8. Yalli Yoosuf kee kaa dik naggoysha

Mango iggiditik sarrah Yacqoob barrowe gedda, isheh ziyaada kixinii yine Yoosuf amaa saci zan abaa tine ishi sacul yablo kaa dhirhiye

Yoosuf, kaa abba mangum kaa kixinii yinemhi sabbatah kee amaa ishi saculhi manabotta yakko kinamhi soono yublemhi sabbatah kaa sacul mangum kaa yincibin. Yoosuf ishi sacululle yemeete gedda, kaa beyeenih garuuzat bacshaarodde kaa yeebexin.

Yoosuf sacul careh gaxekkah Yoosuf sareena candhisheenih alat biilodde yusmundhucin. Amaymik sarrah, akkinnan alluulatti Yoosuf yigdifem yakkalo ciloh beyeenih sinni abba yuybullyin. Yacqoob lel mangum yixzine.

Garuuzat bacshaaro Yoosuf Masri fanah beyen. Masri Niil nahaar-hi agaagalle geytimta naba quwwa le dik kii tine. Garuuzat bacshaaro Yoosuf wuli gaddaale kin doolat mas-uuludde yeebexin. Yoosuf ishi wanna meceetih yukhdume, Yoosufudde lel Yalli adde yebeereke.

Kaa wannahi numa Yoosuflih dhinto ticikkine, Yoosuf laakin ta ginah Yallih zambedde saw mifarhinna. Ishi lel kurrayteh zirabah Yoosuf tiksiseyaako kaa yamdhdhaw xabshe kaa beyen. Xabshedde gantah Yalla yeemene, Yalli lel adde yebeereke.

Yoosuf cagab male kii yine hanik lamma iggida fanah xabshedde yine. Wuli bar, amaa Masri xiyaw ni nugus kinni akyaxrhin Fircawun mangum kaa mashshishsha lamma soono yuble. Amaa soonoh macna lel amaa kaa fayishshamko walaa inketti akah warisho mirhiicinna.

Yalli Yoosufuh soonot ayfassar hi dhic akah yoxoyeh yineyaako, Fircawun Yoosuf amaa xabsheeko kaa baahe. Yoosuf amaa soono akah yuturjumeyaako: "Yalli mango orba le malxina iggida, culul le malxina iggida lakadde akyaneya dhirhiyo kinni" akye.

Fircawunuh Yoosuf mangum cibra akah yekkeyaako umbuka Masrille malammah mas-uuliya yaallo kaa reezishe.

Yoosuf xiyawkke tamaa mango orba adde tane malxina iggidadde mango ilaw yakhzanoona akah warishe. Amaymik sarrah amaa culul kin malxina iggidi yemeete gedda, amaa xiyaw beetaanam geyoona ciloh Yoosuf ilaw adde yeebexe.

Mango culul Masrille bisah maki yinem, Yacqoob kee kaa dik alle yinin Canaanalle gantah yine.

Amaymih, Yacqoob ishi cindhamko naba mara Masriiko ilaw dhaamona ten dhirhiye. Ilaw dhaamoona kaa nifidde daw-yarhxin hanik, Yoosuf, kaa sacul kaa maarhaginnooni. Yoosuf laakin ten yeerhege.

Yinqiyyiriinih yaniinim kee miyaniinim ten yeqheesek sarra, Yoosuf: "Anu Yoosuf sin sacal kiyo, mimashshiitina. Garuzzoh yi teebexin gedda umam abtoona ticikkinin. Yalli laakin umaanik mecaani akko abe. Anu sin aytaalaw kiyok amowantaaki sinne kee sinni dikih Masri siganta" akye.

Yoosuf sacul dik gaxeenih ten abba kin Yacqoobuk, 'Yoosuf kaddih wofaalih yane' akan gedda, usuk mangum xedene.

Yacqoob walaa mangum baarroweh yannaw kibah, umbuka ishi diklih Masri yegeeceze, inkoh lel amalle maraa yinin. Yacqoob Ribqah ishi cindhamah inkoh dhaaco akah abe.

Yalli Abraahimih cahdi miimar Isxaaqhalle tillaabe, sarrah Yacqqobulle, sarrah Yacqoob cindhamhi lammankee taman kee ten dikille. Amaa cindhamhi lammankee tamanhi zurriya lel Israa-eel lammanke tamanhi kishotiya yekkin.