14. HALALLITTE GOBBARA RAATAABBU

Maganu insa ledo eino gondoori ledoha ikkino seera agadhitanno gede Israeelootaho kulinsahu gedensaanni, Siina Ilaalnni ka’e hadhu. Maganu mannasi Siina Ilaalinni Kana”aani yinannitewa hexxote gobbawa haa’re ha’rinsa. gomichu heelliicho Kana”aani geeshsha albansaanni hadhu. Insano hoode hadhu.

Maganu hexxote gobba sirchinsara aannonsa gede Abirihaamira, Yisihaaqiranna Yaiqoobira hexxo uyinonsa. Ikkollana xa hatte gobbara addi addi gosa heedhanno. Insane Kana”aanootaho yinanni. Kana”aanootu Magano dimagansidhanno woy Isira dihajajantanno. Kaphaano maganna magansidhanni lowo bunshe loossino.

Maganu Israeelootaho, <<Hexxote gobbara noo Kana”aanoota baala hunne.Insa ledo namoontinoonte; balloomano xaaddinoonte. Misillansa baala co’o assitine gudde. Anera hajajama gibbiniro, ane darga insamaganna magansidhinanni>> yee coyi’rinsa.

Israeelootu Kana”aani danna iillitu yannara, Muse mittu mittunku Israeelete ga’re giddonni mitto mitto mancho, mitteenni tonaa lame manna doori. Hadhe gobba malabbannoro dooyyitanno gede biddishsha uyinsa. Kuni manni jawaatahoro woy wolqiweelohoro afate Kana”aanoota dooyya hasiissinonsa.

Tonaa lamu manni Kana”aani shoyilloo barra hadhe higgino. <<Baatto lowo Geeshsha shaqqadote. Jajjuno baete>> mannaho kultu. Tonnu dooyyaano kayinni<<Katamu wolqaataamoho, mannuno kee’maddaho! Qansummoro addaho qeeltannonke; shitannonke>> yitu.

Hakkawoyintenni wole lame dooyyaano Iyyaasunna Kaaleebi, <<Kana”aani manni Haxiriggootanna wolqaataamma ikkansa halaaleho; ikkollana addaho Qeelleemmonsa! Ninkera Maganu olamannonke!>> yitu.

Mannu kayinni Iyyaasunna Kaaleebi yitinota dimacciishshino. Museranna Aaroonira hanqite, <<Kawa bushawa mayira abbitinoonninke? Olu gudankentenniqoleno meentonkenna oosonke borojje ikkitantenni Gibitsete hee’noommoro woyyannonkehu baino>> yitu. Kunnira galagalche Gibitse haa’re ha’rannonsaha doodhate hasidhino.

Maganu lowo geeshsha hanqe xaadu dukkaniwa daye, <<Ki’ne anera gara gibbinoonnie daafira, mannu baalu halallitte gobbara tootayyaawanno. IyyaasunnaKaaleebi agurranna lemuu dirihunna hakkuyi alihu baalu konniicho reyitannota ikkinnina hexxote gobba die’anno>> yiinsa.

Mannu konne coye macciishshe cubbo loosansara dadilli. Olu bagado anga adhite Kana”aani manna qassara hadhu. Muse Maganu insa ledo nookki daafira hadhannokki gede qorophisiisinonsa; insa kayinni dimacciishshitinosi.

Maganu ledonsa olunniwa diha’rino; kunnira qeelantino; mannuno lowohu reyino. Hakkunni gedensaanni Israeelootu Kana”aaninni higge halallitte gobbara shoyilloo diro raataabbino.

Israeelete manni halallitte gobbara raataabbuhura shoyilluu diri giddo Maganu itisinonsa. Gordunni, <<Menna>> yinanni sagale uyinonsa. Maalano Ittanno gede qachansa hanshaqqe soyinonsa. Hatte yanna baalantera Maganu imaaninsanna koattensa gooffannokki gede assino.

Maganu maalalete doogonni waa nafa kinchu giddonni fushshinonsa. Kuni baalu ikke hee’reennanni Israeelete manni kayinni Maganohonna Musera duu’re gungumino. Ikkeennano Maganu Abirihaamira, Yisihaaqiranna Yaiqoobira uyino hexxo disoorrino.

Mannaho wayi horonta noonsakki yannara, Maganu Musera, <<Kinchoho coyi’ri; giddosinni wayi fulannona>> yiino. Muse kayinni kinchoho coyi’ra agure lame hige siqqotenni ganino daafira mannu baalu albaanni Magano shollishino. Mannu baalunku aganno gede, wayi fulino; Maganu kayinni Musera hanqe, <<Hexxote gobba dieatto>> yiinosi.

Israeelootu shoyilloo diro halallitte gobbara raataabbuhu gedensaanni, Maganoho gara gibbinori baalu reyitino. Hakkunni gedensaanni manna galagalche hexxote gobbawa haa’re ha’rinsa. Hatte yannara Muse geedhe no; kunnira manna manna massaga kaa’lannosi gede Maganu Iyyaasu doori. Qoleno Maganu mitto barra Muse gedeeha wole himanaancho soyanno gede hexxo uyi.

Hakkunni gedensaanni Muse hexxote gobba la”anno gede ilaalu birxe fulanno gede kulisi. Muse hexxote gobba lai; ikkollana Maganu hatte gobba eanno gede difajjinosi. Hakkunni gedensaanni Muse reyi; Israeelootuno sajjuu barri geeshsha manchittu. Iyyaasu haaro sooreessa ikki. Iyyaasu Magano ammaninohanna Isira hajajamannoha ikkinohura dancha sooreessaati.