14. जंगले मां भटकनु।

परमेशरे इस्राएली लोकन तैना हुक्म ज़ोने ख़त्म किए, ज़ैना तैनेईं तैस करारेरे वजाई सीं मन्नेन, ज़ै परमेशरे तैन सीं कियोरोए। ते फिरि तैनी सीनै पहाड़े करां अग्रोवं तैन केरि अगवाई की। तै तैन वादेरे मुल्खे मां नेने चातो थियो। ज़ैस मुल्खेरू नंव कनान थियूं। परमेशर बिदलरारे थम्मे मां तैन अगरी-अगरी च़लो ते तैना तैस पतपती च़ले।

परमेशरे अब्रहाम, इसहाक ते याकूबे सीं वादो कियोरो थियो, कि ज़ैस मुल्खेरे बारे मां वादो कियोरो तै तैन केरे खानदाने देलो। पन तैस वक्ते तगर तैस मुल्खे मां बाकी कौमां रहती थी। तैना कनानी लोक परमेशरेरी आराधना न थिए केरते। ते तैसेरे हुक्म न थिए मानते। तैना झूठे देबतां केरि भागती केरते थिए ते बुरां कम्मां केरते थिए।

परमेशरे इस्राएली लोकन सीं ज़ोवं, “ज़ैखन तुस तैस वादेरे मुल्खे मां पुज़थ त तैठेरे सब कनानी लोकन करां छुटीकारो हासिल केरथ। तैन सीं समझोतो न केरथ ते तैन सीं रिश्तेदारी न बनेइयथ। तैन केरि सब मूर्ती नाश केरथ। ते अगर तुस मेरे हुक्म न मन्नेले, त तुस मेरे बाजाए तैन केरे देबतां केरि भागती केरने लागेले।”

ज़ैखन इस्राएली कनानेरे हदी मां पुज़े, त मूसा इस्राएली लोकां केरे 12 गोट्न मरां अक-अक मड़द च़ुनो। तैनी तैन हुक्म दित्तो कि गेइतां तैस मुल्खेरो भेत आना कि मुल्ख केरोए। तैनेईं तैन कनानी लोकां केरो भेत भी अंन्नो थियो कि हेरन तैना तगतबार या कमज़ोरन।

तैना 12 ज़ने कनान मुल्खे मांमेइं गेइतां 40 दिहैड़ू केरू सफर कियूं ते फिरी वापस आए। तैनेईं लोकन ज़ोवं, “तैस मुल्खेरी ज़मीन बड़ी फसदारे ते तैठेरी फसलां बेड़ी रोड़ीन!” पन दश भेत देने बालेई ज़ोवं, “तैनकेरी नागरां केरि दिवारां पैकी आन ते तैना लोक बड़े लमे ते ताकतबारन! ते अगर अस तैन पुड़ हमलो केरतम त पक्के तैना असन हारले ते असन मारेले।

पन कलेब ते यहोशुए भेत अंननेबालेईं ज़ोवं, “इन सच़्च़े कि कानानेरे लोक लम्मे ते तागताबरन, पन पक्के अस तैन हारेई बटतम! किजोकी इश्शो परमेशर इश्शे लेई लाड़ेलो!”

पन लोकेईं यहोशू ते कालेबेरी न शुनी। तैना लोक मूसा ते हारूने पुड़ सेरकोए ते ज़ोवं, “तुस असन इस मुश्किल जिगाई घिन्तां किजो एवरेथ? इश्शू मिस्रे मां रांनू ठीक थियूं। अगर अस तैस मुल्खे मां गातम त अस जंगी मां मारे गांनेम, ते कानानेरे लोक इश्शी लैड़ी ते बच्चन गुलाम बनाले।” ते तैना लोक इस्राएली लोकन दुबरां नेनेरे लेई अक होरो अग्वो च़ुन्नो चाते थिए।

ज़ैखन तैना लोकेईं इन ज़ोवं त परमेशर बड़ो सेरकोरो थियो। तै मिलापेबाले तेम्बु मां अव ते ज़ोवं, “तुसेईं मेरे खिलाफ गेइतां मीं सीं झ़कड़ो कियोरोए, एल्हेरेलेई तुसेईं जंगले मां भटकनू पेनूए। हर अक मैनू ज़ैसेरी उमर 20 साल या तैस करां जादे भोए तैड़ी मरेलो ते कधी भी तैस मुल्खे मां दाखिल न भोई बटेलो। ज़ै अवं तुसन देताईं। सिर्फ़ कालेब ते यहोशू तैस मां दाखिल भोले।”

