10. Tamana bala

Moosa kee Ahaaroon Fircawun fanah yedeyin. Usun: "Israa-eel Yalli tayim yarhxe: 'Yi xiyaw yadawnaaki ten xab!'" aken. Fircawun ten mabbinna. Israa-eel xiyaw natsah ten dhirhiyam hidhdhah, inkinnah ziyaada yashtaqhaloona ten xaylishe!

Fircawun ingirooko yadawna ten kalite. Amaymih lel Yalli Masrille dhacuma tamana bala alle dhirhiye. Ta balah lel Yalli Fircawun kee Masriiti yallitko xaylalem yuybulluwe.

Yalli Niil nahaar biilolle yiybiddile. Fircawun laakin Israa-eel xiyaw ten mirhirhiyo.

Yalli umbuka Masrille acaanun alle dhirhiye. Fircawun lel ta acaanun asac-isho Moosa dhaacime. Sarraako laakin amaa acaanun bade. Fircawun lel ziyaada ishi afcaado yiytirireyaako Israa-eel xiyaw Masriiko yadawna akah masmaxinna.

Amaa gedda, Yalli arriima qaci bala alle dhirhiye. Amaymik sarrah qaci bala alle dhirhiye. Fircawun Moosa kee Ahaaroonuh akah deecimeh ta bala daw-ishisheenimko Israa-eel xiyaw Masriiko yawcoona kinoonim akah warishe. Moosa dhaaco abe gedda lel Yalli amaa qaca Masriiko asac-ishe. Fircawun laakin ishi afcaado yiytirireyaako, Israa-eel xiyaw natsah yadawna ten mixabinna.

Sarrah, Yalli inkoh amaa Masri xiyaw cari bahayim laaxuuteenih akah badaanaakah akko abe. Fircawun afcaado titrireyaako, Israa-eel xiyaw yadawna akah masmaxinna.

Sarrah Yalli Moosak Fircawun nifidde gaxeyaako gombots caranalle xarho akah warishe. Amayim abe gedda lel Israa-eel xiyawko makiiki Masri xiyawko waaxelta le biyok irot qarbatalle akko yewce. Yalli Fircawun afcaado yiytirireyaako, Israa-eel xiyaw natsah yadawna ten mixabo.

Amaymik sarrah, Yalli mango ilaw kee irolle awcinnantiya inkoh yagdife barad dhirhiye. Fircawun Moosa kee Ahaaroonuh deecimeh: "Anu zambe abeh aniyo. Tadawna dhictan" ake. Amaymih Moosa dhaaco abe gedda caranko oobak yine barad daw-yerhxe.

Fircawun laakin malammih zambe abeyaako ishi afcaado yiytirire. Israa-eel xiyaw natsah yadwna lel ten mixabinna.

Amaymik sarrah, Yalli Masrille cawayni macat dhirhiye. Amaa cawayni lel inkoh amaa baradko raace ilaw yeylee.

Amaymik sarrah Yalli adooxa maxah dite alle dhirhiye. Masri xiyaw irolle yawcoona taanaanam fanah lel dite tekke. Amaa Israa-eel xiyaw alle yininille laakin ifi yine.

Fircawun, ta saggala balak sarrah gantah Israa-eel xiyaw natsah yadawna ten mixabinna. Fircawun aabbe wayemhi sabbatah lel Yalli sarroorimat bala dhirhiye. Tayim lel Fircawun xangal tasqayyaro kii yine.