50. ዬሱሲ ካርቲ አትንሱዌ

2000 ቤርግ አትንሱⶥ ዶድ ቶሕኑⶥ አሢ ዬሱሲ ዬር ናንሥ ፔቱⶣ ይሲ ፕያሣጉⶣይስ ሲስኪ ይስቱዌ። ኡⶢ ጊባትኔንዳ፥ ቤታክርስትያናይ አኪ ኢቂ ይስቲ ዎይንቴን ሀⶥን አቱዌ። ዬሱሲ ዶዳጋ አብ ውርን ካርታ ባ አትንሱⶥ ጋሂስ ታሥ ኡሢ ሀይጥንሲ ይስቱዌ። ይሲ ባ አታጉ ሀክ ታሥ ኡሣ ባ ሀይጡⶥ ጋሂስ ባቅንሡዌ።

ዬሱሲ ካርቲ አትንሱⶢስ ባቂ ኒኒ ይስትን ዬሪ ሀናስ ፔቱⶣ፥ ይሲ ይያም ዎብስንሱ ቦዳም ኒኒ ይስትንሱዌሽን ኮዪይ ይስኩዌ። ካሲ ይ ካዥ ሀይጢ አሥንዳ ዱማርንዴሽን ኒኒ ሀይጥንሱⶢንድ ኮዪይ ይስኩዌ። ዬሱሲ ዶድ ዴብም ባና ይስቱ አባም «ካዥ ሀይጣ ሀⶢ ዶድ ቶሕን ካንግ ሀይጣስንሱዌ፣ ኡⶥ ጌሽናን አባጋ ውሪ አትንሱዌ!» ማኪ ሀይጡዌ።

ⶦዳጋ አሥንዳ ባ ዛራም ዛራሜንዲ ጋሥ ዬሱሲ ፕያሢ ይስኩⶢስ ሲሳርጌንዴ። ዬሱሲ ጋሥ ሀይቅን ጫርቃን ካርታ ባ ሀማርጉ አፓርቅን ካዥ ሀይጣ ሀⶢስ ሲስርጌንዴሽን ኢሣይቅኒ ሀይጥንሱዌሽን ባ ማⶥ ንያእንዴሽን ሀይጡዌ። ይሲንድ፣ «ኤስን ሀⶥ ሀንቂ ዶድ ቶሕን ይስኬንዴሽን ካንግ ታ ሀይጣ ሀⶢስ ሀይጢ ታ ዳባጌንድ ኢሣይቅን አሥንዴ!» ማኩ። ካሲ «ሙእ አፓ አርስትንሱⶢ (ትስንሱⶢ) ⶦዳ ጊዝዎ!» ማኩ።

ካሲ ዬሱሲ «ቃሚ ባ ትያቴሽን ቤሽንሳርጉዌ፤ ዶዳ ሀⶥ ዴብም ይስኬንድ ኡካርንዲ ታ ኩርቃ ባ ኢቹⶦጥን ታ ናባም ይንታይቅን ኢራታስንሴንዴ፣ ይንታይቅን ዎጥንሴንዴ፤ ዎሳሳጎን ይንታይቅን ዴብም ኢራቲ ቤሻስን ሼራሺዲ ዞልንዴ! ታና ዶዳ ሀⶥ ጎቲ አሂ ይስኩⶥ ሼጣኒስ ጋምሥታኑዌ። ይንታይቅኒ ታሐም ጊባትኒ ይ ውር ሀክ ዞላጊንታን ኡⶣም ዬሪ ይንታይቅን ፕያሥንሱዌ።

ዬሱሲ ዶዳጋ አብ ውሪ አትናጉⶥን አሣጋ ዴብም አትንሱⶥ ጋህ አምሢስ ባ ማⶥ ንያእንዴሽን ሀይጡዌ። ኡⶥ ይሲንድ፣ «ማጣጋ አሢ ባ ካምም ሶያጋ ዛሪስ ቦኩዌ። ይሲንድ ሱርቅንሲ ይስታጉⶥን ይ ጋግናሲ አቲ ቴንጳ ይሲ ቦኩⶥ ዴብም ዬሻን ማስቲ ይስኩ ኢታጋ ዛሪስ ቦክንሲ ሀንቁዌ።

