13. इस्राएली लोकन सीं परमेशरेरो करार।

इस्राएली लोकन लाल सुमान्दरे करां पर नेनेरां बाद, परमेशरे तैना जंगले मंमेंई भोइतां सीनै पहाड़ेरे पासे च़लाए। एन तैन्ने पहाड़ थियूं ज़ैड़ी मूसा ज़लतू झ़ैलोवं लहोरू थियूं। ते तैना लोकेईं अपने डेरे तैस पहाड़ेरे बुन खड़े किये।

परमेशरे मूसा ते सेभी इस्राएली लोकन सीं ज़ोवं, “तुसेईं हमेशा मेरी गल मन्नीए, ते ज़ै करार अवं तुस्न सीं केरताई तै बनोरो रखनोए। अगर तुस एन केरतथ, त तुस मेरू इनाम ते कीमती धन, याजकां केरू राज़, ते पवित्र ठेरेले।”

ते तैना लोकेईं परमेशरे कां एजनेरे लेई अपनो आप तियार कियो। तैखन परमेशर सीनै पहाड़ेरे चोटी पुड़ जो ओसो। ज़ैखन तै अव त बुनज़ल अव, बिजली चमकी, तू लेहीयोव, ते बड़े ज़ोरे सीं नरशिंगां केरि आवाज़ भोई। ते तैखन मूसा एप्पु पहाड़े पुड़ जेव।

तैखन परमेशरे इस्राएली लोकन सीं करार कियो। तैनी ज़ोवं, “अवं तुश्शो परमेशर यहोवा आईं। अव्वें आईं ज़ैनी तुस मिस्रेरे गुलैमी करां छुटेवरेथ। ते तुस कोन्ची होरि देब्तेरी भगती न केरथ।"

“मूर्ती न बनेइयथ ते तैन केरि भागती न केरथ, किजोकी अवं योहवा, तुश्शो अक्के परमेशर आईं। ते मेरे नंव्वेरो गल इस्तेमाल न केरथ। ते आरामेरी दिहाड़ी मनानी याद रेखथ। बाकी दिहाड़न मां अपनु सारू कम केरथ। ते सतोवं दिहाड़ी तुशशे लेई आराम केरनेरी, ते मीं याद केरनेरी दिहाड़ी भोली।”

“अपने अम्मा ते बाजी केरि आदर केरथ। खून न केरथ। बदमाशी न केरथ। च़ोरी न केरथ। अपने पड़ोसेरी लाड़ी, तैसेरू घर, या तैसेरे कोन्ची भी चीज़रू लालच़ न केरथ।

तैखान परमेशरे इन दश हुक्म घोड़ेरे स्लेटी पुड़ लिखतां मूसा कां दित्ते। परमेशरे मन्नेरे लेई इस्राएली लोकन होरे भी बड़े हुक्म दित्ते। अगर तैना लोक तैना हुक्म मन्न त परमेशरे तैन बरकत देलो ते तैन केरि हिफाज़त केरनेरो करार कियो। पन तैनी ज़ोवं, कि अगर तैनेईं एैना हुक्म न मन्ने त तै तैन्न सज़ा देलो।

ते परमेशरे इस्राएली लोकन अक बड्डो तेम्बु बनानेरे लेई भी ज़ोवं। तैनी तैन ठीक-ठीक ज़ोवं, कि एह तेम्बु केन्च़रां बनानोए, ते तैस मां अन्तर कोनां चीजां रेखनिन। तैनी तैन्न तै तेम्बु दुई हिस्सन मां केरनेरे लेई अक्क बड्डो पड़दो बनानेरे लेई भी हुक्म दित्तो। ते परमेशर तैस पड़देरे पेत्रींए हिस्से मां एजेलो ते तैड़ी रालो। ते ज़ैड़ी परमेशर थियो तैड़ी गांनेरी इजाज़त सिर्फ महायाजके थी।

परमेशरे हुक्म दित्तोरो थियो, कि मिलापे बाले तेम्बेरे सामने अक वेदी बनाई गाए। ते कोई भी ज़ैस करां परमेशरेरो हुक्म ट्लूटी गए तै तैस वेदी पुड़ अक जानबर बलिदान केरनेरे लेई आने। तैखन याजक तैस बली केरेलो। ते वेदी पुड़ परमेशरेरे सामने बेलारे रूपे मां फुकेलो। ते परमेशरे ज़ोवं कि तैस जानबरेरो खून तैस मैनेरे पाप ढकेलो। ते एस तरीके सीं हुनी परमेशर तैसेरे पाप न हेरेलो। तै मैनू परमेशरेरे नज़री मां “शुद्ध” ठेरेलो। परमेशरे मूसेरो ढ्ला हारून ते तैसेरे खानदानेरे मड़द अपने लेई याजक भोनेरे लेई च़ुन्ने।

परमेशरे तैन लोकन ज़ैना कानून दित्तोरे थिये, तैना तैन मन्नेरे लेई राज़ी भोए। तैनेईं सिर्फ परमेशरेरे लोक भोनेरे ते सिर्फ तैसेरी भागती केरनेरे लेई राज़ी भोए।

कई दिहाड़न तगर मूसा सीनै पहाड़े पुड़ राव। तै परमेशरे सीं गलबात केरि राहोरो थियो। पन लोक तैस बलगते-बल्गते थेकी जे। ते एल्हेरेलेई तैना हारूने कां सोन्नू घिन्तां आए, ते तैस जो ज़ोवं, कि अक मूर्ती बना, ताकि तैना परमेशरेरे बजाए तैसारी भागती केरन। ते एन्च़रे, तैनेईं परमेशरेरे खलाफ़ बड़ो पाप कियो।

हारूने बछ़ड़ेरे शकली मां अक मूर्ती बनाई। ते तैना मैनेईं तैसरी भागती केरनी शुरू की। ते तैस कां बली चाड़ी! तैनकेरे पापरे वजाई सीं परमेशर तैन्न पुड़ सेरकोरो थियो। तै तैन्न नाश केरने चातो थियो। पन मूसे परमेशरे कां प्रथना की, कि एन लोकन नाश न केर। ते परमेशरे तैसेरी प्राथना शुनी ते तैना नाश न किये।

ते आखिरकार मूसा सीनै पहाड़े पुड़रां बून अव। तै तैना घोड़ां केरि दुई सलेटा़ घिन्तां एवरो थियो, ज़ैन पुड़ परमेशरे दश हुक्म लिखोरे थिए। तैनी तै मूर्ति लही। तैस एत्री सरक आइ कि तैनी तैना सलेटां ट्लोड़तं तैन केरो चुरो बनाव।

फिरि मूसा तै मूर्ती भी पीहतां तैसरो चूरो बनाव, ते तै चूरो पैनी मं मलेइतां इस्राएली लोकन पियाव। ते परमेशरे तैन लोकन पुड़ अक सज़ा भेज़ी ते तैन मरां बड़े लोक मरे।

ते ज़ैना सलेटां मूसे टलोड़ोरी थी तैनकेरे लेई मूसे घोड़ां केरि नेव्वीं सलेटां बनेई। ते तैखन तै फिरी पहाड़े पुड़ जेव ते प्राथना की, कि परमेशर तैन लोकन माफ़ केरे। परमेशरे मूसेरी शुनी ते तैन माफ़ कियूं ते मूसा नेव्वीं सलेटन पुड़ दश हुक्म घिन्तां पहाड़े पुड़रां उन्ढो अव। ते फिरि परमेशरे सीनै पहाड़े करां ते वादेरे मुल्खे तगर इस्राएली लोकां केरि अगुवाई की।