12. निर्गमन

इस्राएली लोक मिस्रे मरां निस्तां बड़े खुश थिए। हुनी तैना गुलाम न थिए, ते तैना वादेरे मुल्खे मां जो च़लोरे थिए! ज़ैन किछ भी इस्राएली लोकेईं मग्गू, मिस्री लोकेईं तैन सब इस्राएली लोकन दित्तू, इड़ी तगर कि सोन्नू चांदी ते होरि भी कीमती चीजां। होरि मुल्खां केरे किछ लोकेईं परमेशरे पुड़ विश्वास कियो ते ज़ैखन इस्राएली लोक मिस्रे मरां निस्से त तैना भी तैन्न सीं साथी निस्से।

दिसां त बिदलरारो अक थम तैन अगरी-अगरी च़लतो थियो। ते राती तै अगारो थम बनतो थियो। परमेशर ज़ै बिदलार ते अगारे थम्मे मां थियो, हमेशा तैन्न सीं साथी थियो ते तैनी सफरे मां तैन केरि अगवाई की। तैनेईं सिर्फ एत्रु केरनू थियुं तैस पत्ती च़लू थियूं।

थोड़े वक्तेरां बाद, फिरौन ते तैसेरे लोकेईं अपनो मन बदलो। तैना इस्राएली लोकन फिरी अपने गुलाम बनाने चाते थिए। ते एल्हेरेलेई तैनेईं इस्राएली केरो पीछो कीयो। ते परमेशरे तैन केरे मन बदलोरे थिए। तैनी एन एल्हेरेलेई कियूं किजोकी तै चातो थियो कि हर कोई इन ज़ाने कि फिरौन ते मिस्री केरे देबतन करां यहोवा परमेशर, जादे शक्तिशलीए।

ज़ैखन इस्राएली लोकेईं मिस्ररेरी सेना एइती लाई त तैन पतो लगो, कि एह फिरौनेरी सेनाए ते हुनी अस लाल समुन्द्र कां फेसी जे। तैना बड़े डरे ते लेरां देने लगे, “असां मिस्रे मरां किजो आए? असां मरने बालेम!”

मूसे इस्राएली लोकन सीं ज़ोवं, “डरा न! परमेशर अज़ तुश्शे लेई लड़ेलो ते तुस्न बच़ालो।” तैखन परमेशरे मूसा सीं ज़ोवं, “एन लोकन लाल समुन्द्रेरे पासे अग्रोवं गांनेरे लेईं ज़ो।

तैखन परमेशरे तै बिदलरारो थम मिस्री ते इस्राएली लोकां केरे मझ़ाटे खाड़ो कियो, ताकि मिस्री लोक इस्राएली लोकन लेही न बटन।

ते परमेशरे मूसा जो ज़ोवं, “समुनद्रेरे पासे अपनो हाथ अग्रोवं केर।” फिरि हवाई सीं परमेशरे समुन्दरेरे पैनेरे दुई हिस्से किये, ताकी इस्राएली लोक पार गेई सकन।

ते इस्राएली लोक अपने दुइये पासन पैनेरी दीवरन सीं साथी शुकोरी ज़मीनी पुड़ पार च़ले जे।

तैखन परमेशरे बत्ती मरां तै बिदलारारो थम खड़ो कियो, ताकि मिस्री लोक इस्राएली लोकन समुन्द्रे मांमेइं गांते लांन। ते मिस्री लोकेईं तैन्न ट्लनेरे लेई तैन्न पत्ती गांनेरो पैसलो कियो।

ते तैना स्मुन्द्ररे माझ़मेंई तैस बत्तां इस्राएली लोकन पत्ती खत्ते, पन परमेशरे मिस्री केरे मने मां घमरवट छ़ड्डी ते तैन केरे रथ अड़काए। ते तैना चिन्डां मैरतां ज़ोने लगे, “नशा! इस्राएली केरे तरफां परमेशर लड़ने लगोरोए!”

सारे इस्राएली समुन्द्रेरे दूइयोवं पासे पुज़े। तैखन परमेशरे मूसा सीं ज़ोवं कि तै फिरि पैनी पुड़ अपनो हाथ अग्रोवं केरे। तैखन मूसे तेन्च़रे कियूं, त पानी मिस्री सेनाई पुड़ अव ते समुन्द्रेरू पानी तेन्च़रे भोवं ज़ेन्च़रे पेइलू थियूं। ते सारी मिस्री सेना डुबतां मेरि जेइ।

ज़ैखन इस्राएली लोकेईं हेरू कि मिस्री मेरि जेवरे थिए। त तैनेईं परमेशरे पुड़ विश्वास कियो। तैनेई विश्वास कियो कि मूसा परमेशरेरे तरफां नबी थियो।

इस्राएली लोक भी बड़े खुशी थिए, किजोकी परमेशरे तैना मरने ते गुलाम भोने करां बंच़ेवरे थिए। हुनी तैना परमेशरेरी आराधना केरने ते तैसेरे हुक्म मन्नेरे लेईं आज़ाद थिए। इस्राएली लोकेईं अपने अज़ैदरू तिहार मनानेरे लेई ते परमेशरेरी तारीफ़ केरनेरे लेई भजनां ज़ोअं। किजोकि तैनी तैना मिस्रेरी सेनाई करां बंच़ेवरे थिए।

परमेशरे इस्राएली लोकन हर साल अक तिहार मनानेरो हुक्म दित्तो। इन याद केरनेरे लेईं कि केन्च़रे परमेशरे मिस्री हराए ते तैना गुलाम भोने करां आज़ाद किये। ते एस जो फसह तिहार ज़ोवं जेवं। एस मां तैनेई तिहार मन्नेरे लेईं अक गबड़ू बली केरनू थियुं, ते तैन बीगैर खमीरे बैली रोटी सीं साथी खानू थियूं।