25. शैतान यीशु की परीक्षा लेसे |

यीशु को बपतिस्मा लेन को तुरन्त बाद मा , पवित्र आत्मा न ओला जंगल मा लिजाईस | यीशु वहाँ 40 दिवस अखिन 40 रात वरी होतो | वन समय मा वन उपवास करिस , अखिन शैतान न यीशु को जवर आएकर पाप करण लाईक ओकी परीक्षा लेईस |

पहीले , शैतान न यीशु सीन कहीस , “ अगर तू परमेश्वर को टूरा आस त एन गोटाहिन ला रोटी बनाए दे की तू खाए सिकजो ! ”

पर यीशु न शैतान सीन कहीस , “ परमेश्वर को वचन मा येव लिखीसे , ‘ जिंदो रवन लाईक आदमी ला मात्र रोटी किच जरुवत नाहाए , पर उनला पुरो वन बातहिन की जरुवत से जो परमेश्वर ऊनको सीन कसे ! ”’

तब शैतान यीशु ला मंदिर को सबलक ऊंचो सेंडी पर लिजाईस | वन ओको सिन कहीस , “ अगर तू परमेश्वर को टूरा आस त यहाँ लक खालत्या कूद जाए , काहेकी लिखेव से , ‘ परमेश्वर तोला उठावन लाईक आपरो स्वर्गदूतहिन ला आदेश देए की तोरो पायहिन ला गोटा लक ठेस नही लग | ”

पर यीशु न ऊ नहीं करिस जो शैतान न ओला करण लाईक कहिहोतीस | एको बजाय, वन कहीस , “ परमेश्वर सबलक कसे , ‘ तू प्रभु आपरो परमेश्वर की परीक्षा नोको करुस | ”

मंग शैतान न ओला दुनिया को पुरो राज्य ला देखाईस | वन ओला देखाईस की वय केतरा ताकतवर होता , अखिन वय केतरा सम्पन्न होता | वन यीशु सिन कहीस , “ मी तोला यव पुरो देए देऊ अगर तू टोघरा टेक सारी मोरी उपासना करजो | ”

यीशु न जवाब देईस , ‘ अ शैतान , मोरो जवर लक चली जाए ! परमेश्वर को वचन लक ऊ लोखहिन ला आदेश देसे , ‘ केवल आपरो प्रभु परमेश्वर कीच आराधना करो | परमेश्वर को रूप मा केवल ओको आदर करो | ”’

यीशु न शैतान की परीक्षा लक हार नहीं मानिस , एकोलाईक शैतान ओको जवर लक चली गएव | तब स्वर्गदूत आयकर यीशु की सेवा करण लगया |