15. Janibjib Disan

Anab takud lingan Israellanji Kinan lingan aganbin ayaam dakuli, kun ati jibjibna dissan. Kun a’dissalingan Jeriko gamle bo gardaan dakuli. Kan agardaan rabrabbin asan unji manengan raddu kintalan dakuli. Joshuan bagu melgij maranji gardan apaietin. Kun gardalingan Rahab gamle bo jundardi boi dakunetin. Anin kun bagu malgij maranji adong soe-tin, do kun agarda saring aninji adong ardurbin asan sayametin. Anin alumetin agaramgam anin Kitungan amang dirneten. Aninji jibjiblinji do Anganti Jeriko gardan a’nabsihdan deti antin ayamlingan Rahab do asing maranji adong rab rable gardan an’bsiddan deti.

Israellenji janijib desan aganbin asan Jordan allo padbin deti. Kitungan Josuan adong opingle gamete, “buya maranji abmangnetiji.” Angante buya maranji kun alloban padjingleji, allo daan hanaben ringneten anten saring Israelanji asar labolingan halin allon padle yerreleji.

Jordan allo kuddub mandranji apadlenji atiki, Kitungan Josuan a’dong gameten boi boi ranaptidam deli janag den, Jericho gardan a radsumbin asan angter dakunaba. Kitungan mandranji a’dong gameten do gardan ayar yar maneng buya maranji do sanu maranji tudru dinnan sikkoija bo dinan bo tra erderlin aendungben dete. Bar buyanji do sanu maranji kun ambrij lumleji.

Kitungan ednegoi janang gameten do anabgulji dinnalingan Israellanji gardan ayar yar maneng gulji tara endungbin deti. Ansaring Buyanji a tattadu peddan pedetaji do kuddub mandranji uai sarangan bate guetiji. Kun ambrij aninji lumlaji.

Ansaring Jiriko gardan ayar yar maneng a kintal gungle! Do Israellanji gardan a kuddub janaban radsumlaji, Kitungan a bahenten ambrij lumleji. Aninji satta Rahab do asingmaranji adong akkabhidedji, do aninji Israellanji bati mailinji. Kinan lingan a dakkunlinji abegarda marangji angante amdanglaji do Israellanji Jeriko gardan radsumlaji, aninji ogandilaji do Israelanji anlen ampra janag sanuteenji gamle boi boi batonglaji.

Kitungan Israelanji adong bainle gameteji do ayiganti a parjanji Kinan lingan dakuji aninji ampra sanabyu sanibdeibiran alumdong. Bindo bo Kinan baiji aparjaling saring bo ompunji ahiman Gibeon, Josuan adong jaldale gameten do anlen Kinan desan saring boi boi sangai disan amandranji. Aninji sanabyu sanibdei biran alumben asan Josuan adong opungleji. Josuan do Israelanji abmangod maranji kan ate yaan tubtabe gamle Kitugan a’dong adnopunggedji. Anten apanadu aninji Gibeonji ampra sanabyu sanibdei biran lumleji.

Yagi dinnan atiki, Israel maranji galamlaji do Gibeon a mandraji Kinan lingan dakulinji. Aninji barablaji iten asan gamlenden Gibeon baiji aninji a’dong joldalaji. Aninji Gibeon ampra sanabyu sanibdei biran dakulaji iten asan gamlenden kun a sanbyu beran kitungan atemanglingan lumlaji. Asuyah ayam atiki Kinan lingan a-dakulinanji Amorite a-raja amdanggeted do Gibeon parjanji Israelanji ampra sanbyu sanibdei biran lumlaji, kun saring aninji a sanu maranji a boi dele ad’parjalen Gibeon a-sangemling sanulinji. Josuan sanayaman apsele Gibeon adong birna apaee-ti.

Josuan sanu maranji adong gudingle ruku eted. Tampagalan aninji Gibeon sikoija halin adulaji. Rayel tagaldan, aninji Amorait a sanu maranji adong abankaleji do aninji ampra sanulinji.

Kun a-dinna lingan Israellanji apsele Kitungan sanuneted. Anin abankale arelan bati ateng mandranji kahidleji.

Israellanji Amorait anasangimling yanti gamle ateng ayam sanulin abladnataji kun asan Kitungan uyungan a’dong ruanglingan tabnanggetin. Kitungan sanle Israellanji dailinji.

Atiki Kitungan kun asanu mandranji adong abladnaeted, Kinanlingan adakulinanji akuddub ompunji, Israel adong abgegebin asan rukulinji. Josuan do Israellanji mailin aninji adong abgegele absi’dleji.

Kun sanun atiki, Kitungan ajibjibneted adisa Israellanji akuddub birindanji adong tieti. Atiki Kitungan Israel disan ayar yar tannodban sanabyun bati dakuetin.

Ayinganti ayam Josuan taledbali, Israellingan akuddub mandranji adong gudingle abrukueti. Josuan kuddub mandran adong abkilkille gametin do Kitungan ayingan asanibdeibir Sinai barulingan tieti kanati manibin asan abjibjibetedji atiki kuddub mandranji Kitungan anosoi hambin asan jibjiblinji.