15. ፒተሴ አክፔተ

ፕራምፕረ ቀረዬ፥ ክሴተ አእስራኤሌተ ፒተሴ አክፔተ አኬኔኣን ኦፖፐ ከልቶከ ከይቴ፡፡ እያሱከ ከተማሴኔ አኬኔኣን እያርኮ፥ አኦኽንተ ከወታትን ፈየ ከፐ ቆረሜ ኦፐ ሌትሰምፐየ ለክ ኤርኬ፡፡ ከተሞሴን ኦፐዬ፥ አልመልቴተ ተከ አእስከቴተ ሬአፕ ክደምቶ ከ ሌትሰምፐዮስን ጩቴ ከ አከ ኬለ ተወኔ ኮቴ፡፡ እሼተ ቆተ ዋቀ አመንቴ መለ ሴዴ ኮቴ፡፡ ሌትሰምፐየሴኔከ ኦቶ እስራኤሌተ እያርኮ ፐትንቶዬ፥ አክመ ሬአፕ እሾ ቶለይሾትን ፐሀኔኤ እሽ ኸኸዴን።

እስራኤሌተ ፒተሴ አክፔተ ኦፖፐ ከልተኤ፥ ክረ ዩርታኖስ ቱሌተ እሾተ ፐርፓችስን፡፡ ዋቀከ እያሱ ሌሌ ከ ክዴ፥ ‹‹ፓዮተኤ አከ ቄሴወ ቱለኔ ኮዴ፡፡›› ኤቴ ቄሴወ ክራ ዩርታኖስ ኦፖፐ ሌከተ ፓዬኔዬ፥ አከ እስራኤሌተ ፒተ ኮክቴ ኦፐን ቱለ ኤተንሶኤ፥ ፕሸሴኔ እልኸተ ዴነከ ኡርቀ ዲሼን፡፡

ኤቴ ሰመይተ ክራ ዩርታኖስ ቱሌ ከመዬ፥ ዋቀ አተ አከ ከተማሴኔ ኮኮከ አእያርኮ ቶርፐ እሸ ፐርፓችስኖ እያሱ ሌሌ፡፡ ሰመይተ ከሱከ ዋቀ አጨጨሜ፡፡ ኼለ አኦረነ እሾ ቄሴወከ አከ ዋቀ እሾነ ሌሌ ቀረኤ ሀከ ኩያተ ሌህእ ኩያቶፐ ተከ ተከን ከተመ እያርኮ ከፐ ቲተይሼን፡፡

ሴከመዬ ኩያተ ተፐታትይ፥ እስራኤሌተከ ተፐን ከተማሴኔ ከፐ ቲተውቴ፡፡ ኤቴ አፕረምፕራት ከተሞሴን ከፐ ቲተናኔዬ፥ ኼለ አኦረነ ከ ኡሉፔ፤ ቄሴወከ ካሰዳሶ ደዌን፡፡

ሴከመዬ፥ ኦኽንተሴ አከወተከ ቁደ ቅትቅቴ! እስረኤሌተከ አከ ዋቀ እሾነ አጨጬ ቀረኤ ወ ከተሞሴን ከረ ቸ ፕሰ ፕርቴ፡፡ ከ እሳሴኔ ከፈ እስረኤሌ ቁደ ኮዴ ሬአፕ እሾ ቶለይሾ ፐተን ፐሀቴ፡፡ ሰመይተ አፕለ አኬኔኣን ከረ ከሎ፥ ኤቴ አከ እስራኤሌተ እያርኮ ፐትሴ ደከዬዬ፥ እድከዴ ከ ክዴኔ፥ እስራኤሌተ እኖ ከሱ ቶርፐን ዲሶ ከ ፉሬ፡፡

