41. ዋቀ ዬሱስ ቶቶፐ ኻሼ

ኤቴ ፎልሶወ ዬሱስ ፈንሴን ከመዬ፥ ሳራሴኔ አአይሁት አመንንክንን ፕላቶስ ከፖፐ ኣኔን ከ እሽ ክዴኔ፥ ‹‹ደርተምፐይተሴ ዬሱስ ኩያተ ሴሰ ከመዬ ቶቶፐ እንኻ ክዴ፡፡ ሴመለ አከ ተማሬዋድ ፑካድን ሀንን ከን ኪንን፥ ‹ቶቶፐ እኼ› ኡፕናተኤ፥ ነመ ተከ አከ ሀውሎሴ ቶይቶ ኮደ እፐርፓችስን።››

ፕላቶስከ ክዴ፥ ‹‹ፎልሶወ ተከ ተከ ቄደከ አከ ኤተንንተን ቀረ ቶይተቺሰ።›› ሴመለ እከ ኩለይሱመ አሀውለ ቱረዬ ደካሴ ቀረ ኮጴተ ቶሜን፤ ከ አከ ነመ ፑካድን ሀንን ኡፕናተኤ ኤዬ ፎልሶወ ቃትሼን፡፡

ኩያተ አዬሱስ ሀውላሜ ከመ ቀቴ ሰንፐተ አአይሁት፡፡ ኦረ አይሁት ኩያሴትይ አከ ፖረ ሀውለለ ኦፐ ኣነኔኤ እሾተ ፈቀተምንክቶ፡፡ ሴመለ ኩያተሴ አሰንፐተ አአይሁት ከመ ቀቴዬ፥ ቴይከንተ ከረኔ እስከተ ሌከይተ ፑከ ዬሱስ ቁደ ሽቶተ አፕለ ዳተ ሀርምሰዴ ከ ሀውላሴ አዬሱስፐ አንተ ኸኤ፡፡

ቱርቱፓተኤ ፒተከ አከተ ሌሌህቴ፡፡ ኤርከምፐቶተ አሀንካደ ምነ ለአይንቶ ከ ሞንተ ቁደ አካቴ። ከ ደከሴ ኩለይሱመ ሀውለ ቱረ ዱፌን አሌ ሱክሴ ከ ቀረ ኩቲቴ፡፡ ፎልሶዋሴኔ ሀውለ ቶይትነከ ፉሬን ከ አክመ ኦረ ሌኤ ምነ ፒተ ሴሄን፡፡

እስከተሴ ኤቴ ሀውለሴ ከፐ ከዬዬ፥ ኤርከምፐቶተሴ እሾተኤ ሌልቴ ከ ኪቴ፥ ‹‹እንፉረን! ዬሱስ አሬዬን ቾ፡፡ አክመ ክዴ ቶቶፐ እንኸአ ምነኤ፥ ቶቶፐ እኸኤ! ሀውላድ ኔፎ ኾየ አሬ ቶየ።›› እስከተሴከ ሀውለሴ ከረንዴለ ቶዬ ከ ፖረሴ አፑከ ዬሱስ ኦፐ ኻዬን ከሱ አኬ፡፡ ፑካድ ኾር ኤዬን ቾ!

ሴከመዬ ኤርከምፐቶተሴከ እስከተሴት ሌልቴ ከ ኪቴ፥ ‹‹ኣነ ከ ተማሬወ ሌለ ከ ክደ፥ ‹ዬሱስ ቶቶፐ እኸኤ፥ ፒተ ኬልለ ኦፐ እሽን ቱረ ቀተ።› ››

እስከተሴከ ፉረ እሾ ኸሰ ኩተን እመካዴ፡፡ ከ ኦቶቶሴ አፈየ ተማሬወ ቶሬተ ጨርጨርተን ህሬ፡፡

አእስከተሴ ኦቶተሴ አፈየ ተማሬወ ሌለ አንተ ቀረ ቾዬ፥ ዬሱስከ እሾተ አካዴ፤ እሾተከ እሽ ሰከተዴን፡፡ ዬሱስከ እሾተ ክዴ፥ ‹‹እንፉረን፡፡ አከ ኬልለ ኦፐ ዴአኔኤ ተማሬዋዮ ሌለ፡፡ ኤዬኤ አነ አከኔይ።››