23. ደሎተ የሱስ

ማርያም ሀንቄለይተ ተከ ዮሴፍ ክደሞኤ ሄምተ ዳሰምቴ፡፡ ዮሴፍሴ አእሽ ሄምተ ዳሰምቴ ኤቴ አከ ማርያም ህቴ ደከዬዬ፥ እኖሴን አከ ኻድን ኮድንን ኡፕናዴ፡፡ ኡመ ማርያም ጬርሰን ፋኔ፤ ሴመለ ጨው ክዴተ ከ አሌ እሼተ ዲሰተ ድከዴ፡፡ አሴዴን ኮንን ቱረኔ፥ ኤርከምፐቶተከ ዴቴ ከ ኦልሰን እሽ ሃሰወቴ፡፡

ኤርከምፐቶተከ እሽ ኪቴ፥ ‹‹ዮሴፍ! ማርያምሴ ኬ ዳሰምቴ ሄሜተን ፉረን፡፡ እነ ከርቶፐ ቀፕተ ሀቱረ ቁልቁሎታትን ህቴይ፡፡ እነ ዲርተኤ ኻይተ፡፡ መኻድ ኔፎ ዬሱስ ኪተከ ሀሌተ (እን ክዴተ፥ ‹ያህዌ እድንን› ክዴተ)፤ ማነ መለ፥ ኦራድ ጩፖታይሾ ኦፐ ድንሸይ፡፡››

ሴመለ ዮሴፍከ ማርያም ሄሜ ከ አከ እስከቴታድ ኮድቶኤ ትካድፐ ቴየዴ፤ መ ኾር ሀከ ኻይንቶኤ እሼተ ኦል እንሙክኔ፡፡

ማርያም ኤቴ ክሴታድ አኻየ ከይቴዬ፥ ስትይ መንክስቴተ ሮም አከ ነመ ፕሰ ከተመ ኣከዳሶ ኦፐ ከላዴን ኦፐ ኣኖ ከ ድከሞ ሌልቴ፡፡ ዮሴፍ እሾ ማርያምከ ከተማሴኔ አእሽ ከለን ናስሬት ዴሰ ፔቴልሄምሴ አንተ ሴከ ኦፐ ኣኔን፤ ማነ መለ፥ ከተመ ፔቴልሄምእ ኣከሴ ኻይሾ ታውት ኤዬ ዴለዴይ፡፡

ኤቴ ፔቴልሄም ከዬኔዬ፥ ፖረ ምክተኤ ደፔን፡፡ ፖረ አቴዬን ኔፎ፥ ሞነ ሎአለ ፐተ። ኤቴ እነ ዴለዴኔዬ ሎሸ አቀረ ሙክሸን ቆተን ክንን መለ፥ ኣየሶ ታማረፔ ሙክሴ፡፡ ከ መኻድ ዬሱስ ክዴን፡፡

ሀልኬስትይ፥ ስክመየ ለኮፐዬ ሆሬተ ስክነ ለመየ ፖረ ዴሆፐዬ ቸ፡፡ አእስቀረን ኡፕንን መልይ፥ ኤርከምፐቶተ ለአይንቶከ እሾነ አካቴ፤ እሾተከ ፉሬን፡፡ ኤርከምፐቶተከ እሾተ ኪቴ፥ ‹‹እንፉረን! ማነ መለ፥ አንት ኦቶተ ፈየኤን እሽነ ቀፐይ፡፡ ድንሸምፐይተ፥ ፖቀለ ፔቴልሄም ደለዴይ!››

‹‹ኣነከ እኖሴን ፈደ፤ አኦሀተን መሬን ከ ሞነ ከረዬ ታማረ ከረ ሙክሼኔኤ አክተን፡፡›› ኤኖው ሞንተከ ኤርከምፐቶወን እመካቴ፤ እከ ዋቀ ከለተይሰዴን ከ ክዴኔ፥ ‹‹ሞንተኤ፥ ዋቀ አኡልፌሰሞ፥ ፒተኤ ኦረ አዋቀ እሾተ ጫለኖት ነከይተ አኮዶ!››

ስክመየከ ፖረ ዬሱስ እሽ ቾፐ ጨርጨርተን ኣኔን ከ አከ ኤርከምፐቶተ እሾነ ሌልቴ ቀረኤ እነ ሞነ ሆሬተ ከረዬ ታማረፐ ሙክሼኔ አኬን፡፡ ከ አከተ ኸሶዴን፡፡ ማርያም ኔፎከ አከተ ኸሶቴ፡፡ ስክመየከ ዋ ደከዬኔ ከ አኬኔ ፕሰ ዴሰ ዋቀ ከለተይሰተን ለከሴ አሆሬታይሾ እሽ ክቶፐ ቲተዌን፡፡

ክሴተ ለመይቴተ ከመዬ፥ ቶየምፐያሴኔ አህከ አፒተ ቅንደ ፒርቶቴዬ ከለ፥ ሞንተ ቁደኤ ህክተ ፕለይተ አኬን፡፡ እከ አከ ዴሎተ ኑቁሰ አይሁት ሃረየ አክኖ እሾተ ከልቴ፡፡ ሴመለ ኑቁሶሴ ቶየኤ ፖረ አከተ ሴካዬ ዴኤን፡፡ ከ ፔቴልሄም ከዬን፥ ከ ትከ ዬሱስ እሾ ቶለይሾ እሽ ቾ አኬን፡፡

ኦከሴኔ አቶየምፐየከ ኤቴ ዬሱስ ኣየሶ ኦልን አኬኔዬ፥ እክልፔፔን ከ እሽ ሰከተዴን፡፡ ከ ዬሱስ ዳሰወ ሄረን ኮኮኮከ ዳሼን፡፡ ከ ሴከመዬ ፒታይሾፐ ቲተዌን፡፡