ዋቀ አክመ እስረኤሌተ ሰመይተ ኬኔኣን ከረ ከሎ አይኖ ኔፎ ኦልይ ኮድቴ አከ ኡለተ ነከይተ እንኮደንን ቱረኔው እሾነ አጨጬ፡፡ መ ኾር ኦረ ሰመይተ ኬኔኣን ኦፐዬ ተከን ኬፐኦኔተ ክደመ፥ ደርተ ኮዴን ከ አክመ ፒተ ኬኔኣን ከፐ ፖረ ሴካዬ ዴኤን እያሱ ሌሌን። ከ አከ እያሱ እሾነ ኦልይ ኡለተ ነከይተ ኮደዶኤ እሸ ካሰዴን፡፡ እያሱ እሾ እስራኤሌተ ኬፐኦኔቶሴ አይሸዬ አክመ ዴቴ ዋቀ ቀረዬ እንካሰኔ፡፡ ከ ሴመለ እያሱከ እሾነ ኦልይ ኡለተ ነከይተ ኮደዴ፡፡

እስረኤሌተ አክመ ኬፐኦኔተ እሾተ ሰሰፐቴ ኤቴ ኡፕናቴዬ፥ እሚሮቴ፤ መ ኾር ቆተ ፉለ ዋቀ ቱረ ኦል ከሌን መለ፥ ኡለተሴ አነከይተ አእሾነ ኦል ኮደዴኔ ቶይቴን፡፡ አጨረምቴ ከመዬ ክሴተ ፕላትይ፥ መንክስቴወ ፒተ ኬኔኣን አፕለ ኦፐዬ አሞረተ፥ አክመ ኦረ ኬፐኦን እስራኤሌተ ኦል ኡለተ ነከይተ ኮደዴ ደከይቴ። ከ ሴመለ ኼላይሾ አኦረነ ኦሎፐ ኦርሼን ከ ኬፐኦኔተ ቶርፔን፡፡ ኬፐኦኔተከ ቃርቃርሰ ካሰተኤ እያሱ ከፖፐ ኦረ ኤርክቴ።

ሴመለ እያሱከ ኼለ አኦረነ አእስራኤል ኦሎፐ ኦርሼ ከ ኬፐኦኔተ ቀቀፕሰተኤ ሀልኬተ ኩመ አውሌን፡፡ ከ ፐራፐኔ አእስቀረን ኡፕንን መልይ፥ ኼለ አኦረነ አአሞረተ ቶርፔን።

ኩያሴትይ ዋቀከ እስራኤሌተ ቶርፔ፡፡ ከ አሞረተ ርርከይሼ፥ ከ ደከደ ኩኩተ አአፕቴንተ ኤርኬ ከ አሞረተ ኦፐዬ ኦረ ኩተይተ ሌይሼ፡፡

ዋቀከ አከ እስራኤሌተ ክሴተ አኦፐ አሌ አሞረተ ኬለዬ ፕርቶ ቴይቶኤ፥ አከ ፒርቶተ ሞንተ ቁደ ፖረ ተኮፐ ቀአቶ ኮዴ፡፡ ኩያሴትይ ዋቀከ ፑተይመ ኩተ እስራኤሌተ ዳሼ፡፡

ኤቴ ዋቀ ኼሎሴ አኦረነ ፑቴ ከመዬ፥ ሰመይተ ሰኜተ ኬኔኣኔተ ኮዴ ኩተይተከ እስራኤሌተ ቶርፐ ኦሎፐ ኾሬ፡፡ እያሱ እሾ እስራኤሌተ አአተ ሀሴከ እሾተ ቶርፔን ከ ፑቴን፡፡

ኦረኖሴን ከመዬ፥ ዋቀከ ፒተሴ አኸሰ ከረዬ መተ ምነኤ ቆቶተ ከፈ ከይንቶ እሾነ ዳሼ። ሴከመዬ ዋቀከ ኼለ እስራኤል ፕሰኤ ነከይተ ዳሼ፡፡

እያሱ ኤቴ ኬሬዬ፥ ሰመይተ አእስራኤል ፕሰ ኦሎፐ ሀሌ፡፡ ከ ሴከመዬ አከ ኮደይቴተሴ አዋቀ እሮተ ሲነ ቀረዬ እስረኤሌተ ኦል ኮደዴት አጨጨመኔኤ ከ ወ ሰመይተ ቀረ ፈደማት ዴሰ መቴ እሾነ ኦርሼ፡፡ ሰመይተከ አከ ዋቀኤ አአመነሜ ኮዶ ከ ከላዶኤ ከ ሴራድ ከመ ኣኖኤ ኸሰ ከሌ፡፡