15. वादो कियोरो मुल्ख।

आखरकार तै वक्त एज्जी जेवरो थियो, कि इस्राएली लोक वादेरे मुल्ख, कनाने मां दाखिल भोन। तैस मुल्खे मां यरीहो नंव्वेरू अक नगर थियूं। ते तैसेरी हिफाज़तरे लेई तैसारे च़ेवरे पासन मज़बूत दीवार थी। ते यहोशूए दुई भेत घिन्ने बाले भेज़े। ते तैस नगरे मां रहब नंव्वेरी अक वेशया रहती थी। तैसां भेत नेनेबाले छ़पाए, ते फिरि तैसां बंच़नेरे लेई नगरे मरां निस्ने मां तैन केरी मदत की। तैसां एन एल्हेरेलेई कियूं किजोकी तै परमेशरे पुड़ विश्वास केरती थी। कि ज़ैस वक्ते इस्राएली लोक यारिहो नगरे नाश केरेले तैखन रहाब ते तैसारे परिवारेरे लोक बच़ाए गाले।

इस्रएली लोकन वादेरे मुल्खे मां दाखिल भोनेरे लेई यरदान दरिया पार केरनो थियो। ते परमेशरे यहोशू सीं ज़ोवं, “याजकन पेइले गांने दे।” ज़ैखन याजकेईं यरादने मां अपने कदम रखे त पानी बगनू रूकी जेवं, ज़ैस सीं कि इस्राएली लोक दरियारेरे होरी पासेरां शुकोरी ज़मीनी पुड़ च़ेलतां पार गेइ सखन।

तैन लोकेईं यरदन दरिया पर कियो त परमेशरे यहोशू सीं ज़ोवं, “यरीहो नगरे पुड़ हमलो केरनेरे लेई तियार रा, हालाकी तैन बड़ू तकतबार नगर थियूं। परमेशरे तैन लोकन सीं ज़ोवं, कि तैन केरे याजकन ते सेनाई 6 दिहाड़े नगरेरे च़ेवरे पासे चाकर लान। ते यजकेनईं ते सेनां एन्च़रे कियूं ।

तैखन सतोवं दिहाड़े, इस्राएली लोकेई तैस नगरेरे च़ेवरे पसन सत चक्कर लाए। तैन केरे सतोवं बार चक्कर लानेरे बाद, याजकेईं अपने नरशिंगे बज़ाए ते सेनां ज़ोर सीं जयकारे भरे।

तैखन यरीहो एरे च़ेवरे पसां केरि दीवार बिछ़ड़ी! ते ज़ेन्च़रे परमेशरे हुक्म दित्तोरो थियो, इस्राएली लोकेईं नगरेरी सैरी चीज़ां नाश की। तैनेईं रहब ते तैसारू परिवार छ़डू, ज़ैना इस्राएली लोकां केरो हिस्सो बनोरे थिए। ज़ैखन कनाने मां रानेबाले होरि लोकेईं शुनू, कि इस्राएली लोकेईं यरीहो नगर नाश कियोरूए, त तैना डेरी जे, कि इस्राएली लोक तैन्न पुड़ भी हमलो केरेले।

परमेशरे इस्राएली लोकन हुक्म दित्तोरो थियो, कि कनाने मां राने बैली केन्ची भी कौमी सीं शैनतरो समझोतो न केरथ। पन गीबोनी नंव्वेरी एक्की कनानी कौमां यहोशू सीं झूठ ज़ोवं, कि तैना कनाने करां दूर एक्की जिगारे रानेबालेन। ते तैनेंई सिं शैन्ती सीं रानेरो समझोतो केरनेरी अरज़ की। ते यहोशू ते इस्राएली केरे होरी अगुवाई केरने बालेईं परमेशरे करां न पुछ़ू, कि तैनेईं कुन कियोरू लोड़े। एन केरनेरे बजाए तैनेईं गीबोनी नंव्वेरी कौमी सीं शैन्ती सीं रानेरो समझोतो कियो।

ट्लाई दिहैड़ी केरे बाद, इस्राएली लोकन पतो लगो कि गिबोनी लोक कनाने मां राते थिए। तैना सेरकोए, किजोकी गिबोनी लोकेईं तैन्न धोखो दितोरो थियो। पन इस्राएली लोकेईं तैन्न सीं कियोरो शैन्तरो समझोतो बरकरार रख्खो। किजोकी तै तैनेई परमेशरेरे सामने कियोरो थियो। तैखन किछ वक्तेरां बाद, कनाने मां राने बाली अक कौम अमोरी केरे राज़ेईं शुनू, कि गिबोनेई इस्राएली लोकन सीं शान्ति समझोतो कियोरोए, एल्हेरेलेई तैनेईं अपनी-अपनी सेना अक केरतां अक बड़ी सेना बनाई ते गिबोने पुड़ हमलो कियो। ते गिबोनी लोकेईं अपनी मदत केरनेरे लेई यहोशू जो समाद भेज़ो।

ते यहोशूए इस्राएली केरि सेना अकोठी की ते गिबोन्न कां पुज़नेरे लेई तैना पूरी रात च़ले। ते झ़ेझां तैनेईं एमोरी केरि सेना हेरान की, ते तैन पुड़ हमलो कियो।

तैस दिहैड़ी परमेशर इस्राएली लोकां केरे लेई लड़ो। तैनी एमोरी घमरेइ छ़ाडे ते तैनी बड्डी-बड्डी आण बखेइतां बड़े एमोरी मारे।

परमेशरे दिहाड़ो भी अम्बरे मां एक्की जिगाई रोको ताकि इस्राएली लोकन पुरो वक्त मैल्ले, कि एमोरी लोकन पूरे तरीके सीं हरान। तैस दिहैड़ी, परमेशरे इस्राएली लोकन बड़ी ज़ींत दित्ती।

ते परमेशरे तैना सेनां हरानेरे बाद, बड़े कनानी कौमरे लोक इस्राएली लोकन पुड़ हमलो केरनेरे लेई अकोठे भोए। ते इस्राएली लोकेई तैन पुड़ हमलो केरतां तैना नाश किये।

इनां जंगां केरे बाद, परमेशरे इस्राएली हर गोट्ले वादेरे मुल्खे मां तैन केरो हिस्सो बन्टो। तैखन परमेशरे इस्राएली सेभी हदन पुड़ आराम दित्तो।

ज़ैखन यहोशू बुढो भोई जेव त तैनी इस्राएलेरे सब लोक एक्की जिगाई कुजाए। तैखन यहोशू तैन्न याद करावाते, कि तैनेई तैसेरे करारेरे हुक्म मन्नेरो वादो कियोरो थियो ज़ै परमेशरे तैन्न सीं सीनै पहाड़े पुड़ कियोरो थियो। त तैखन भी तैना लोकेईं परमेशरे सीं वफादार राने ते तैसेरे हुक्म मन्नेरो वादो कियो।