16. Wong-wong yang Ngebebaske

Abes Yosua mati, wong Israel ni idak noroti Allah. Dio wong idak ngoser siso wong Kanaan, jugo dak noroti hokom-hokom Allah. Wong-wong Israel mulai nyemba dewa-dewa Kanaan, bukannyo nyemba ke sikok-sikoknyo Tuhan yang bener. Bangso Israel dak katek rajo, tros sloro wong ngelakuke apo yang dio wong peker bener.

Karno bangso Israel dak norot samo Allah, laju Allah ngokom bangso Israel dengen caro ngebiarke dio wong dikalake moso-moso dio wong. Mosonyo ni maleng dari wong Israel, ngancorke harto bendo, tros banyak ngebunu wong Israel. Pas la betaon-taon dak noroti Allah tros ditindes ole moso-mosonyo, wong Israel betobat jugo mintak Allah nyelametke dio wong.

Jadi Allah nyedioke pembebas ontok dio wong. Pembebas ni nyelametke dio wong dari moso, jugo gawak pedamaian di Israel. Tapi abes tu dio wong lupo pasal Allah, tros mulai nyemba berhalo lagi. Laju, Allah ngebiarke wong Midian, suku yang tinggal parak dengen bangso Israel, ngalake wong Israel.

Wong Midian ni ngambek sloro asel panen wong Israel selamo tojo taon. Bangso Israel takot nian sampe-sampe dio wong singitan di goa-goa supayo dak ditemuke wong Midian. Akernyo, dio wong mintak tolong Allah supayo dislametke.

Kapan ari, ado lanang dari Israel yang benamo Gideon. Diem-diem dio manen gendum supayo dak dipaleng wong Midian. Malekat Allah dateng ke Gideon, ujinyo, “Allah ado samo kau, prajoret yang kuat! Pegi tros slametkela wong Israel dari wong-wong Midian.”

Ubaknyo Gideon punyo meja pesembahan ontok berhalo. Allah ngongkon Gideon ontok ngancori meja pesembahan tu. Tapi Gideon takot samo wong-wong, jadi dio nunggu sampe malem. Abes tu diancorinyo meja pesembahan ontok berhalo tu sampe bekepeng-kepeng. Dio ngebeken meja pesembahan baru ontok Allah di tempat tu, tros nyembake kurban ontok Allah.

Besok paginyo wong-wong mara nian pas jingok meja pesembahan tu ancor. Dio wong pegi ke ruma Gideon nak ngebunu Gideon. Tapi ubaknyo ngomong, “Ngapo kamu nak nyubo nolong dewa kamu? Amen dio dewa, dio pasti pacak ngelendongi diri dewek!” Karno ubaknyo ngomong cak itu, laju wong-wong itu dak jadi ngebunu Gideon.

Tros wong Midian dateng lagi ontok maleng dari wong Israel. Dio wong ni banyak nian sampe dak pacak dietong. Gideon manggel wong-wong Israel supayo bekompol ontok betempor. Gideon mintak duo tando dari Allah ontok ngeyakenke dio amen emang Allah tu bakal makek dio ontok nyelametke wong Israel.

Petamo, dio narok kaen di tana tros mintak Allah ngebiarke embon pagi nyampak di kaen tu bae bukan di tana. Allah lakuke tu. Malem besoknyo, dio mintak supayo tana yang basa, bukan kaennyo. Allah lakuke tu jugo. Keduo tando ni ngeyakenke Gideon amen Allah bakal makek dio ontok nyelametke Israel dari Midian.

32.000 tentaro Israel dateng ke Gideon, tapi uji Allah itu kebanyakan. Laju Gideon balekke 22.000 wong yang takot nian betempor. Allah ngomong itu mase kebanyakan. Laju Gideon cuman mele 300 tentaro bae.

Pas malem tu, Allah ngomong samo Gideon, “Pegila ke tenda-tenda wong Midian. Pas kau denger apo yang dio wong omongi, kau dak bakal takot lagi.” Laju malem tu Gideon pegi ke tenda-tenda tu, tros denger tentaro Midian yang lagi nyritoke pasal mimpi ke kawannyo. Uji kawannyo tu, “Mimpi ni artinyo Gideon bakal ngalake Midian!” Pas Gideon denger omongan tu dio muji Allah.

Abes tu Gideon balek ke tentaronyo tros ngenjok dio wong maseng-maseng terompet, guci, samo obor. Tigo ratos tentaro tu ngepong tempat wong-wong Midian tedok. Dio wong galo gawak obor-obor tu di jero guci supayo dak tejingok.

Abes tu, dio wong ngancori sloro guci tempat nyingiti obor tu bareng-bareng supayo pacak nyingok api obornyo. Dio wong niup terompet tros mekek, “Pedang demi Allah samo demi Gideon!”

Allah ngebeken wong Midian bingung, laju dio wong saleng serang samo saleng bunu. Langsong bae Gideon ngongkon wong-wong Israel laennyo dari ruma ontok ngejer wong Midian. Wong Israel banyak ngebunu wong Midian tros ngejer sisonyo metu dari tana Israel. 120.000 wong Midian mati ari tu. Allah la nyelametke wong Israel.

Abes tu, wong-wong Israel nak jadike Gideon rajo dio wong. Gideon nolak tawaran dio wong secaro alus, tapi Gideon mintak sebagean dari anteng-anteng emas yang maseng-maseng dio wong la ambek dari wong Midian. Gideon nrimo banyak emas.

Gideon makek emas tu ontok ngebeken baju kosos pecak yang dipakek imam besak. Tapi wong-wong mulai nyemba baju tu pecak berhalo. Laju Allah ngokom wong Israel lagi karno dio wong nyemba berhalo. Allah ngebiarke moso-moso dio wong ngalake dio wong. Akernyo dio wong mintak Allah ontok nolong lagi, tros Allah ngerem pembebas laen.

Orotan duso, hokoman, petobatan, samo pembebasan diulang bekali-kali. Selamo betaon-taon Allah ngotos banyak pembebas yang nyelametke Israel dari moso-moso dio wong.

Akernyo dio wong mintak rajo ke Allah, rajo yang cak bangso-bangso laennyo. Dio wong mintak rajo yang jolor, kuat, jugo yang pacak ngawak dio wong di petemporan. Sebenernyo, Allah dak seneng samo pemintakan ini, tapi Dio ngabolke pemintakan dio wong.