38. Jisun Assanggim Maranji Asi lingan Sanurpiddan Deli

Dile mi’hnum, Jiudinji Anelai abdur lumleji. Kitungan yan gamle aninji ajujunji ado’ng Misar disa lingan boanta baran saring arab rabetinji asan Kan amanoi’h abduran deli. Bar yagi mi’hnum atiki Jisun abmang tra bayiran mandranji amangban hanangan ti-etid, Jisun ahanangna maranji ado’ng gametid do Jirusalem lingan aninji ampra Anelai abdur lingan moi’hnabin itsumetid, do anin titti kanabhiddan deti.

Jisun ahanangna marji saring Juda gamle bo mandra dakkule. Judan anappai maranji tangka munan adakkuleb mar dakuli, bindo ditordong anin kun muna lingan saring lebun jumbirnetid. Jisun do ahanangna maranji Jirusalemban ardulenji atiki, Judan Jiodi abmang god maranji amang yirretid. Anin Jisun ado’ng absuijbin asan dane god maranji amang saring lebun jalin Jisun ado’ng timetid. Jiodi dane maranji Jisun ado’ng Messian gamle adjaedanji ati anin galametid. Aninji anin ado’ng tuabteji gamle galametid.

Jiodi dane maranji, murda buyan batti anabhanan deliji, Jisun ado’ng asi linganji surpidbin asan aninji Judan ado’ng 30 tanka tiyleji. Tungmadgij maranji abirna ambrij kan ati deli. Judan dirnetid, lebun jalin, do sangai yiretid. Jisun ahambin apsele aninji ado’ng sayambin asan anin bangsa royongan saijetid.

Jirusalem lingan, Jisun ahanangna maranji ampra anelai abdur lingan moi’hlinji. Gaganan ayam lingan, Jisun dajingante ruttipun pangle pijpijetid. Anin gametid, “Nabba do kan ati jumba. Kan ati do’nghen na, itinti hen ambin apsele tiytai. Do’nghen ayimbin apsele ambin kan ati lumba.” Ednegoi, Jisun gametid do aninji apsele kahidte, do anin ado’ngan aninji apsele tiyte.”

Ansaring Jisun bo pinsamin lingan drakiya da’an hamle gametid,” kan ati gaba. Kan ati mihamhen Atabme Sanibdei biran do hen latai yanti gamle Kitungan pintubinji tabmate. Nami hen alumtahen ati ambin lumba, yanti gamle angante ambin agate do’nghen ayimte.“

Ansaring Jisun ahanangna maranji ado’ng gametid, “Ambin saring bo mandra do’ng hen surpidtih.” Ahanangna maranji kilkalkilamgi deleji, do aninji opungleji buttin kan ambrij lumte. Jisun gametid, “Butinti ado’ng hen kun rutipun pijle tiytai anin na janolda maran.” Ansaring anin kun rutipun Judan ado’ng ti-etid.

Judan rutipun panglen atiki, sonuman ado’ng lingan ganetid. Judan dungan dunglin Jisun ado’ng abhamhambin asan parusinji ado’ng sayamben yirretid. Kun ati togal ayaman dakuli.

Rengjumlenji atiki, Jisun do ahanangna maranji Jito baruban yerreji. Jisun gametid, “Nami atoggalan ambin kuddub do’nghen aomdate. Kan ati anidolan daku, ‘hen gupamed maranji ado’ng tidtai do kuddub murkundardanji barsinggardaigi detaji.’”

Pitoron abyar biretid, “Kuddub mandranji omdalamji janang den, hen do’ngnam ad-numrengai!” Ansaring Jisun Pitoron ado’ng gametid, “Sonuman ambin kuddubin apangbin asan itsumte, bindo e Pitoro, hen aman apsele garbirlai, do dirnanam ad-balae. Bar janang, nami toggalan, tadariman inrang ulen abmang, aman do’nghen ad-galamai gamle yagi tra sosotin.”

Pitoron bar Jisun ado’ng gametid, “Bogad hen kahidlihen janang den, hen angaja d’ong nam ad-sosolangnai!” Bar kuddub hanangna maranji janang etigoi gamleji.

Ansaring Jisun ahanangna maranji ampra Getsemeni darakunaban yerreji. Jisun ahanangna maranji ado’ng garbirnabin asan oblingetid yanti gamle aninji tanungjing lingan adgalueji. Ansaring Jisun garbirnaban yieretid.

Jisun yagi tra garbirnetid, “e ua-hen, bogad kan ati delin den, abasuyim gamle kan kanalkal ganagan agabin apsele tihdongih. Bindo mandranji apintu tadmadbin asan biggarda tanggoran agasa den, itsumnam ojoraieti.” Jisun aur danukkalingan dakule bar anin ado’ng lingan saring uhulan mihaman ambrij jorodle. Tanu-ulan tiybin apsele Kitungan bo Pisirdian appaiaitid.

Dile garbirnan takkudlin ayam, Jisun ahanangna maranji amangba dayarnaitid, bindo aninji dimadleji. Angante Jisun yagi tara yarren, Jisun gametid, “Denaba! Do’ng hen abhamhamten amandra tidne daku.”

Judan Jiudi dane maranji, do bo surda parjanji ampra yirraiji. Aninji kardiban do sittoij luddan panglaiji. Judan Jisun amang yiran iyrre gametid, “Limtam, hanghang mar,” do anin ado’ng kurkurtamle. Anin Jiudi dane maranji Jisun ado’ng ab-hamhambin asan ednegoi absuile abgijetinji. Ansaring Jisun gametid, “e Juda, “Aman kurkurtamle do’ng hen abhamhamle po?“

Sanu maranji Jisun ado’ng hamlenji adnang. Pitoron akardiban roilangle murda buyan aboanta ado’ng sabludetid. Bindo Jisun gametid, “Kardiban sabngaja! Do’ng hen arabrab bin asan u-ah hen ruang Pisirdian bo sanu margi appaibin asan gartai, bindo u-ah hen abirna mannibin deti.” Ansaring Jisun kun mandran alud absamangetid. Ansaring kuddub hanangna maranji omdale yirreji.