8. Kitungan Josepon Do Anin A’sing Birindanji Adong Rabrabte

Ateng mihnum atiki, Bar Jakobon atalaiban ayamlingan, anin boi boi atimyimatin aonan, Joseph adongan anin abuhanganji do kimmedanji amelgijbin asan agarupa darakunaban appaietin.

Josepho adong anin abuhanganji ateng asanggimleji, itin asan gamlenden a’uanji Josephon adong ateng timyimetin do anin abuhanganji alankalingan danegodtin gamle ganumten gijjetin. Angganti Josephon abuhanganji amangban iyaitin, seletin aninji Josephon adong hamanhamle bebara maranji amang timlaji.

Josepon abuhanganji singan andreng yarraienji abmang, aninji Josepon asindri ridan ridle kimmeddan amihamlingan tabbubleji. Ansaring aninji kun sindrin a’uanji adong absuileji do tulab jontun kabhidle jumnetin gamle ogalte. Do Jakubon boi boi dukkadali.

Do bebara maranji Josepon adong misar dissaban urrungleji. Misar dissan nila alloban bo surda, ranaptidam dissan dakuli. Bebara mranji a boantanji joseph adong boanta margi desan anamhana mranji among temlaji. Joseph bangsalogi desa murda mranji adong gankileten, do josepon adong absitaeten.

Rajan asing boi joseph ampra balmantam aludben apsele ereted guijted, bindo joseph kitugan atemangling pintun a lumben absele asale. Anin boi brab-li do jolda sakhi baten abdusale joseph adong adhamham -le kraja sing apaetin. Kraja singan janag, Kitunlinga der der nan dakuli, bar kitungan aning adong absitaetin.

Bagu mihnum atiki, Josep erdanusa lingan kun sidkoija krajo sing lingligan dakule. Bo togal pharo, ayingante a mandra misorangi raja gamlaji, anin bagu ganumten gidle glaipiangi deli. Ganumten agramgaman agadlamben asan aganalamaranji janang oplingle adraptieji.

Kitungan Josep adong ganumten agalambin aranaptin tihyetin, anti asan Pharon Josep adong krojo singlingan saring urrunggaitin. Bar Josep Paron aganumte garamgaman apingbale gametin, “Kitungan gulji mihnum sikoija laapurgi janumjuman gadilti do gulji mihnum kantaran abmete.”

Paron Joseph asan boi moihdali bar anin Josep adong misar disalingan anab bagu surda danne mar abme’etin.

Josep mandranji adong gametin gulji mihnum bangsa ganaga tanartuman adetin ayamlingan ateng ganaga janumjuman tartumba. Anganti gulji mihnum kantaran yiraitin, Josepon mandranji yanti gamle barijlogi ganagan hangteji antin asan ganagan timetin.

Do kantaran misar dissaban tumtid, bindo kinan dissalingan uante Jakub do anin asiing birindanji basuleji.

Bar, Jakubon ganaga janumjuman ahibin asan misar dissaban a surda onanji appaietin. Abuhanganji ganagan ahilenji ayamlingan Josepon adong adnabmadeji.

Bogad aninji bandalinji peddi gamle abuhanganji adong tungjingle gijjetinji, Josep aninji adong gametin, batongdongbinti. “ hen buhangbin, Josepon! Ambin donghen buanta dagi timantimle irsin alumle Bindo kitungan banagsan asan irbanangsan handrametin! Yiraiba misarlingan adakunaba hen ambin do siing marbinji asan ganaga janumjuman tihtabin.”

Aganti Josepon abuhanganji su’ngan yarrin a’uanji ado’ng opunglaji Jakobon boi boi moih dale gametin Josepan kan sikkoij ameng daku,

Jakobon talaiba mar dakuli janangden, akuddub su’ng birindanji ampra misar disaban yiretin do aninji kuddubanji tidtin basulaji. Bar Jakoban akahidlin apurba, anin a’onanji adong absittaetinji.

Kitungan Abraam adong atiyetin a janibjib biranji Isakon, Jakubon, ansaring Jakubon a mihgal onaniji do aninji asing birindan hangleji. Bar Jakubon a mihgal onanji Israelanji amihgal teganji delaji.