12. Hanagoddan

Israelanji Misar dissan aomdabin asan boi boi moihdaleji. Aninji okij buanta maranjitid, do aninji janibjib disaban yerteji! Israelanji itinti ati garleji, manan sunan, rannan do kuddub janatidam janabanji janang misarranji tiyleji. Bigarda dissan saring butinti kitungan amang dirlinji Israelanji Misar dissan aomdalenji adnang aninji ampra yertumlaji.

Tamban adnang bo surda sundangan ambrij lubtiran abmangnetin. Togalan adnang bo surda sundangan ambrij toogin abmangnetin. Aninji ahanagodlinanji adnang, Kitungan, butinti tarwbsunlingan do toogisunlingan dakuli, tordong ayam aninji ampra hanetin do tanggoretin. Bar kudubanji anin adong sandungleji.

Asui ayam atiki, Paron do adisaling a-mandranji amonanji bandaleji. Aninji bar okij Israellanji adong boantamar abmeben itsumleji. Anten asan Israellanji adong sandung gongleji. Kitungan aninji amonanji bandaetin. Itin asan gamlenden kuddub manranji do Israellanji a’Kitung Paron do Misoranji a’Kitung saring a’ur ranabtidam galametiji gamle Kitungan kan ambrij lumetin.

Ayinganti ayam Israelanji gijleji do Misor a-sanu maranji a-mangbanji yirtaji, aninji ogalleji do aninji Paron asanu maranji do ganingan atarangdi lingan gegelaji. Aninji boi boi batongleji do guleji, “itin asan anlen Misor omdlabi?” Anlen nami kaihdlangtin.

Mojes Israelanji adong gametin, “abantongdong! Nami Kitungan ambin apsele sanutin do anin rabrabbintin.” Ansaring Kitungan Moses adong gametin, “kuddub mandranji ganingan adamba ayirbin asan aponga.”

Israelanji do Misoranji atarangdi lingan tarub sundangan dennetin do togalan ayam lingan toogi sunan deli. Misoranji togalan ayamlingan Israellanji adamba rabti adnarduedji.

Kitungan Mojeson adong ganingan alaningka sinam tirida gametin. Atiki Kitungan rangen bati ganingan kandrabardi do jandruom saring kietin, do kun tedti ganinglingan tangoran gadilli.

Israelanji ganingan atarangdi bagu maneng daan akintal bati asar solingan halin yirreji.

Atiki Misoranji Israelanji ardurlinji ati gijleji. Misoranji bar okij aninji adong sandong gongleji.

Antin saring aninji ganingan atangorlingan sanle Israellanji adong sanleji, Bindo Kitungan Misoranji adong kanalkalan do kurtan janang kuddub yirre adraptieji. Aninji guan gule gamleji, “abrijnaba! Kitungan Israellanji apsele sanutin.

Kuddub Israelanji ganingan amihtal arduleji. Atiki Kitungan Mojes adong da’an alanka sinam urpada gamle gametin. Angante Mojeson kun ambrij lumle, da’an Misoranji a’sanu maranji alanka lingan galuli do abmang ambrij yernetin. Kuddub Misor sanu maranji tabubleji.

Anganti Israellanji Misoranji a’karahid gidleji, aninji Kitungan amang dirlinji. Aninji Mojes Kitungan a’tungmadgijmar gamle dirlinji.

Israelanji janang boi boi mohoihlinji iten asan gamlenden kitung aniniji adong karhidan do boanta baran saring tandietinji. Kan saring aninji kitungan abernan amanebin do a-gankilbin asan anurdagi delaji. Israellanji ateng keninan kinle abdurlinji intin asan gamlenden aninji tabme anuran hanleji do Ktungan sinleji itin asan gamlenden Anin Misar asanu maranji saring aniji adong rabrabetiji.

Kitungan Israellanji adong gametin Kitungan yan gamle Misoranji adong abladnaetin do buanta baran saring anuran ayembin asan dile mihnum abduran lumbin deti. Kun Abduran Anelai abduran gamle ganudingan deli. Kan anayim dina lingan bugi murkundadan tuaban tuable a-jelun balle gabrungsal rutipon bati ayimba.