24. ዮሀኒሲ ዬሱሲስ ጣምቅኑ

ዛካሪያስ ናንሣ ዮሀኒሲ ኮናስ ፔቱ። ይሲንድ ዶዳ አሢ ይስን ቶካርጉ ኮልን ይስቱዌ። ኤሳ፥ እውዋይስ ሙኢ ይስቱ። ጊማል ኩስታም ቃይጹⶥ ሲማርንድ ማእንሲ ይስቱዌ።

ⶦዳጋ አሢ ዮሀኒሲ ሀይጢ ይስኩⶢስ ሲስኒ ዶዳ ኮልን ይ ዳድን ዬኢ ይስቴንድ፤ ይሲንድ «ዬሪ አሥ ዴብም ትያትንሱⶥ አቢ ሺካንቁዌ! ሶይቃን እያርድንዴ!» ማኪ ኤይሲ ሀይጢ ይስቱዌ።

አሥንድቃን ⶦዳስንዲ ዮሀኒስ ሀይጢስ ባ ሲስኩⶣም ባ ጩቡ ሀስትኒ ሶይቃን እያርዴንዴ። ዮሀኒሲ ኢሣይቅኒስ ጣማቅኑዌ። ⶦዳስብድ አይሁድ ጊባት ባምንዲንድ ዮሀንሲ ሀይጡⶥ ጋሀም ጊባትኒ ጣማቃስኒ ዬኤንድ። ይ ፔታስን ባ ጩቡ ሀስትኒ ሶይቃን እያርዳርጌንዴ።

ዮሀኒሲ ኢሣይቅኔሽን፣ «ዎ ሀንዳ ጾጥንባባ ዲንጉር ንያእንዶ! ሶይቃን እያርዲ ይንት ኢት ቃይጺስ ሺችንዴ። ሶይ አፕ ኡጣርጉⶥ እንቺ ባ ካንግ ዶስቲ ታምቃን ቦስትንሱዌ። ዮሀንሲ ይዝቅን ኮናስንዲ «ኤስ ሀⶥ ኒ ቦዲስ ዬሻስንሱⶥ ዎሳሲስ ኒ አፓርቅን ቲሥንታኑዌ» ማኪ ሀይጡⶥ ኮኒ አቲ ይያም ይሢ ቤቱዌ።

ማጥማጥ አይሁድ አሥንዲ ዮሀንሲስ ኔና ማስሀኔ? ማኪ ኦጪ ይስቴንዴ። ይሲንድ ኢሣይቅኔሽን፣ «ታና ማስህ ኤሳርታኑዌ። ይ ፔታስን ታ ጌሽን ውንሱⶥ ማጥ አሢ ይስኩዌ። ይ ጫማ ግያዲስ ታ ሀትንሱዌሽን ታም ሀካስናርጉⶥ ይሲ ኤዛ ጊዝዎ» ማኪ ሀይጡ።

ይ ዎንሣን ዱታም ዬሱሲ ዮሀንሳም ጣማቃስኒ ይ ዳድን ዬኡ። ዮሀንሲ ባ ይ ቤቁⶣም «ሀⶥ ቤቅንዴ! ዶዳ ሀⶥ ጩቡይስ ጤጵምሱⶥ (ባይስንሱⶥ) ዬራጋ ዶሬ!» ማኩ።

ዮሀንሲ ዬሱሲ፣ «ታና ኒ ጣማቅንታኑዌሽን ፔትንሱⶥ አሥ ኤሳርጉዌ። ሀራን ኔናጋ ታ ጣማቅንሱዌ!» ማኩ። ኡⶣም ዬሱሲ ይስን ካርሲ፣ «ይሥንሱⶥ ኮይስቲ ይስኩ ቃይጽ ይ ፔቱዌሽን ኔና ታ ጣማቅኑⶢ ኮይስቲ ይስኩዌ!» ማኩ። ዬሱሲ ጪር ጩቡ ቃይጻርጉⶥ ሶይናሳጎን ፔታሲ ዮሀንሳም ጣማቃስኑዌ።

ዬሱሲ ጣማቃስኒ ግያርን ሶእቃን ይስቲ ኬሳጉⶥን ዬራጋ ማⶢ ጉጎጥን ቤስቲ ይስቲ ይ ዴብም ዎርትኑዌ። ኡⶥ ጌሽን ዬራጋ ካሢ ሀይቅን ጫርቃን « ኔና ታና ኒⶡና ይስኩⶥ ታ ናንሣ ጊዛዎ! ኒያም ታ ካዣሺ ይስኩዌ!» ማኪ ይስቲ ሲስቱዌ።

ዬሪ ዮሀንሴሽን፣ «ማⶣ ሀናሲ ኔና ይ ጣማቅና ይስኩⶥ አሥ ዴብም ዎርትንሱዌ፤ ይሲንድ ዬራጋ ናንሣ ጊዝዎ!» ማኪ ሀይጥንሲ ይስቱዌ። ማጣፓጋ ካሕይ ይስኩዌ። ይ ፔታስን ዮሀንሲ ዬሱሲስ ጣማቅኑⶣም ዬራ ባቢ ሀይጢ ይስትን ሲስቱዌ። ዬራ ናንሢ ቤስቱዌ፤ ካሲ ኡⶢዎጥን ማⶣ ሀናሲ ቤስቱዌ።