16. ዳንዳ ኡካርንዳ (ቃም ጎትካና ጋባርቃና ኬሳጌንድ)

ያሱይ ሀይቁ ጌሽን ኢስራኤል አሥንዲ ዬርን ጎስቲ ይ ትዛዝ ባቃርጉ ሺዴንድ፤ ኡⶣም ዬሪ ኢሣይቅን ዴንትካን ቦርቲ ሺዴንድ ካናአን አሥንዲ ብያርትኒ ኬሲ ዬር ትዛዚስ ይሣርጌንዴ።ኢስራኤል አሥንዲ ይስኩⶣ ይስትንሱⶣ ባ ካሐ ያሂዌይስ ጎይና ባና ይስኩⶢስ ሺችንሲ ካናአን አሥንድ ካሕይስ ጎይኒ ጋዴንድ። ኡⶣጋ አባም ኢስራኤል አሥንዴሽን ትያቲ ካይጉዌ። ኡⶣጋ ናባም አሢ ባ ማጥማጣም ባ አፕም ሶይጢ ባ ቤስቱⶢስ ይሢ ይስቴንዴ።

ኢስራኤል አሥንዲ ዬራም ጊባትና ባይስኩⶢስ ሺቼንድ። ኡⶣጋ ናባም ዬሪ ኢሣይቅን ጋግናስንዲ ኢሥ ጡርቂ ሺቃሲ ጫዲ ጋምሥንሱዌሽን ይሡ። ኢሣይቅን ጋግናንስዲ ኢሥ ቂጺስ ካንግ ዙኪ ቦጊ ኤቴንድ። ኢሣይቅን ጊዝንዲንድ ካንግ ባይሲ ውርሴንድ። ኢሣይቅንቃን ⶦዳስንዲስ ዎጤንዴ። ኢስራኤል አሥንዲ ዬር ሀይጢስ ሺችንሲ ኢት ባ ቃይጹⶥ ናባም ሾዳጋ ቤርጊስ ባ ጋግናስንዴሽን ቃም ጎስቲ ጋባርኔንዴ። ቃጽ ባ ኢራትኑⶣም ሶይቃን እያርዲ ዬር ዳድን ካርቴንድ። ኡⶣም ዬሮሥንዲ ኢሣይቅን ጋግናስንድ ኩችካን ኢሥ ፕያሡዌ።

ኡⶤሽን ዬሪ ኢሣይቅኒስ ኢሥ ጋግናስንድ ኩችካን ኬስንሴንድ ዳንዳ ኡካርንዳይስ ቲሢ ዶዱ ዴብም ሶያ ዲጋይስ ኤቲ ዬኡዌ። ይ ፔታስን ኢስራኤል አሥንድ ካርቲ ዬሪስ ብያቴንዴ። ካሕንዳ ዱማርዲስ ጎይኒ ጋዴንድ። ካሲ ዬሮሥንዲ ኢሣይቅን ሺሽን ይስኬንድ ኢሥ ጋግናስንዳ ሚድያም አሥንዲስ ዶንሢ ኤቲ ዬኢ ኢሣይቅን ዴብም ጫድ ፒርቃሲ ኤጋም አሢ ኢሥ ጋግናስንዴሽን ኡሡዌ።

ሚድያም አሥንዲ ናፕም ቤርግ ኢሣይቅኒስ ቃም ጎቲ ኢሥ ሙኢስ ካንግ ቦጊ ኤቴንድ። ኢስራኤል አሥንዲ ቃጽ ሼርቃንቂ ኮⶥካና ንያል ቆባልቃና አሽቴንድ። ኢራትኒ ቃያንቂ ካሲ ዬርዳድን ካርሲ ኬኤንዴ።

ማጥን ጎቅን ጌድዮን ማስቲ ይስኩⶥ ኢስራኤል አሢ ሚድያም አሥንዴሽን አሽታንቂ ባ ጎሲስ ዴክኒ ይስቱ። ዬራጋ ዎሳሲ ጌድዮን ዳድን ዬኢ አታንቂ፣ «ዎናሳ ዞላስ ማይታንሶ! ዬሪ ኒያባና ይስኩዌ፤ ኤስን ሀⶥ ሀንቃ ኢስራኤል አሥንዲስ ሚድያም ኩችካን ፕያሦ!» ማኪ ይስን ሀይጡዌ።

ጌድዮን ባብም ካሕንዳጋ ኡድ ኩሣ ዬሽንቂ ይስቱⶢ ይስቱ። ዬሪ ጌድዮኒ ኡድ ኩሣ ኡⶢስ ይሲ ኮሢ ቦክንሱዌሽን ይስን ሀይጡ። ይ ፔታስን ጌድዮኒ አሥንዲስ ባ ሼርቁዌሽን ዶዲ ጡማጉ ሀክ ንያክ ባቂ ይስቱ። ኡⶣም ጡማስን ኡድ ኩሣ ኡⶢስ ኮሢ ባሢ ቁⶻⶢ ውርሱ። ኡድ ኩሣ ኡⶥሺሽን ቃያጋ ኡድ ኩሢስ ዬርን ቃይጹ። ይ ዴብም ዬርን ኡዲስ ኡዱዌ።