«ቦስቱⶥ ቴንጵ ዛሪ ጶቃጉⶥን፣ ናሲ ቃይጻስንዲ ይ ዳድን አቲ፣ ‘ዎ ትያቶ! ሶይ ዛራን ኒኒ ቦኩዎዳ፣ ሀⶥ ይ ጎብቃን ዬሻኒ ጶቂ ይ ቆጣንቁዌ! ሀርቃን ይስትያን አታዴዎ?’ ማኪ ኦጬንዴ። ይስንድ፣ «ጋግናሳጊ ኤቲ ዬኢ ቦኩዌ» ማኪ ኢሣይቅኔሽን ሀይጡ።

ካሲ ይ ቃይጻስንዲ ባ ትያቴሽን፣ «ዎስ ኢታጋ ዛራ ኡⶢስ ኑና ጎⶤ!» ማኬንድ። ትያት ይሲንድ፣ «ኡⶢ ፔትንሳርጉዌ፣ ሀማጊ ዬሻኒስ አጣጊንታን ቴምጲንድ ይያም ፓሺአጥንሲንቱዌ፤ ቴምጲ ኮሊ ቲሳጉ ሀክ ፓሽትኒ ኤሲ ይስትማኬ፤ ትንታጋ አቢ አትናጉⶥን አፓርቅን ዴሣሲ ዬሻኒስ አጢ ዱብዳሲ ታማም ክያብምሲንቱዌ፤ቴምጲስ አኪ ይ ጎትንቃን ይሥንሲንቱዌ» ማኪ ሀይጡዌ።

ይ ማⶥ ንያእንዲ ጋሀ ኡⶢስ ዬሱሲ ሀይጥን ባ ሲስኩⶣም ይ ፖርሺ ኢሣይቅኔሽን እያርዳርጉዌ፤ ኢሣይቅኒንድ ይሲ ይ ፖርሺስ ሀይጥንሱዌሽን ይ ኦጬንድ። ኡⶣም ዬሱሲ፣ «ሶይጋ ዛሪስ ቦኩⶢ ማስሀ ጊዝዎ። ዶዳ ይስን ይ ቦስቱⶥንድ ዶዳ ሀⶣጊዚዎ። ሶያጋ ዛራ ኡⶢ ዬራጋ ሀይጣ ዬሪ አሥ ቶሕን ትያትንሱⶣ ጊዝዎ» ማኩ።

ቃዝቂ «ኢታጋ ዛራ ዬሻኔ ማስቱⶢ ዶዳ ሀⶥ ቶሕን ይስኬንድ አሥንዳ ጊዚዎ። ዛራ ኡⶢስ ቦኩⶢ ጋግናሳ ሼጣና ጊዝዎ። ሙእ ዛራ ኡⶢ ይያም ቲስንሱⶢ ዶዳጋአብ ውርና ጊዝዎ። ቲሲ አክንሴንዴ ዬርጋ ዎሳስንዳ ጊዝዎ» ማኩ።

ካሲ ቃዝቂ፣ «ዶዳጋ አብ ውርን ዬር ዎሳስንዲ ሼጣናጋ ሀስ ፔትንዳ፥ ይ ኢንግንዳይስ ካንግ አፓርቅን ዴሣሲ አኪ ማጥን ዱብዳሲ ኢሣይቅኒ ይቃን ቡቅንሱⶥሺውር ታምቃን ቦክንሱዌ። ኢሣይቅኒንድ ኬኢ፣ ባ ካሽ ትያኢ፣ ኢዛጋ ኢራታም ኢራትንሴንዴ። ኡⶣጋ አባም ጊባትንሲ ይስኬንድ ሶይናስንዲ ባ ባባ ዬራጋ ጫር ባስካን ኦባርን አፖጥን ሳምሴንዴ!» ማኩ።

ካሲ ቃዝቂ፣ «ዬሱሲ አባጋ ውሪ ጋሥ አታርጉⶥ አፓርቅን ካርታ ባ ውንሱⶢስ ሀይጡዌ። ሀይቅን ጫርቃን ባ ሀንቁⶢዎጥን አትንሱዌ። አሦጥን አⶭ ማእንሲ ይስትንሱዌ።? ሀይቅን ጫርን ዱልዱላም አትንሱዌ። ዬሱሲ አትናጉⶥን አሣ ሀይቁⶢ ባ ማጥማጣም ዎጥቃን ዶንትንሡዌ። ክርስትያኒንድ ዬራጋ ኡⶫርን ድያምሱዌ።

