9. ዬሪ ሙሴይስ ጼጉ

ዮሴፒ ሀይቁ ጌሽን ይ አሥንዲ ባ ካንጊ ጊብጽቃን ቶክሲ ይስቴንድ። ኢሣይቅኒንድ ⶦዳጋ ቤርግ ይቃን ይስቴንዴ። ⶦዳጋ ንያእንዲንድ ዬይሲ ኢስራኤል አሥንድ ማስቲ ጼስቲ ይስቴንዴ።

ⶦድ ባል ቤርግንድ ይስቲ ኢሣይቅን ፕያዲ ቃጽ ቤሹ፤ ጊብጽ አሥንዲ ዮሴፒ ኢሣይቅኔሽን ኡካርኒ ጋሥኑⶢስ ካንግ ብያቴንዴ። ኢስራኤል አሥንድ ፕያዲ ጌቢ ቤሺ ሀንቂ ይስኩⶢስ ቤቅንሲ ጊብጽ አሥንዲ ቃጽ ሼርቄንዴ። አባ ኡⶣም ጊብጽ ዶድ ቶሕን ትያትንሲ ይስቱ ፓሮኒ ኢስራኤል አሥንዲስ ቃም አሢ ጎቱ።

ጊብጽ አሥንዲ ኢስራኤል አሥንዲስ ንያላም ኬት ጊጻሲ ካታምንድ ኢሣይቅኒ ቃይጽንሱዌሽን ጊዳም ኢሥ ጋባራሴንዴ። ኢስራኤል አሥንዲ ኤዝ ኤዝ ቃይጽንዲስ ቃይጺ ሶይሲ ኢራትኔንድ። ይ ፔታስን ዬሮሥንዲ ኢሣይቅን ዲሪ ⶦዳጋ ንያእንዲስ ኢሣይቅኔሽን ኡሡዌ።

ፓሮኒ ኢስራኤል አሥንዴሽን ⶦዳጋ ንያእንዲ ይስኩⶢስ ቤቁ። ኡⶣም ፓሮኒ ኢስራኤል እያን ንያኢ ዬይሳባን አባይ ሶእቃን ቦስቲ ሀይብምሱዌሽን ቲዛዝ ኡሡዌ።

ኡⶢ ኤስ ፔታንቂ ይስታጉⶥ ኢስራኤል ማይና ማጣ እያን ንያኢስ ዬሌን። ውሲንድ ባ ኬት ባባ ባና ባ ንያአ ኡⶢስ ካዝ እያፕ አቼንድ።

ኢሣይቅኒንድ ኡⶣጋ ዴብም ባ አችንሱ ሀካርጉ ሺዳንቂ ሶእ እያርስንሳርጉ ሳንት ሀይሲ ይቃን አርⶣ ኡⶥ ይሥንሲ አባይ ሶእ ጌⶭን ይስኩ ሳንቃን ይሥንሲ ሶእ ዴብም ቲሤንድ። ይ ሚቻ ይ አፓርቅኔና ሀራጊ አርⶣ ኡⶥ ዴብም አትንሳን ቤቅና ይ ቢራ ጉድና ዎብታ ይስቴኔ።

ፓሮናጋ ናማ ሳንታ ኡⶢስ ቤቅንሳ ይ ጎብቃን ሀራጊ ይስታን ቤቅና ኖታጉⶥን ንያአ አርሺ ይቃን ይስትን ቤቄን። ውሲንድ ኤታ ሀንቃ ባ ንያእ አሤን። አርⶣ ኡⶢስ ባምም ቃምሴን ኢስራኤል ማይና ማጤሽን ጊዝ ቆጻ ቃምሤኔ። ውሳ ውስን ጊዝ ቃጻ ቃምሣ ይስቴና ናንሣ ኡⶢስ ዬሌን ይ ባይ ፔቱⶢስ ኤራርጉⶣን ይስቴኔ። አርⶣ ኡⶥ ባያ ይ ቃንቃ ይስቴና ኢቂ ጥያም ይሲ ሺቻጉⶥንኤታ ሀንቃ ፓሮን ናሜሽን ካርሳ ኡሤን። ኡⶣም ፓሮን ናማ ይሱሚስ «ሙሴ» ማካ ሱምሤኔ።

