8. Nyìngòŋ Gyàmtə̀ Jòsef bɛ̀nə̀ Ngwàʔ ə̀ Wen

Ngwʉ̀ʔsə mbɛ chò tà a kədɨ̀ŋ, Yàkob sə̀ dìʔ dwìn. Ghə̀ tɨm wàyn ə̀ wen a ghə̀ nkòŋə, Jòsef, la ghə̀ djʉ̀ lyeə vələ̀mə̀ və wen a və ntsɨ̀ŋə̀ nyamsə.

vələ̀mə̀ və Jòsef mbànə̀ wen byì tà àndə tìʔ ə̀ vəwenə nkòŋə̀ wen chòə̀ noʔə̀ vəwenə vətsèm bɛ bànə̀ wen byì jòm a ghə̀ ntsisə la yì ə lu ndìʔ fòyn ə̀ vəwenə. Jòsef ə̀ ndjʉ̀ə̀ li vələ̀mə̀ və wen ə ghaʔ ə wen ə baʔlə a kəkòs a viʔi mbàʔə̀ nkùm.

Vələ̀mə̀ və Jòsef mbàstə̀ li njisə wen ə̀ zuʔ mənlyuŋ mə̀ byi tsu ə̀ vì jìʔ à tìʔ ə̀ vəwenə, ghə̀ mə̀ kwòʔ la à yì ku nyàm ə nku Jòsef. Yàkob ə̀ ndìʔ nə̀ əkusə nshinsə fambu a ghə̀ nkòŋə̀ Jòsef.

Viʔ vyi nzen Jòsef ə̀ djʉ̀ nə̀ wen a əloʔ ə Igyìb. Igyìb ə̀ ndìʔ noʔə̀ əloʔ ə ghoʔə toə noʔə̀ nkàyn, dìʔ a əwen ə muʔu məntsenə və dzàŋə̀ la muʔu mə̀ Naìl. Vəwenə mbaʔlə Jòsef à wù gumna ə ghoʔə ətsen. Jòsef ə̀ nshyèʔə̀ a wen noʔə̀ nkàyn Nyìngòŋ bwaʔsə Jòsef.

Wì ə tì kəbəŋ ayì nkòŋə̀ Jòsef ə̀ tànkə̀ ə lobtə Jòsef ə ghə̀ tsi nə̀ wen, Jòsef chen la yì ə ko zì yì nèə mbyɨ. Tin ə̀ wùwì ayì fwi ghə̀ zhò ndzɨ̀ŋ a kəchʉ ə̀ Jòsef la ghə̀ yì nkəŋə ə tsi nə̀ yì a ŋàŋ, və̀ ghaʔ Jòsef ə̀ djʉ̀ shwìn a mfɨŋ. Tɛ̀ a mfɨŋ ayì Jòsef ə̀ tsiə tà a jì a Nyìngòŋ ə̀ kòŋə̀, Nyìngòŋ bwaʔsə wen.

Jòsef ə̀ ntsi ngwʉ̀sə səbò a mfɨŋ tà kəjàŋ. A sə ndìʔ nə̀nchʉʔə ətsen, jomsə byɨfə sə səbò sə tsi Ferò, fòyn ə̀ viʔi Igyìb. Noʔə̀ tà wìʔ nko nzì ghə̀ shə̀ʔtə̀ à Ferò la jòm ashì sə dìʔ la ghɔ̀ lɔ.

Nyìngòŋ ə̀ nku li ətof à Jòsef ə ghə̀ shə̀ʔtə byì jomsə. Ferò gàʔ və vì nə̀ wen fa mfɨŋ. Jòsef vì shə̀ʔtə̀ byì jom ashi sə, “Nyìngòŋ a nèə̀ əfozhɨvə ku noʔə̀ nə̀mwìn a ngwʉ̀ʔsə sòmbo ə̀ bɛ nè əfozhɨvə byɨf a ngwʉ̀ʔsə sòmbo a sə dzɨ̀mtə̀.”

Kənyʉ̀ əkyikə mbòŋə̀ li a Ferò ghə̀ tsuʔ Jòsef la ghə̀ ə ngyàmtə̀ soʔə Igyìb à nə̀ kəntomsə̀ əkyikə!

Jòsef ə̀ mbwom li aloʔ ə ghoʔkə ghə vəwenə baʔə əfozhɨvə noʔə̀ kədɨ̀ŋ tsu a ngwʉ̀ʔ shisə ə sòmbo a əfozhɨvə nku noʔə̀ nkàyn lì. Ngwʉ̀ʔsə byɨfə shi sə vì Jòsef sə̀ baʔlə əfozhɨvə à viʔi və zhɨə.

Jɨ̀ŋ ayì nku a Igyìb ə̀ djʉ̀ zaʔə a Kanàn a Yàkob ntsi tsu nə̀ ngwàʔə̀ əngə̀ŋ ə̀ wen.

Yàkob mə̀ tɨm vunə wen la və djʉ̀ə̀ zen əfozhɨvə fa Igyìb. Vəwenə djʉ̀ zen fà Jòsef kèn la vəwenə kɨ li la à dìʔ lə̀mə̀ vəwenə. Jòsef nyen vəwenə ə̀ kɨ.

Jòsef ə̀ mwòmsə̀ li vəwenə ə lye la vəwenə kwitə li mulɔ, ghə̀ shə̀ʔtə̀ à vəwenə, “Mà dìʔ lə̀mə̀ ghə̀ŋ, Jòsef! Kə ghə̀ŋ à fwàyn. Ghə̀ŋ ə̀ nkəŋə ə nèə mbyɨ tà àndə ghə̀ŋ ə̀ mbaʔlə mò a nə̀ kəkòs a lì Nyìngòŋ bòŋsə̀ nè njùŋ fa tsu! Ghə̀ŋ vì ə̀ ntsi a Igyìb tì mà gyàmtə̀ ghə̀ŋ nə̀ əfozhɨvə.”

Vələ̀mə̀ və Jòsef mbwìnə̀ djʉ̀ shə̀ʔtə̀ à tìʔ ə̀ vəwenə, Yàkob, la Jòsef bɔ̀ bu a mbyi, kənyʉ̀ əkyikə bòŋ a wen ghə̀ saŋlə noʔə̀ nə̀mwìn.

Yàkob ə̀ nsə̀ dìʔ noʔə̀ kədwìn kə wìʔ. Ghə̀ lyɨ̀ ngwàʔ ə̀ wen noʔə̀ ətsèm vəwenə djʉ̀ a Igyìb, ə sə̀ tsiə tsu. Mimbu Yàkob sə pfɨ ghə̀ bwaʔsə vunə wen noʔə̀ vətsèm.

Nyìngòŋ ə̀ nchòsə̀ li məkàyn a ghə̀ nkanə̀ wenə̀ Abàham à Azìk, ə̀ bɛ̀ chòsə̀ fa Azìk à Yàkob. Luwèn ghə̀ chòsə̀ fà Yàkob à vunə ə wen njù sə̀bò a wum nə̀ ngwàʔsə vəwenə. A ndìʔ ngwàʔsə ə vunə ə Yàkob njù sə̀bò a wum à vəwenə ndìʔ təloʔ tə Isrèl njù sə̀bò a wum.