ይ ዎንሣን ዱታ ኤንታም ጋፕካን ይስኬንድ አሥንዲ ማጣጋ አሢ ኢሣይቅን ኡድ ኩሢስ ኮሢ ውርሱⶢስ ባ ቤቁⶣም ቃጽ ያንቂ ባጬንድ። ጌድዮኒስ ኡጢ ዎጥኒ ይ ኬትን ሀንቄንድ። ይ ፔታስን ጌድዮን ባቢ፣ «ይንታይቅኒ ሀሬሽናን ካሐጋ ጉዝን ጋሥኒ ይ ቤር ኡጥኒ ካፕሚ ይስታጌዎ? ይሲ ካሕ ባ ፔታን ዎስ ባ ቄሬሽን ጫድማኬ!» ማኪ ኢሣይቅኔሽን ሀይጡ። ኡⶢስ ይ ባቢ ሀይጡⶣም ጌድዮኒስ ዎጣርጉ ሺዴንዴ።

ሚድያም አሥንዲ ኢስራኤል አሥንድ ጊዚስ ቦጊ ካቲ ኤትኒ ካርቲ ዬኤንድ። ኢሣይቅኒ ⶦዳስንድ ፔቱዌሽን ኤራሲ ኢሥ ኡጢ ካርስኒ ሀካርጉዌ። ኡⶣም ጌድዮኒ ሚድያም አሥንዳ ባና ጫድኒ ኢስራኤል አሥንዲስ ካንግ ጼጉ። ጌድዮኒ ጫድቃን ባ ሀማርጉ አፓርቅን ዬሪ ይያ ባና ይስኩⶢስ ባ ኤርንሱዌሽን ናም ካል ካርሲ ዬሪስ ውⶢ ማላት ኦጩዌ።

ይ ጋድኑⶥ ማላት ቤቅኒ ሲማሪስ ዶድን ፓራስንሲ ዱታ ኤንታሙⶥ ቤዚ (ዎድጲ) ሲማር ዴብ ካይን ይስትንሱዌሽን ዬሪስ ኦጩ። ዬሪ ይሲ ሀይጡⶢዎጥን ይሡ። ካሲ ይ ዎንሣን ጡማስን ዎድጲ ሲማርን ኤሳራጊ ዶድን ዎጥን ሲማሪ ኮል ይስትንሱዌሽን ኦጩ። ዬሪ ካሲ ኡⶢዎጥን ይሡዌ። ማላታ ናም ኤንዲ ዬሮሥንዲ ጌድዮናም ፔታንቂ ኢስራኤል አሥንዲስ ሚድያም ኩችካን ፕያሥንሱⶢ ጌድዮኔሽን ሶያጋ ሚጥ ፔቱዌ።

32,000 ኢስራኤል አሥንዲ ጌድዮን ዳድን ዬኤንድ። ይ ፔታስን ዬሪ አሥንዳ ሀንድ ፕያዲ ቤሻንቁዌ ማኩ። ኡⶤሽን ጌድዮኒ ጫዴሽን ሼርቂ ይስኬንድ 22,000 ማይትናስንዲስ ጌሽ ካርሲ ኢሣይቅን ኬትን ቲሡ። ካሲ ዬሮሥንዲ ሀⶢንድ ይ ፔታስን አሥንዳ ንያባና ይስኬንድ ፕያዲ ቤሻንቁዌ ማኩ። ካሲ ጌድዮኒ 300 አሥ ኢክ ሺችንሲ ቦርቴንዲስጌሽ ካርሱዌ።

ኡⶣም ጎቅን ጡማስን ዬሮሥንዲ ጌድዮኔሽን፣ «ሚድያም አሥንድ ማይትናስንድ ጋፕካን ዶንታ ሀሞ! ኢሣይቅኒ ጋሂ ይስኩⶢስ ሲስክንሳ ጪር ሼራሺዶ፣» ማኩ። ጡማ ኤናም ጎቅን ጌድዮኒ ሚድያም ማይትናስንድ ጋፕካን ሀንቁ። ሚድያም ማይትናሳ ማጢ ባ ማጥናሴሽን፣ «ጌድዮን ማይቲ ሚድያም ማይቲስ ጫዲ ዎሢ ይስትን አጵማም ታ ቤቁዌ» ማኪ ሀይጥን ሲስኩ። ጌድዮኒ ኡⶢስ ባ ሲስኩⶣም ዬርን ጉራትኒ ጎይኑዌ።

