7. Nyìngòŋ Bwaʔsə Yàkob

Vəwenə nkwiə kuʔə Yàkob kòŋə̀ ə ndìʔ ta əchʉngə̀ŋ, Esò kòŋə̀ ə mbumə. Rèbekà ə̀ nkòŋə̀ Yàkob, Azìk ə̀ kòŋə̀ Esò.

Kətsi kətsen Esò bwìn fa əbum nə̀ jɨ̀ŋ a wen əbə̀m. Esò gàʔ à Yàkob, “Nsensen, ku mò nə̀ əfozhɨvə a wù yì pfè.” Yàkob bwìnsə̀, “Chòə̀ mbì ə̀ ku əto wù à mò.” Esò byɨmə la Yàkob ə ndìʔ wuto. Yàkob mə̀ ku əfozhɨvə a wen.

Azìk ə̀ nkəŋə tɨf Esò ə bwaʔsə wen. Əzhʉ kwʉ̀ʔ Rèbekà dem ətof ə̀ nè la Yàkob ndìʔ Esò. Azìk ə ndìʔ mu ghə̀ ə to li ə̀ bɛ̀ fɨ̀f. Yàkob mòʔ njisə Esò ə̀ lem nyɨŋsə byi à wen ə wen ti ndìʔ tà a nə̀ Esò.

Yàkob vì yèn Azìk ə̀ gàʔ, “A dìʔ mò ə Esò. Mà vì la wù tɨf mò ə bwaʔsə mò.” Azìk kùm ə̀ wen ə̀ zhʉ̀ nyɨŋ shì bɛ̀nə̀ kəlèm kə njisə mə̀ kwòʔ la à dìʔ Esò ə̀ mə̀ bòŋsə̀ tɨf Yàkob ə bwaʔsə wen.

Esò mə̀ zìtə̀ ə bàyn Yàkob byì tà àndə ghə̀ ntsoŋ li əto ə wen ə̀ bɛ̀ tsoŋ kətɨf kə tìʔ ə vəwenə. Ghə̀ wʉ la tìʔ ə vəwenə ne pfɨ ə yì zhwi Yàkob.

Rèbekà ə̀ nzhu li kənyʉ̀ a Esò nkəŋə nè. Ghə̀ baʔtə wen ə Azìk ə̀ tɨm Yàkob la ghə̀ djʉ̀ ə̀ ntsi wenə̀ viʔi əngə̀ŋ ə̀ vəwenə noʔə̀ kəghaf.

Yàkob ə̀ ndjʉ̀ə̀ li ə̀ tsi wenə̀ viʔi ngə̀ŋ Rèbekà noʔə̀ ngwʉ̀ʔsə kədɨ̀ŋ. Ghə̀ lam ə̀ bwi vunə lyʉmə ndju səbò a wum nə̀ wàyn ə wùwì əmùʔ. Nyìngòŋ ə̀ mbwaʔsə li wen ghə̀ sə̀ dìʔ noʔə̀ wughoʔə.

Ngwʉ̀ʔsə chò məwum ə mbò Yàkob lù bwìnə̀ djʉ̀ a wen əloʔ ə Kanàn. Ghə̀ ndjʉ̀ə̀ nə̀ ngwàʔ ə wen noʔə̀ ətsèm, nə̀ viʔi əshyèʔ ə̀ wen, bɛ̀nə̀ tənòyn tə nyamsə ə wen noʔə̀ tətsèm.

Yàkob ə̀ mfwànə̀ kwòʔtə̀ la Esò mbo nkəŋə ə zhwi yì. Ghə̀ tɨm tənòyn tə nyamsə la və djʉ̀ ə̀ ku à Esò. Ntsɨ̀ŋsə nyamsə a sə nvìə nə̀ nyam ashì gàʔ a Esò, “A tɨm Yàkob ə wù əshyèʔ ə wù ə ntɨm nyam sensə à wù. Nkàntə̀ wen dìʔ a jì vìə̀.”

A lì mu Esò nlyesə̀ li ə ku Yàkob, vəwenə saŋlə ə bɛ yenmə. Yàkob bɛ̀ sə̀ tsi nə̀ mbwaʔmə̀ a Kanàn. A sə̀ laʔtə Azìk pfɨ, Yàkob wenə̀ Esò bvɨ̀mə̀ wen. Məkàyn myì a Nyìngòŋ ə̀ nkanə wenə̀ Abàham lì mə̀ chò fa Azìk ə̀ shiə à Yàkob.