23. ዬሱሲ ዬይስኩ

ማሪያማ ናሳ ሶይናስ ፔቱⶥ ዮሴፒ ውቃን ማታፕ ቦክንሲ ይስቴና ጊዛዎ። ይሲንድ ማሪያማ ቃንቁⶢስ ባ ሲስኩⶣም ቃና ኡⶢ ባ ንያእ ፔታርጉⶢስ ኤሩ፤ ይሲንድ ውይስ ዬላሳርጉ ንያክ ው ሺችኒ ኮዩዌ። ኡⶢስ ይሲ ታሢ ይስታጉⶥን ዎሳሲ ካሲ ዬኢ ይስን ሀይጡዌ።

ዎሳሳ ኡⶢ ዮሴፔሽን፣ «ኒ ማሽታ ማሪያሚስ ኔ ኤታ ሀምሱዌሽን ሀይቃ ሼራሺዶ! ውሳ ቃንቁⶢ ማⶣ ሀናሳማ ጊዝዎ። ውሲንድ እያን ንያእ ዬልንሴኔ፤ ይሱሚንድ ኢዬሱስ ማካ ሱምሦ። ይ ፖርሺ (ያህዌሂ ፓያሥንሱዌ) ማክያን ይስኩዌ። ይ ናቢንድ ይሲ አሢስ ይ ጩቡቃን ፕያሥንሱዌ።

ኡⶣም ዮሴፒ ማሪያሚስ ባ ኬትን ኤቲ ሀንቁዌ። ይ ፔታስን ባ ናንሣ ኡዛ ኡⶢስ ውሳ ዬላጉ ሀክ ውዋ ባና ቤሳ ማሽታ አቲ አቃርጉዌ።

ማሪያማ ዬልና ው እያርፒ ውራጉⶥን ሮም አሥንድ ትያቲአሢ ባካንግ ይዝቅኔንድ ባ ባብምንድ ዶድን ሀንቂ ባ ሱም ጻፕማኬ ማኪ ቲዛዝ ኡሡ። ዮሴፒ ማሪያማ ባና ናዝሬትን ይስቲ ቤትልሄምም ጳዳጋ ቦድ ዎብቲ ሀንቄንድ ይ ናቢንድ ይዝቅኑⶥ ኢሣይቅን ባባ ዳዊቲ ቤትልሄም ካታም ዬይስኩዌሽና ጊዝዎ።

ቤትልሄም ኢሣይቅኒ አትናጉⶥን ካሽ ኩሥ ያፓርጌንዴ። ኢሣይቅኒ ኬት ኮይ ባይስንሲ ይ ውርን ድያንት አቅ ኬት ያኬንዴ። ኩሣ ኡⶥን ማሪያማ ባ ናንሣ ኡዚስ ዬሌን፤ ይስን ባ ይ ሱሥንሱⶥ ኩሥ ባይስንሳ ድያንት አፕም ጎⶽ ዴብም ይ ሱሤሴኔ። ይሱሚንድ ዬሱስ ማኪ ጼጌንዴ።

ጡማ ኡⶣም ባ ጊዝንድ ኪንቂ ቡድን አቂ ይስቴንድ ኪምናንስዲ ይስቴንድ። ቱታል ሳንቂ ይስኩ ዎሳሲ ኢሣይቅን አፕካን ቤስቱዌ። ኢሣይቅኒንድ ቃጽ ሼርቄንድ፤ ኡⶣም ዎሳሲ፣ «ሼራሺድንዴ! ይንታይቅኔሽን ታ ሀይጥንሱⶥ ካዥ ሀይጢ ይስኩዌ! ማስህ ማስቱⶥ ትያታ ኪርስቶሲ ዎይንቴን ቤትልሄም ካታም ዬይስካንቁዌ!» ማኪ ኢሣይቅኔሽን ሀይጡ።

ካሲ ቃዝቂ «ሀንቂ አርⶣ ኡⶢስ ቤቅንዴ፤ ጫርቃም ካባስኒ ድያንት አፕም ሱርቅንሲ ይሲ ይስትን ቤቅንሲንቱዌ!» ማኩ። ቱታል ዎሳሳ ኡⶣ ባና ⶦዳስንድ ሀይቅን ጫርቃኔንድ ዎሳስንዲ ይስቴንዴ። ኢሣይቅኒንድ ዬሪስ ጋላትኒ ዎብሲ ይስቲ «ዎብሲ ዬሮሥንዴሽን ሀይቅን ጫርቃን ፔትማኬ! ሶያ ዲጋ ዶድን አሤሽኒንድ ፔትማኬ!» ማኬንዴ።

ኪምሳንዳ ኤንዲ ብታሲ ዶንቲ ዬሱሲ ይስን ይስኩዌ ማስቱⶥን ሀንቂ አቴንድ፤ ዎሳሲ ኢሣይቅኔሽን ሀይጡⶢዎጥን ድያት አፕም ሱርቅንሲ ይሲ ይስትን ይ ያኬንዴ። ሶይሲ ካዥቄንድ፤ ማሪያምንድ ኡⶢስ ቤቅንሳ ቃጽ ካዥቄኔ። ኪምናስንዲ ባ ሲስኩⶣ፥ ባ ቤቁⶥ ጋሀም ካንግ ዬሪስ ዎብሲ ይስቲ ባ ጊዝ ዳድን ካርቲ ሀንቄንዴ።

ኮታጋ አብ ጌሽን ኦባርን አፕ ኬስኬትን ኮብ ይስቴንድ አሥንዳ ኤርትናንስዲ ሀይቅን ጫርን ቤስቲ ኤርስታጉⶥ ማጥ ሻይቲስ ቤቄንድ። ኢሣይቅኒንድ ሻይታ (ዣታ) ኡⶣም ቃያጋ ትያቲ አይሁድ አሥንድ ዴንትካን ዬይስኩⶢስ ኤሬንዴ።ኡⶣም ትያታ ኡⶢስ ቤቅኒ ጳዳጋ ቦድ ዬኤንዴ። ቤቴልሄም ካታምም ዬኢ አቲ ዬሱሳ፥ ይ ባያይ ይስን ይስኩ ኬት ያኬንዴ።

አሥንዳ ሻይታም ጋህ ኤራጌንዳ ኤንዲ ዬሱሲስ ባ ቤቁⶣም ዎጣንቂ ይስን ጎይኔንድ። አጣጋ ኡሥንድ ይስን ኡሤንድ። ኡⶥ ጌሽን ባ ዶድን ካርቲ ሀንቄንዴ።