ኡⶣጋ ጌሽን ጌድዮኒ ባ ማይትናስንዴሽንⶣሚታ፥ ኮንዳ፥ ቆብጻይስ ኡሡ። ጡማስን ሀንቂ ሚድያም ማይትናስንዲ ሱርቅንሲ ይስትን ኢሣይቅን ⶦር ቆሬንድ። 300 ጌድዮን ማይትናስንዲ ኮንዳቃን ባ ቆብጽ ይሥንሲ ሳምሢ ኡጥንሲ ይስቴንድ። ሚድያም ማይትናስንዲ ቆብጻጋ ጮብቲስ ቤቅኒ ሀካርጌንዴ።

ጌድዮን ማይታንስዲ ባ ካንግ ማጥን ባ ኮንዳይስ ባሢ ባ ቆብጽ ሳምሤንድ። ባ ⶣሚትስ ፔሊ ይስቲ፣ «ዬሮሥንዳ፥ ጌድዮና ማይትናስንዴ!» ማኪ ኬኤንዴ።

ዬሮሥንዲ ሚድያም አሥንድ ማይ ቆጢ ⶻራሱ፤ ኡⶣም ባ ባርቅን ማጥናሲ ባ ማጥናሲስ ዎጥን ባ ባርቅን ሀይቄንድ። ግያርን ባ ኬትን ይስቴንድ ኢስራኤል አሥንዲ ጼትኒ ዬኢ ቦርቴንድ ሚድያም አሥንዲስ ብያርትኔንድ። ሚድያም ማይትናስንድቃን ⶦዳስንድ 120,000 ዎጤንዴ። ኡⶣጋ ቦዳም ዬሮሥንዲ ኢስራኤል አሥንዲስ ፕያሡዌ።

ኢስራኤል አሥንዲ ጌድዮኒስ ባ ትያት አሥኒ ኮዬንድ። ይ ፔታስን ጌድዮኒ ትያት ባአትንሱⶢስ ኮያርጉዌ። ኡⶣጋ ቆድን አሢ ባ ማጥማጣም ካታ ባ ኤታ ዬኡⶥ አንሥ ⶣⶭንዲስ ካንግ ባም ኡሤ ማኪ ኦጩ። ኢስራኤል አሥንዲ ቃጽ ⶦዳጋ አንሥ ⶣችንዲስ ጌድዮኔሽን አኪ ኡሤንዴ።

ጌድዮኒ አንሣ ኡⶢስ ኮⶣሲ ቆምባ ጉዲ ማኢ ይስኩⶥ ሲማሮጥን አሢ ቃይጹዌ። ኢስራኤል አሥንዲ ሲማራ ኡⶢስ ካሕ አምሥ አሢ ይስን ጎይኒጋዴንዴ። ኡⶣጋ ናባም ካሲ ዬሮሥንዲ ኢሣይቅን ጋግናስንዲ ኢሣይቅን ጋምሢ ጎትንሱዌሽን ኢሥ ዴብም ማጋጭ ቦኩ። ካሲ ኢራትኒ ቃያንቂ ዬር ዳድን ካርሲ ኬኤንዴ። ዬሪ ኢሣይቅን ፕያሥንሱⶢስ ኢሣይቅኔሽን ቲሡዌ።

ኡⶦጥኑⶥ ይሢስ ኢስራኤል አሥንዲ ⶦዳጋ አብ ካርሲ ካርሲ ይሤንዴ። ኢስራኤል አሥንዲ ጩቡ ቃይጻጉⶥ ፕያድ ዬሪ ኢሣይቅን ዴብም ማጋጭ ቦኪ ይስቱ። ካሲ ዬር ዳድን ካርቲ ኢሣይቅኒ ሶይቃን እያርዳጉⶥን ኢሥ ፕያሥንሱⶥ አሢስ ቲሢ ይስቱዌ። ⶦዳጋ ቤርግ ኢስራኤል አሥንዲስ ኢሥ ጋግናስንድ ኩችካን ፕያሥንሴንድ ኡካርንዲስ ቲሢ ይስቱዌ።

ይ ውርን ኢስራኤል አሥንዲ ዱማርንድ አሥንዶጥን ትያትስ ዬሪ ባምም ኡሥንሱዌሽን ኦጬንድ። ማይት ጫድ አባም ጫድቃን ባ ኤቲ ሀምምሱⶥ ዞላስ ትያቲ ባ ዴብም ትያትንሱዌሽን ኮዬንድ። ዬሪ ኢሣይቅን ኦጫ ኡⶢስ ⶡናርጉዌ። ይ ፔታስን ኢሣይቅኒ ኦጩⶥ ትያትስ ኢሣይቅኔሽን ኡሡዌ።