42. Jisun Ruangban Yirte

Kan ayam ling Kitungan Jisun ado’ng karahind maranji amang saring abdietid. Salitin ahanangna maranji saring bagu mandra aboi gardaban yirreji. Engale yirreji, aninji Jisun apsele itinti tangadle kun abmele birrinji. Aninji dirdir linji do aninna Messian bindo anin kanabhidan deli. Nami Insolon gametid anin bar okkij yarmengli aniji unati dirtimbi kun ati adgalamedji.

Jisun adambanji yirre aninji ampra yiretid, bindo aninji anin ado’ng adnabmadanji itinti apsele aninji arberaji antiate opungetid, a yirren asuj dinnan ayam lingan itinti Jisun apsele tangadle kun akudub aninji anin ado’ng opungleji. Anin ogalleji anle sangai desan amanra batti arbirtai butinti Jerusalem atanangadan itidja adgalame.

Ansaring Jisun (Messia) apsele Kitungan abirnan itin gamte antati abganludetinji purban, tungmadgij maran gamedtid Messian kanalkalan do karahidan hangle (ir-bangsa maranji abaran batti) Bindo tummagij maran janang gametid anin yagi dinna lingan yar mengli.

Anganti aninji gardaban ardulaji titin bagu mandra adakunabin itsumlaji. Kun ayam sadlum yungan deli aninji anin ado’ng rangle gamleji anlen ampra dakuna. Bar anin aninji ampra su’ngan ganlinji. Aninji oruban a’gaganan apsele gobleji. Jisun rutipun hidaban hidable Kitungan ado’ng sinle pijpijetid. Anta tabdong, aninji abmadleji do anin Jisun na. Bindo kun ayam lingan, anin aganij gij lingan saring sadsadli.

Bagu mandra di-dargam arbirtaji kan ati Jisunna itin san gamlenden anganti Kitungan abirnan abganlud lalen anlen boi boi moihdalalen. Tabdong aninji Jerusalem yerrenji anganti aninji ardulaji aninji ahanangna maranji opengleji Jisun yermengli anin ado’ng agijlai.

Hanangna maranji arbirdalaji Jisun tabdo’ng si’ng lingan aninji amang lingan absujdam netid. Anin gametid, “Sanabyun debinti hanangna maranji ogandilaji anin aboi kulma bindo Jisun gametid itin asan abantongte? Itin asan kanati jardi gamle anogandie. Hen Jisun sihen do jinghen gijba. Anin kulma tid gamle abgijbin asan, anin janumjuman garetidji. Aninji asui ayon tiyleji, do anin kan ati jumetid.

Jisun gametin,Gamangtungan itinti abirna gametid ante akudduban hen apsele tangadte. “Itinti dongbin opunglai kun ati deti,” Ansaring Jisun Gamangtungan abirnan bangsale abganludetinji. Anin gametid, “Purban, kan ati tumadgij maran idolletid. Hen Messian, Hen kanalkalan hanglai, kihidlih do anabyagi dinna lingan karahid maranji amang saring yermengle dilinai.”

Tumadgij maran janang idoletid do hanagna marhenji Gamangtungan abirnan oblingtaji. Aninji kuddubanji ado’ng abyarjienabin apsele oblingleji, bogad aninji abyarjielinanji den, Kitungan apintunji tabmadte. Hangana marhenji kan birnan Jirusalem lingan a’oblingbin susulinji. Ansaring aninji kuddub mandranji amangban yirreji, Hen itinti lumtai do opunglabin kun akuddub a’sakkin a’dete.Bar kun akudduban hen apsele tangadle.”

Bakurdi (40) dinnan atiki lingan, Jisun ahanangna maranji amang lingan ateng ayam absuij damnetid. Botara, anin monloi sua saring a’ur mandraji amang absuij damnetid! Kan akuddub batti, anin ahanangna maranji amang abpemingdamlin do anin mengli, bar anin Kitungan arajaman apsele aninji ado’ng hanghangetid.

Jisun ahanangna maranji ado’ng gametid, Kitungan ado’ng hen ordaran,Ruangan do kudduban alananka ling danen tiyted. Antin asan nami hen do’ngbin opungtai: yirba do kuddub mandranji ado’ng hanangna marhenji abmeba.Kan ambrij lumba,u’an a onan do marid janggardan ahim lingan aninji ado’ng da’lingan tabubdan tiyba. Itinti hen bihlabin antati akuddub birnan amanibin asan hanghangbaji. Ayimba, Hen tordang ayam ambin ampora dakutinai.”

Bakurdi (40) dinna atiki Jisun karahidan saring dinetid. Anin ahanangna maranji ado’ng gametid,” U’ahen ranabtin endrang tiybinan sikkoija Jerusalem lingan basuba, Anin lanangkabin marid Janggardan appaitai.” Ansaring Jisun ruangban yeretid, bar yagatiran anin ado’ng aninji aganij gijan saring absasoetid. Jisun Ruangban yirre Gamantungan ajandrum siban goble kuddub janaban abhanetid.