14. Ringring Tulablingan A’ardodgod

Kitungan Israelanji adong kuddub anosoijan aoplinggetin atiki do itin asan gamlenden anin aninji ampra asanibdei biran asan aninji kun ati amanibin deti. Anin Sinai barun saring aninji adong tangoreteji. Anin aninji adong janibjib disaban abardubin asan itsumeten. Kan adisa Kinan gamleji. Kitungan sundanggi aninji a mang a mang yeirti do kuddubanji sandungleji.

Kitungan Israelanji aparjanji adong kun disan atihbin asan Abraham, Isakon, do Jakubon ampra jibjibnetin, bindo kan adisaling bigarda bigarda jatimaranji dakuleji. Aninji adong kinan bai gamleji. Kinan baiji Kitungan adong adgankiledji. Aninji joldasuaman adong gankileji do irandih a pintu lumleji.

Kitungan Israelanji adong gametin, “janibjib disaban arduten atiki Kinan baiji adong ab-ladnabin deti. Ambin aninji ampra sanbyun adedong bar aninji adangardi onanji asidrung dongne, a’mbin kuddub akungdaijanji radsumba.

Anganti ayam Israellanji Kinan dissan a-tannod adulai, Israel mihgal Tegan saring mihgall mandra a’dong gudingeti. Ayiganti adesa a’ganbin deti kun adesan iten ambarij a’galambin asan loinle lointale agiedbin asan Mojeson hanghangetin. Aninji janang Kinan amandranji ranaptidam odie irranapti abmedle a gijbin asan iylaji.

Mihgel mandra Kinan a gidbin asan bakudi dinna hanagodlin yeraji, bar aninji yarrinaiji. Amandranji a’dong aninji gamleji, “labon boi boi paggadam do jandruman bangsa daku” bindo galji mandra gamleji, gardan boi boi ranaptidam do mandranji boi boi suradada! Bogad anlen sanulinben denaninji anlen adong abladnateji do kab hidtaji.

Tabdong, Kalebo do Joshua, anab bagu melgid marji gamleji, “kan ate jaded na Kanan a’mandra ji lingka do ranbatidam, bindo anlen daitinbi aninji ladtinji! Kitungan anlen asan sanutin.

Bindo mandranji Kaleb do Joshua abirnan ad’maniedji. Aninji Mojes do Arunon a-lanagka lingan barableji do gamleji, “aman iten asan anlen adon kan barantonghid dagi a-tulab ling urunglalen? Alen Misorlingan dakulinbinnan den detibadih. Bogad anlen kun adisan ganlabinden sanulingan, anlen kahidlangtin Kinan baiji onlenji do ansololenji adong boanta baran tibtaji।” Mandraji Misor dissan ayarnabin apsele bo danemar sedaleji.

Ayinganti ayam mandranji kan ambarij gamleji, Kitungan boi boi barabli. Anin kun maina tanbusingban anin iyetin, “Ambin asanggimling hen atanangte. Antin asan kuddub kan ring ring tulablingan ambin ae-ndongte. Kuddubbin butinti bokudi minhnun saring aur aninji kahidtaji aninji angadeli janang kun desan adgijeji. Joshuan do Kalebo satta disalingan ganteji.”

Anganti Kitungan birnetin mandranji amdangleji, do Kitungan gameted, aninji pintun alumlenji ati garroidlaji. do Kinan baiji ampra a-sanuna asan gabrijilinji. Mojeson opungile gametenji do ayeir dong itin asan gamlenden Kitungan anlen ampra adyeire-e, Bindo aninji a-bernan ad-namdangged ji.

Kitungan aniji ampra sanu kuttaban ad-yeired, bar Kinan baiji abladnaleji do ateng mandranji adong tuableji. Atiki Israelanji Kinan saring da-yeirlinaji. Bakudi mihnum, aninji ring ring tulab lingan endunglaji.

Kun Bakudi mihnum aninji ring ring darakunaban endunglaji, Kitungan aninji apsele ganagan tietedji. Anin ruangan saring pupun apayeited, ahiman manna. Aninji yanti gamle jelun jumteji anti asan Anin ruangan saring gudi ontidanji janang a-tambu sing banji appaietin(sarigoij aontiddanji). Kun a-kuddub ayamling, Kitungan aninji a’sindrinji a’ridbin do panduiyanji agoibin adtied.

A’gabin asan da’an janang Kitungan tietin, Kitungan rubmangdagi arenglingan saring daan amdungetin. Kan akuddub hangleji janang den, Israel maranji Kitungan do Moses asanggimling birdungleji. Deli janang den, Kitungan aninji amanganji rojol dakuli. Anin a kuddub sanibdeibiran sanle Abraham, Isakon do Jakob abirndanji apsele lumetin.

Bo ayaman mandranji amangalingan daan agasa dakuli, Kitungan Mojeson adong gametin, “arengan oblinga do kun saring daan dungtinai.” Bindo Mojeson arengan adnetied. Anten adulna arengan adong bagu tra dangun batii tidetin. Kan ambrij, anin Kitungan pudyinggetin. Kuddub mandranji apsele agabin asan Daan arengan saring dungnaitin, bindo Kitungan Mojeson alananka boi boi barabli. Anin gametin, “aman kan a kuddub baran lumlen asan aman janibjib disaban adgane.

Israelanji ringring darakunaban bakudi mihnum endunglenji atiki, Kitungan asangimlenji amandraji kuddub kahidleji. Ansaring okij Kitungan janibjib dissaban tangorle urrunggetinji. Mojeson kun ayamlingan boi boi talaibali, antin asan Kitungan kun adissa abardubin asan Josuan adong sedaetin. Kitungan Mojeson adong jibjile gametin do bo dinna Mojeson ambrij bo tungmadgij mar anappaian deti.

Antin saring Kitungan Mojeson adong opingle gametin do aman barun alangka daija bar jenibjib dissan igija. Mojeson janibjib dissan gijetinn bindo Kitungan kun adiissan a ganbin asan adtied. Atiki Mojeson kahidli do bakudi galji dinna sikoija sanabyu garbiran lumleji. Josuan tabme anabhanamar deli. Josuan boiboi bangsa abmang god mar itin asan gamlenden anin Kitungan aman dirnetin do abirnan manietin.