ते ज़ैखन परमेशर एन ज़ोंतो शुनो, त तैना दुखी भोए किजोकी तैनेई पाप कियोरो थियो। एल्हेरेलेई तैनेईं कनानेरे लोकन पुड़ हामलो केरनेरो फैसलो कियो। मूसा तैन्न न गांनेरे लेई ठाकू किजोकी परमेशर तैन सीं साथी न थियो गांनो, पन तैनेईं तैसेरी न शुनी।

परमेशर इस जंगी मां तैन सीं साथी न थियो जेवरो, ते एल्हेरेलेई कनानेरे लोकेईं तैना हराए ते तैन मरां बड़े मारे। तैखन इस्राएली लोक कनाननेरां वापस मुड़े। ते 40 सालन तगर, तैना जांगले मां इरां-उरां भटकेले।

इस्राएली लोकां केरे 40 साल जांगले मां भटकनेरे दौरान परमेशरे तैन केरि ज़रूरतां पूरी की। तैनी तैन सुर्गेरां ज़ैस जो “मन्ना” ज़ोतन तै रोट्टी दिती। ते तैनी भेटर भी तैन केरे डेरन कां भेज़े ताके तैन केरे खानेरे लेई मास भोए। तैस पूरे वक्ते, तैन केरां लिकड़ां ते जुट्टी बूट न छ़िन्दोए।

इड़ी तगर कि परमेशरे तैन केरे लेई चमत्कारे सीं चट्टानी मरां पीने जो पानी भी कढू। पन एन सब भोनेरे बावजूद भी, इस्राएली लोक परमेशरेरे खिलाफ ते मूसेरे खिलाफ भोए ते कूड़कुड़ाने लगे। फिरी भी, परमेशर वफादार थियो। तैनी ज़ै वादो कियोरो थियो, कि तै अब्रहाम, इसहाक ते याकूबेरे खानदानेरे लेई केरेलो तैन तैनी कियूं।

एक्की वक्ते ज़ैखन तैना लोकन कां पीने जो पानी न थियूं, त परमेशरे मूसा सीं ज़ोवं, “चट्टानी हुक्म दे, ते तैस मरां पानी निसेलू।” पन मूसा चट्टानी हुक्म न दित्तो, पन तैनी चट्टानी पुड़ लैठी सीं बाई। ते एन केरतां तैनी परमेशरेरी आदर न की। सेभी केरे पीनेरे लेई पानी चट्टानी मरां त निस्सू, पन परमेशर मूसा पुड़ सेरकोव, तैनी ज़ोवं, “किजोकी तीं इन कियोरूए, एल्हेरेलेई तू वादेरे वादेरे मुल्खे मां दाखिल न भोइ बटेलो।

ज़ैखन इस्राएली लोकां केरू 40 साल जंगले मं भटकनु पूरू भोवं, तैखन ज़ैना परमेशरेरे खिलाफ भेवरे थिए ते तैना सब मेरि जेवरे थिए। ते तैखन परमेशरे तैना वादेरे मुल्खेरी हदी तगर पुज़ाए। हुनी मूसा बड़ो बुढो भोई जेवरो थियो, एल्हेरेलेई परमेशरे लोकां केरि अगुवाही केरनेरे लेई तैसेरी मदत केरनेरे लेई याहोशु च़ुनो। परमेशरे मूसा सीं ई वादो भी कियोरो थियो, कि एक्की दिहाड़े तै तैन कां मूसेरो ज़ेरो अक नबी भेज़ेलो।

तैखन परमेशरे मूसा एक्की पहाड़ेरे च़ोटी पुड़ गांनेरे लेई ज़ोवं, ताकि तै वादेरे मुल्खे हेरी सके। मूसा तै वादेरो मुल्ख लाव, पन परमेशरे तैस तैस मुल्खे मां गांनेरी अजाज़त न दित्ती। तैखन मूसा मेरि जेव, ते इस्राएली लोकेई ट्लाइ दिहाड़ान तगर शोग मनव। ते यहोशू तैन केरो नंव्वो अगुवाही केरनेबालो बनी जेव। यहोशु अक रोड़ो अगुवो थियो। किजोकी तैनी परमेशरे पुड़ भोरोसो कियो ते तैसेरी गलां मेन्नी।