2. ጩፖተ ፒተ ቀሮፐ ከሌ

አአታም እሾ እስከቴታድ ፖረሴ አድሽመደ አዋቀ እሾነ ኮዴ ከረ ከላኔዬ፥ አከተን ኸሶለየ። ለከንትይ ሉሌት ቻን፤ መ ኾር ሉሌት ቻተይሾ አከ ኦል ፎክሰደኔን ኮኔ፤ ማነ መለ፥ ጩፖተ ፒተ ቀረን ክቶይ፡፡ እሾነ ኔፎከ ድሽመደሴኔ አሉካተ ከረንዴሰ ፖረ ትትታውን ከ ዋቀ ኦል ቶረን፡፡

ማ ኾር እለተይተ ኔቀ አማከኤ ድሽሞሴ ከረ ቸ። ከ እስከቴተሴ ካሰዴ ከ ክዴ፥ ‹‹ሄለ ዋቀ ኬቶ ሉከተ ድሽመዶሴን አሬ ከረ ቸ ፕሰ አከ አደምን እሽነ ሌሌ?››

እስከቴተሴከ ኪቴ፣ ‹‹ዋቀ፥ ድሽመዶሴን አሉከተ ኦፐዬ ቆይረሴ አኡፕነ እሳሴ ዋ ፐቃረ ከ አኔቀ ኦልኬለ ኡፕነኖ መልይ፥ አከን ድሽመደ አሉከተ አአተ ሀሴ ፕሰ ደሞኤ እኖ ሌሌ፡፡ መ ኾር ኦቶን ቆይረሴ ዋ ፐቃረ ከ አኔቀ ኦልኬለ ኡፕነኖን ደመዬ ታክ ቁደ ኔፎ ከይናዬ፥ እቶተኔ እኖ ክዴ፡፡››

ማከከ እስከቴተሴት ኦርሼ ከ ክዴ፥ ‹‹ሴዴ ዱካተን፥ እሽነ አቶተን፤ ኦቶን ሉከቶሴ ደምተኔዬ፥ አክመ እልዳስን ፐነመን አከ ዋ ኔቀ ከ አፐቃረ ኡፕነተኔ አከ ዋቀ ፐሀነተን ቆተ ዋቀ ኡፖ መለ፥ እንደመን እሽነ ኪን፡፡››

እስከቴተሴ ኤቴ ሉከተ ቆይረሴ ደምተ ፐቃር፥ ከ እልተ ኬለ ነመ ኸሰንቶ ከ ኡፕነ አከተኤ ነመ ሰትንቶ ቶይቴዬ፥ ሉከተሴኤ ቄቴ ከ ደምቴ፡፡ ከ ዲርተሴ እሼተ ኦል ቾ ኩል ዳሴ፡፡ እሸከ ሉከተ ቆይረሴት ደሜ፡፡

ኤኖው እልዳሶ ለክከ ፐነሜን፡፡ ከ አክመ ሉሌት ቻን ኡፕናዴን፤ ከ ሃሸ አከ ኦሀተ ምነ ሄድሰዴን ከ እስቁደን ዴከ ኤከይሼን፡፡

አታም ከ እስከቴታድ፥ አከ ኔሰ ዋቀ ቆረሴኔ አድሽመደ ከረንዴሰ አአኖ ደከዬን ከ ፕሰን ዋቀ ቱረ ዴዴከዴን፡፡ ዋቀከ አታም ሀሌ ከ ክዴ ‹‹አይሸዬ ክተ?›› አታምከ ኦርሼ ከ ክዴ፥ ‹‹አከ ፖረሴ አድሽመ ከረንዴሰ አአንቶን ደከዬ፥ ከ ቆተን ሉሌት ቾ መለ ፉሬ ከ ዴከዴ፡፡››

ዋቀከ እሽ ክዴ፥ ‹‹አከ ሉሌ ክቶ አይኖ ኬ ሌሌ? ሄለ ቆይረሴ አንኬ አጨጬ ከ ክዴ፥ <እንደመኔ> ደምቴ?›› አታምከ ክዴ፥ ‹‹እስከቴተሴ አአት አከ አነ ኦል ከላቶ አነ ዳሴ፥ እሼነ ሉከተ ቆይሮሴት አነ ዳሼ አንከ ደሜ፡፡›› ዋቀከ እስከቴተሴ ካሰዴ ከ ክዴ፥ አተ ሴኔ ማነ ኮቴ?›› እስከቴተሴከ ኪቴ፥ ‹‹ማከ አነ ሰሰፐዴ አንከ ደሜ፡፡››

ዋቀከ ማከ ክዴ፥ ‹‹አጪጨሜ ኮድተ፤ ከ ከርተን ትትመተ፥ ከ ፒተ ሀይተ፤ ኬ እሾ እስከቴቶሴ ፓርከለ ኦል ኮድተን፤ ሄላት እሾ ሄላድከ አሴው ፓርከለ ኮደን፤ ሰኜተ እስከቴቶስት፥ መታይት ቱምተ፤ አትከ ከመንታድ ቆምተ፡፡››

ዋቀከ እስከቴተሴት ክዴ፥ ‹‹ኦቶ ኻይንቶዬ፥ ሱሩምታይትን ኮፕሸ፤ አከ ዲርታይት ቁዶፐው ዴሀተ ሄነተ፤ እሸከ ኬ ቀሮፔለ ቻደ፡፡››

ዋቀከ አታም ክዴ፥ ‹‹ዴሀምተ እስከቴታይትእ ደከይቴ ከ ቆይረ ሉከተሴ እንኬ አጨጬ ከ ክዴ፥ <እንደመን> ደምቴይ፥ ፒተ ኬ ምነኔ አጪጨምቶ፡፡ ሀከ ክቶዬ ፕሰ እያልተከ ኦፐዬ ደምተ ያለይት ቴይተ፡፡ ሴከመዬ እቶተ፤ አፒተይ ፒቶፖፐዌ ኦርተ፡፡›› አታምከ እስከቴታድ ቆተ ኣየ ኦረ ፕሰ ኮድቴ መለ፥ ‹‹ሄዋን›› ክዴ ከ ሀሌ፤ ሄዋን ክዴተ፥ ‹‹አቻተ ዳኖ ክዴተ።›› ዋቀከ ኮከ አፕነንተ ሀርምሼ ከ አታም እሾ ሄዋን ቁደ ከልሼ፡፡

ዋቀከ ክዴ፥ ‹‹አመ ነመ ዋ ፐቃረ ከ አኔቀ ኡፕናተኔ እኖፐ ተከ ኮዴ፤ አመ ኔፎ አከ ቆይረሴ ቻተ ዳኖ ቀረ ሉከተ እንምተንን ከ እንደምን ከ ሀከ ፐረፐራት እንከላንን።›› ከ ኦር አታም እሾ ሄዋን ፖረሴ አድሽመ ፐኻረ ከራዬ አሌ እሾተ ዳኔ፡፡ ከ ሴከመዬ፥ አከ ፖራሴ ቆይረ ቻተ ዳኖ ኦፐ አኖ ቶይተኔኤ፥ ነመ ተከ ኔፎከ ሉከተ ቆይሮሴ ቻተ ዳኖ እንምተንን ከ እንደምንእ ፖሮሴ አድሽመ ከረ ኤርከምፐቶወ ኮኮኮከ ኻዬ፡፡