ማጥን ጎቅን ሙሴይ ባ እጉ ጌሽን ጊብጽ አሣ ማጢ ኢስራኤል አሢስ ዴክኒ ይስትን ቤቁ። ይሲንድ ባ አሥ ፔቱⶥ ኢስራኤል አሢስ ፕያሥኒ ካፕሙ።

ሙሴይ ኤራሲ ባ ቤቃርጉዌ ማኪ ታሥንሲ ጊብጽ አሣ ኡⶢስ ዎጢ ዱኩዌ። ይ ፔታስን ሙሴይ ቃይጹⶢስ ማጣጋ አሢ ቤቅንሲ ይስቱዌ።

ሙሴይ ቃይጹⶢስ ፓሮኒ ሲስክንሲ ይ ዎጥኒ ኩዩ። ኡⶣም ሙሴይ ፓሮን ዎታዴርንድ ኩችካን ባ ካሥ ፕያሥንባኑዌሽን ዶንቲ ጊብጽቃን ይስቲ ዶዳ አሢ ይስን ቶካርጉⶥን ኮልን ባኢ ሀንቁዌ።

ሀካጋ ዶዳ ምድያም ማስቲ ይስኩⶥን አቲ ሙሴይ ዶር ኪምናስ ፔቱ። ዶዳ ኡⶥን ማይን እያርሲ ናም እያን ንያእ ዬይሱዌ።

ማጥን ጎቅን ሙሴይ ባ ማች ባህ ዶር ኪንቂ ይስታጉⶥን ጉዳጋ ባስን ኩእቃን ታማ ሳንቂ ይስኩⶢስ ቤቁ። ይ ፔታስን ጉአ ኡⶢ ቡንቃርጉⶣን ይስቱዌ። ሙሴይ ፒካሲ ቤቅኒ ኩአ ኡⶥ ዳድን ዬኢ ሺኩ። ሳንቂ ይስኩ ታም ዳድን ይሲ ሺካጉⶥን ዬሮሥንድ ካሢ «ዎ ሙሴዎ! ኔና ይስን ይጥንሳ ይስኩⶥ ኩሢ ሀናስ ፔቱኡዌሽን ኒ ቶእቃኑⶥ ጫማ ጋዞ!» ማኩ።

ካሲ ዬሮሥንዲ፣ «ታ አሥንዳጋ ኢራትስ ታ ቤቁዌ። ኒይስ ፓሮን ዳድን ዎሳ ታ ቲሥንሱዌ፤ ኔኒንድ ኢስራኤል አሥንዲስ ጊብጽ ቃም ኬትካን ይሣ ኔ ኬስንሱዌ። አብርሃሜሽና፥ ይስሀቄሽና፥ ያይቆቤሽና ታሥ ኡሣ ታ ሀይጤን ካናአን ዶዲስ ኢሣይቅኔሽን ኡሥንታኑዌ« ማኪ ይስን ሀይጡ።

ሀማጊ ኢስራኤል አሥንዲ «ኦናጊ ኒ ዎሲ ቲሣዴዎ? ማኪ ታ ኦጫን ኦናጊ ታ ዎሱዌ፣ ማካ ኢሣይቅኔሽን ታ ሀይጥንሱዌዎ?» ማኪ ዬር ኦጩ። ዬሪ ሙሴን «ታና ይስኩⶣ ይስትንሱⶣ ጊዛዎ! ይስኩⶣ ይስትንሱⶣጊ ታ ዎሲ ቲሡዌ ማካ ሀይጦ» ማኩ።

ሙሴይ ባ ሼርቁዌሽን ፓሮን ዳድን ሀምሚ ኮያርጉዌ። ይሲንድ ጋሂስ ጋሀ ታና ሀካርጉⶣ ጊዛዎ ማኪ ታሢ ይስቱ። ኡⶤሽን ዬሪ ሙሴ ኢቻ አሮኒ ይስን ጋሥኒ ይያ ባና ሀምምሱዌሽን ሀይጢ ቲሡ። ዬሮሥንዲ ሙሴያ፥ አሮናዬሽን ፓሮን ማይስ ባ ዱጻስንሱⶥ ፔቱⶢስ ኬንዛሲ ሀይጥንሲ ባ አሥንዲስ ይሲ ፖንሥንሱዌሽን ዎሲ ቲሡዌ።