32. ዬሱሲ ዎናጋ ማⶢ ይ ጉዝቃን ይስኩⶣ፥ አሥና ፑግኒናይስ ፕያሡ

ማጥን ጎቅን ዬሱሳ፥ ይ ማⶥንያእንዳ ጃልባቃን እያርዲ ሶእ ዴብም ኤጋም አቲ ጌርጌሳ አሥንዲ ይስን ቶክንሲ ይስኩⶥ ጋፕም አቴንድ።

ኢሣይቅኒ ሴጋም አትናጉⶥን ጎዥቂ ይስኩ አሣ ማጢ ዎጺ አቱ።

ናሳ ኡⶢ ኤራሲ ይ ኡጢ ካርስኒ ሀካርጉ ዞላሳጊ ይስቱዌ። ይ አሥንዲ ይ ቶአ፥ ይ ኩቻይስ ጡር ግያዳም ጽያጻስን ባሢ ውርስንስያን ይስቱዌ።

ናሳ ኡⶥ አቅ ኩሢ ንያል ቆባልቃና ማንካርቃናን ይስቱ። ይሲንድ ጡማማ፥ ፓዣማ ኤስ ካይ ኬኢ ይስቱ። ሲማሪስ ማአርጉ ጉዝ ካይ ይስቲ ባ ጉዚስ ንያላም ቃⶺ ሱሢ አዳሲ ውርስንሲ ይስቱዌ።

ናሳ ኡⶢ ዬሱስ ዳድን ዬአ ባ አቱⶣም ይ አፕም ዶድን ዎጢ ጉራትንሲ ይስን ጎይኑ፤ ኡⶣም ዬሱሲ ዎናጋ ማⶥንዳ ይጉዝቃኔንዲስ «ናሳ ሀⶥ ጉዝቃን ኬስንዴ!» ማኪ ሾርሺ ኬንዛሱ።

ናሲ «ዎ ትያታ ዬሮሥንድ ናንሣ ዬሱሶ! ታ ዳድን ሀራን ኮያ ይስታጋዎ? ዬሪ ኒ ማሬ! ታ ኢራታሳ ዡላሳሺዶ!» ማኪ ባ ካሢስ ጋልን ማስንሲ ኬኢ ሀይጡ። ኡⶣም ዬሱሲ ዎናጋ ማⶣ ኡⶢስ «ኒ ሱሚ ኦኔዎ?» ማኪ ኦጩ። ይሲንድ «ኑና ⶦዳስንዳ ጊዛዎ! ኑ ሱሚ ሌጌዎን ማስቲ ይስኩዌ!» ማኩ። (ሌጌዎን ማስቲ ይስኩⶢ ሮም ማይትናስዳ ⶦዳስንዲስ (4,500 አትንሴንዲስ) ማጥን ኡጥንሲ ይስኩ ማይትናስንድ ቦምባ ጊዝዎ።

ዎናጋ ማⶥንዳ ኤንዲ «ኩሣ ሀⶥን ይሣ ሀክን ኑ ቲሣሺዶ!» ማኪ ዬሱሲ ቆሌንድ። ኢሣይቅን ሺሽን ሺክን ይስኩ ጋግቃን ⶦባ ⶦዳንስዲ ኪምሢ ይስቱዌ። ዎን ማⶥንዲ «ⶦብንድ ዳድን ኑ ቲሦ!» ማኪ ቆሌንድ። ኡⶣም ዬሱሲ «ሀምምንዴ!» ማኩ።

ኡⶣም ዎን ማⶥንዳ ኤንዲ ናስ ጉዝቃን ኬስኪ ⶦብንድ ጉዝቃን እራዴንድ። ⶦብንዳ ኤንዲ ቶር ካርቲሳካን ዱዲ ዎጺ ሀንቂ ባሀርቃን እያርዲ ቆስቴንድ። ኢሣይቅን ፕያዲንድ 2,000 አትንሱⶣን ይስቱዌ።

