11. फसह तिहार।

परमेशरे मूसा ते हारून फिरौने कां इन ज़ोने भेज़े, कि इस्राएली लोकन आज़ाद भोइतां गांने दे। ते तैनेईं तैस खबरदारी दित्ती, कि अगर तै गांने न देलो, त परमेशर मिस्री लोकां केरे ते जानबरां केरे सब ज़ेठे बच्चे मारेलो। ते फिरौने इन शुन्तां भी परमेशरेरी गल शुन्ने करां ते तैस पुड़ विश्वास केरने करां इनकार कियूं।

परमेशरे तैस पुड़ विश्वास केरनेबाले लोकां केरे लेई अक इंतज़म कियो, कोन्चेरू भी बड्डू मट्ठू न मरे। हर परिवारे अक निर्दोश गबड़ू बली केरनू थियूं।

परमेशरे इस्राएली लोकन तैस गबड़ेरो खून अपने घरां केरे दरान पुड़ लानेरे लेई ज़ोवं। तैनेई तैसेरू मास भूज़नू थियूं। ते फिरि तैनेईं खमीरे बगैर रोटी जल्दी खानी थी। ते तैनी तैन खानेरे बाद अकदम मिस्रे मरां निसनेरे लेई तियार रांनेरे लेई भी ज़ोवं।

ज़ैन केरनेरो परमेशरे इस्राएली लोकन हुक्म दितोरो थियो, तैनेईं तैसेरे मुताबक सब किछ कियूं। ते अध्धी राती, परमेशर हर ज़ेठे बच्चे मारतो मारतो मिस्र मुल्खे मांमेइं निस्सो।

इस्राएली केरे हर एक्की दारे पुड़ खून लगोरो थियो, एल्हेरेलेई परमशरे तैना घरां छ़ड्डां। तैन मां सब लोक हीफ़ज़ती सीं राए। तैना गबड़ेरे खूने सीं बंचोरे थिए।

पन मिस्री लोकेईं परमेशरे पुड़ विश्वास न कियो। ते तैनेईं तैसेरो हुक्म न थियो मन्नोरो। ते एल्हेरेलेई परमेशरे तैन केरां घरां न छ़ड्डां। परमेशरे मिस्री केरे हर इक्की घरे मां बड्डू मट्ठू मारू।

कैदी केरे बड्डे मट्ठे करां, फिरौनेरे बड्डे मट्ठे तगर, हर अक बड्डू मट्ठू मेरि जेवं। अपने बड़े दुखेरे वजाई सीं मिस्रेरे बड़े लोक लेरां लगोरे थिए देने ते मातलम लगोरे थिए मन्नाने।

ते तैसे राती फिरौने मूसा ते हारून कुजाए ते तैन सीं ज़ोवं, “इस्राएली लोकन जल्दी नेथ!” ते मिस्रेरे लोकेईं भी इस्राएली लोकन जल्दी निसनेरे लेईं गुज़रिश की ।