ኡⶣም ጎቅንሀይባርጌንድ ካሣም ፕያጺ ይስኬንዲ አፓርቅን ዴሣሲ ቂምጪ ኖትካን (ⶹድ ቆጥቃን) ባ ቦሚ ኤስቲ ሀምም ካሲ ዎጥቃን ዶንቴንድ ኪርስትያንዲ ኢሣይቅና ባና ባ ሳቅንሴንዴ። ኡⶣም ባ ካንጊ ዬሱሳ ባና ፔትንሴንዴ። ኡⶣጋ ጌሽን ዬሱሲ ኪርስትያንድ ፔቴንድ አሥንዳ ባና ሶያማ ማጥ አታማ ካንግዎይን ይስትንሱዌ።

ዬሱሲ ይያም ጊባትኒ ይሴክንዴሽን ካንግ ፕያጻጋ ኡኪስ ባ ኡሥንሱዌሽን ታሥ ኡሡዌ። ኢሣይቅኒንድ ውርስንሲ ይስኩⶥ ሶያማ፥ ዲጋማ ዬራ ባና ካንግዎይናም ሀክ ይስትንሴንዴ።

ይ ፔታስን ዬሪ ዬሱሳም ጊባትናርጌንድ ዴብም ካንግ ባሥንሱዌ። ኢሣይቅኒንድ ካንግዎይናም ሀክ ኢራት ቤቂ ባ ጋሽ ታኢ ይስቲ ሺውር ታምቃን ቦስትንሴንዴ። ጪር ቶኢ ኤራርጉⶥ ሺውር ታሚ ኢሣይቅን ቡሥንሱዌ። ዳጫ ሀይባቃይጌንዲ ኢሣይቅን ሳአ ኢራታሳ ባ ይስኩⶢስ ጪር ይጥንሳርጉዌ።

ዬሱሲ ካርታጉⶣም ሼጣና ይሲ ይስን ትያትንሲ ይስኩⶣይ ባ ካንግ ባእንሱዌ። ሼጣኒ ዬርን ባ ጎስትንሱ ቆድን ይያም ጊባትኒ ይስኬንድ ካንጋ ባና ካንግዎይናም ሀክ ይቃን ኢሣይቅኒ ቡቅንሱⶥ ሺውር ታምቃን ቦስትንሴንዴ።

አዳማ፥ ሄዋና ዬር ሀይጣ፥ ይ ትዛዛይስ ባቃርጉ ሺድባኑⶥ ናባም ብያርስኪ ዶድ ቶሕንዬኤንዴ። ኡⶣም ዬሪ ዶዲስ ዱርትኒ ው ባይስንባኑⶢስ ሀይጡዌ። ይ ፔታስን ዬሪ ማጥን ጎቅን ቃያጋ ጫራ፥ ቃያጋ ዶዳይስ ድያድንሱዌ።

ዬሱሳ ይያ ባና ይስኬንድ አሥንዳይ ቃያጋ ዶዳ ኤንቃን ካንግዎይን ይስትንሴንዴ። ው ዴብም ይስኩⶥ ካንግ ዴብም ትያትንሴንዴ። ይሲንድ አሥ ዬፒስ ካንግ ሲያህንሱዌ። ኤስን ኡⶣጋ ጌሽን ኢራታ፥ ጋይዳ፥ አይና፥ ዬፓ፥ ኢት ቃይጻ፥ ፑጋ፥ ሺዳን ዎጣይ ጪርይስትንሳርጉዌ። ዬሱሲ ይስን ትያታ ባይስኩⶢስ ሶያማ፥ ኢባር ባሣማ ጎቲ አሂ ካንግዎይናም ሀክ ባ አሥንዳ ባና ይስትንሱዌ። ጋላታ ዎብሳ፥ ጎይና ሻላ፥ ይላሻ ካሢ ይቃን ካንግዎይን ሲስትንሱዌ። አሜና!!!