ⶦብ ኪምናስንዲ ኡⶢስ ባ ቤቁⶣም ካትምቃን ዎጽካያም ሀንቂ ዬሱሲ ኡሡⶥ ቃይጺስ ይ ካንግ አሤሽን ሀይጤንድ። ካታም አሥንዲ ዬኢ ናሳ ጎዣሲ ፕያጻንቂ ዬሱሳ ባና ይስትን ቤቄንድ። ይሲንድ ሲማር ማኢ ፕያጺ ሶይ አታንቂ ይስቱዌ።

አሢ ፔቱⶥ ጋሀም ቃጽ ሼርቃንቂ ዬሱሲ ባ ዶድን ኬስኪ ሀምሱዌሽን ቆሌንድ። ኡⶣም ዬሱሲ ጃልባቃን እያርዲ ሀምሚ ዬሹ። ናሳ ጉዣሳ ፕያጹⶢ ኤሱሳ ባና ሀምሚ ይ ቆሉ።

ይ ፔታስን ዬሱሲ «ኡⶢ ፔትንሳርጉዌ! ኒ ኬትን ሀንቅንሳ ዬሪ ኒ ማሪ ኒም ይሡⶢስ ኒ ኬት አሥንዴሽና ኒ ኢግንዴሽና ሀይጦ!» ማኪ ይስን ሀይጡዌ።

ኡⶣም ናሳ ኡⶢ ሀንቂ ዬሱሲ ባም ይሡⶢ አሥን ካንግ ሀይጡዌ። ጋሀ ኡⶢስ ሲስኩⶥ አሢ ባ ካንግ ዲቲ ታሥካን ዎጢ ይስቱዌ።

ዬሱሲ ኡⶥን ይስቲ ባሀርን ሴጋም ካርቲ ሀንቁ። ይሲን ባ አቱⶣም ⶦዳጋ አሢ ይ ጉዝን ሱኪ ይ ኢራታሴንዴ። አሥንዳ ኤንድ ዴንትካን አሥና ማጣ 12 ቤርግ ይ ጉዝን ሱቲ ኮⶥን ኢራትናቃ ይስኬና ይስቴን። ውሲንድ ሀⶥት ባብ ኬታ ⶦድን ዎብታ ባ ጊዝ ውርሳ ፕያጻርጉⶣን ይስቴኔ።

ውሲንድ ዬሱሲ ፑግናሳ ⶦዳስንዲስ ፕያሡⶢስ ሲስክንሳ ይስቴን። አሥን ውሳ ባ ማይቱዋም «ይ ሲማርን ኢክ ታ ኡጣን ፕያጽንታኑዌ» ማካ ታሥንሳ ዬሱስ ያፓርቃን ዬአ ይ ሲማርን ኡጤን። ዬሱስ ሲማርን ውሳ ኡጣጉⶥን ግያርን ሱታ ኮⶥኪ ይስኩⶢ ይጥን ባ ፑግቃን ፕያጼኔ።

ኡⶣም ዬሱሲ ባ ዳድን ይስቲ ጊዲ ኬስኪ ሀንቁ ኤርንሲ ባ ጌሽ ካርሲ ኖትንሲ «ኦናጊ ታ ጉዝን ያካዴ?» ማኪ ኦጩ። ይ ማⶥ ንያእንዲ «አሣ ኒ ⶦራም ⶾንቃንቂ ጡርስትኒ ቅያርስትኒ ይስካⶥ ቤቃ ይስታ «ኦናጊ ታ ጉዝን ያኬዴ! ማካ ይስታኔ?» ማኬንድ።

አሥና ሼርቃ ጉርጣ ይስታ ዬሱስ አፕም አታ ዶድን ዎጤን። ውሲንድ ባና ይሡⶣ፥ ባና ፕያጹⶣይስ ሀይጤን። ኡⶣም ዬሱሲ «ሀ ታናሜ! ኒ ጊባቲ ኒ ፕያሣንቁዌ፤ ኤስን ሶያም ሀሞ!» ማኩዌ።