाप केरते राए, परमेश्वर तैन्न सज़ा देतो राव, तैना पश्चाताप केरेते थिए, ते परमेशर तैन्न छुटानेरे लेई कोन्ची भेज़तो थियो, कई सालन तगर परमेशर कई छुटानेबाले भेज़े तैनेई इस्राएली लोक तैन केरे दुशमन्न करां बच़ाए।

आखरकार, तैना लोकेई होरी मुल्खां केरो ज़ेरो अपने लेई राज़ो मग्गो। तैना अक एरो राज़ो चाते थिए ज़ै लम्मो ते शक्तिशाली भोए, ते ज़ै जंगी मां तैन केरि अगुवाई केरि सखे। परमेशरे तैन केरि बिनती पसंद न आई, पन तैनी तैन तेरो राज़ो दित्तो ज़ेरी मांग तैनेई कियोरी थी।