46. Saawuli Kiristaana Ikki

Saawuli Isxifaanoosi shitu mannooti imaana agari wedellichaati. Yesuusa diammanino; kunnira ammanaasine gadadisino. Labbaanna meya manna usuru mine tuganni Yerusaalamete minunni mine sai. Qeesootu roorrichi hakkiicho noo kiristaana amade Yerusaalame abbate Demaasiqo katama ha’ranni gede fajjoote uyisi.

Saawuli Demaasiqo ha’ranni hee’reenna gordunni wara’a yiino xawaabbi gaangaawisira xawi. Mitte huuro, <<Saawuli! Saawuli! Mayira xiiwattoe?>> yitanna macciishshi. Saawuli, <<Mooticha, ati ayiti?>> yee xa’mi. yesuusi, <<Ati xiiwaattoehu ani Yesuusaati!>> yee dawarisi.

Saawuli gotti yaanno woyite la”a hoogi. Jaallasi massage Demaasiqo massitusi. Saawuli sase barra mittoreno di”itino diagino.

Demaasiqote mittu Hanaaniya yinanni rosaanchi no. Mootichu Hanaaniyara, <<Saawuli noowa mari. Ille fa’nanno gede anga aanaho worisi>> yii. Hanaaniya, <<Mooticha, kuni manchi ammanaasine asse xiiwino gara macciishshoommo>> yii. Mootichu qole, <<Mari! Ayihudetenna wole gosara su’ma’ya lallawe kulara dooroommosi. Ane su’mira qarra adhanno>> yiisi.

Kunnira Hanaaniya Saawuliwa mari. Anga aanaho wore, <<Kawiira dagganna leellihehu Yesuusi ille fa’natto gedenna Qullaawu Ayyaani wo’mannohe gede atewa soyinoe>> yii. Saawuli hakkawoyintenni la”a dandii. Qoleno Hanaaniya cuuisi. Hakkunni gedensaanni Saawuli sagale ite dhaabbati.

Saawuli hakkawoyintenni, <<Yesuusi Maganu Beettooti!>> yaanni Demaasiqote Noo Ayihudera kula hanafi. Ayihude ammanasine gudate wo’naalino manchi xa Qole Yesuusa ammanasira dhaggeeffattu! Saawuli Yesuusi Buuramino Moote ikkinota buuxise Ayihude ammansiisi.

Lowo barri gedensaanni Ayihude Saawuli shitara ma’litu. Shitasira katamu waalchira agaranno manna sokku. Saawuli kayinni malansa macciishshino; jaallasino gate fulanno gede kaa’litinosi. Mitto hashsha gimboolaho worte katamu huxxi kinchunnihu aanaanni qolte dirrissinosi. Saawuli Demaasiqotenni gate fulihu gedensaannino Yesuusire kula diuurrisino

Saawuli rosaanosi ledo xaadara Yerusaalame ha’ri; insa kayinni waajjitinosi. Hatte yannara Barnabaasi yinanni ammanaanchi Saawuli Soqqamaasinenniwa haa’re masse Yesuusire wo’ma giddonni asse kulino gara hasaawinsa. Hakkunni gedensaanni rosaano Saawuli haadhusi.

Yerusaalamete iillinonsa gadadishshinni darantinori mitu mitu ammanaasine xeertidhe Antsookiya hadhe Yesuusire kultino. Antsookiyaho noo rooru manni

Ayihude di”ikkino; ikkollana umi yannara hakko noohu haammatu manni ammani. Barinabaasinna Saawuli tenne haaro ammanaasinera ledde Yesuusire rosiisatenna beetekiristaane jawaachishate hakkiira hadhu. Yesuusa ammantinore umi yannara Antsookiyaho <<Kiristaanaho>> yini.

Mitto barra Antsookiyaho noo kiristaani qatunte huuccidhanni heedheenna Qullaawu Ayyani, <<Woshshoommonsa looso loossanno gede Barinabaasinna Saawuli badde”e>> yiinsa. Kunnira Antsookiyu beetekiristaane soqqamaano Barinabaasiranna Saawulira anga aanaho worte Magano huuccitunsa. Hakkunni Gedensaanni wole haammata darga Yesuusiha Dancha Duduwo kultanno gede Sokkunsa. Barinabaasinna Saawuli addi addi gosa mannira rosiissu; lowo manni Yesuusa ammani.