12. አክመ እስራኤሌተ ክፕስ ከረ ሶክቴ

እስራኤሌተ ቆተ ክፕስ ከረ ሶክቴ መለ፥ አከተ ኸሶቴ፡፡ አሬፐዴሰ ከርፕሸደን፣ ፒተሴ አክፔተ ኦፐ ኔፎ አንተ ቀረ ቻን። ክፕሴተከ ወርቄተ ከ ደከረ ፕሬተ እሾ ዋ ሄረን ኮኮኮከ አእስረኤሌተ እሾነ ቀረ ካሰቴ ፕሰ እሾተ ዳሴ፤ ኤቴ ክፕስ ከረ ሶክናኔዬ፥ ሰኜወ ኦረ ፒተ ፕል ኮዴ ተከ ተከከ ዋቀ አመኔን ከ እስራኤሌተ ኦል ኣኔን፡፡

ዋቀከ ኩያቴዬ፥ ቱደ ዴረ አኦረርተ ከ ሀልኬቴዬ ቱደ ዴረ አአፒተ አእሾነ ቱረንዴሰ አኖን እሾነ መረኤ። ዋቀ አውተ ፕሰ እሾነ ኦል ቻዴ ከ ፖረይሾ ኦፐ እሾነ መረኤ፡፡ ዋ ኮደ እሾነ ፐርፓችስነ እሸ ከመ አንተ ፐተ፡፡

ክሴተ ሸከይቴተ ከመዬ፥ ፌርኦን እሾ ሰመይተከ ድከታይሾ ፑርሼን ከ አከ እስራኤሌተ አመ ከሱ ከርፕሸዳሶ ኮድቶ ፈዴን፡፡ ዋቀ አከ እሸ ፐተ ዋቀ ዱካተ ኮዴ ሰመይተ አከ አኮኤ፥ ከ አሴው እሸ አከ ዋቀ ቾ ከ ከላኖ (ያህዌ) ኮዴ፥ ከ ፌርኦን እሾ ክለነዳድ ቀሮፐ ሁፕነ አኩተ ቀፖ አከ ኡፕናደኔኤ ከርተ ፌርኦን ኮኮነይሼ፡፡

ሴመለ ፌርኦን እሾ ኼላድ አኦረነከ አመ ከሱ ከርፕሸደ እሾነ ኮደተኤ እስራኤሌተ ከመ አውሌን፡፡ እስራኤሌተ ኤቴ ኼለ አኦረነ አክፕስ አክቴዬ፥ አክመ አርተ ኼለ ፌርኦን አኦረነ እሾ አፐካቴተ ቲመ ከረ ቻኔ ኡፕናቴ። ከ ቆተ አከተ ፉሬን መለ ኡሉፔን ከ ክዴኔ፥ ‹‹ማነኤን ክፕስ ከረ ሶክኔ? ሀ እንፕረሜ!››

ሙሴከ እስራኤሌተ ሌሌ ከ ክዴ፥ ‹‹እንፉረን! አዌ ዋቀ እሽነ ቶርፐ ከ እሽን ድንሸ።›› ሴከመዬ ዋቀከ ሙሴ ክዴ፥ ‹‹አከ ፐከቴተ ቲመ ከሮፐ ኣነኔኤ ሰመይተ ሌሌ።›› ሴከመዬ ዋቀከ አከ ክፕሴተ እስራኤሌተ ኦልን አክንንእ ቱደሴ አኦራርተ ኦተንተ እስራኤሌተ እሾ አክፕሴተ ኦፐ ቃትሼ፡፡

ዋቀከ አከ ሙሴ ሀርካድ ፐከቴተ ቀሮፐ ዴረይሾ ከ ፕሸሴኔ ቆቶኤ እሽ ሌሌ፡፡ ሴከመዬ ዋቀከ አከ ፐከቴተ ከረንዴሰ ፖረ ኦፐን ተርፐን ቻዶኤ፥ አከ ኸይኸይተ ፕሸሴኔ ቅንደ አክተ ከ አፕትተ ኦፐ ቅሾ ኮዴ፡፡

እስራኤሌተከ ፕሸሴኔ ቅንደ አክተ እሾ አፕትታን ከወተ እሾነ ኮዴ፥ ፐከቴሴ ከረንዴሰ ፒተ ኮክቴ ኦፐን ተርፕቴ፡፡

ሴከመዬ ዋቀከ አክመ እስረኤሌተ እሾነ ኬለ ፐሀቴ አከ ክፕሴተ አክቶ ኮዳኤ፥ ኡራተሴ ፖሮፐ አሌ መይሼ። ክፕሴተከ እሾነ ከመ ዳነ ፒሰቴ፡፡

ከ ሴመለ ፐከቴሴ ከረንዴሰ እስረኤሌተ ከመ ኩልቴ፣ መ ኾር ዋቀ አከ ክፕሴተ ርሪከውቶ፥ ሰረኬላሶከ ቀቀፐመኔ ኮዴ። እከ ኡሉፔን ከ ክዴኔ፥ ‹‹ዋቀ እስራኤሌተ ቶርፕንይ፥ አሌ ቀሀነ!››

እስራኤሌተ ኤቴ ፐከቴሴ ከረን ነከይተን ቱልቴ ከመዬ፥ ዋቀ አከ ሙሴ ኦፐ ኦሮ ከ ሀርካድ ፐከቴሴ ቀሮፐ ዴረይሾኤ እሽ ሌሌ፡፡ ኤቴ እሸ ዋቀ አጨጨሜዬ፥ ፕሸሴኔከ ኼለ ኦረነ አክፕስ ቀሮፐ ኦሬን ከ እሳሴኔ አኸተ ምነ ኮዴን፡፡ ኼለ አኦረነ አክፕስ ፕሰከ ቀረ ፕረሜ፡፡

እስራኤሌተ ኤቴ አከ ክፕሴተ ሌቴ አክቴዬ፥ ዋቀ አመንቴ ከ አከ ሙሴ ኹመምፐይተ ዋቀ ኮዴ ከሱ አመንቴ፡፡

ከ አሴው ቆተ ዋቀ ቶተ ከ ከርፕሹመ ኬለ እሾነን ፐሄ መለ፥ ኸሰ ኩተከ እሾነ ደካዴ! አመ ኦር ዋቀ ኮደ ኮደኤ ነተ ሶኬን፡፡ እስራኤሌተከ ቆተ እሸ ኼለ አኦረነ አክፕስ ኬለ እሾነ ድንሼ መለ፥ አከ ነተ ሶኬን ኡልፌሰኤ ከ ዋቀ ከለተይሰተኤ፥ መስሙሬወ ሌከየ ደወዴን፡፡

አተ አከ ዋቀ ክፕሴተ ቀረኤ ፑተይመ እሾነ ዳሼ ከ ከርፕሹመ ኬለ እሾነን ፐሄ አከ መቴ ኦርሰደኔኤ፥ አፐረ ኦሮ ምነኤ አከ ፋስከ ኡልፌሰኔኤ እስረኤሌተ አጨጬ። እሾነከ ላሀ ቀጨን ቀፕንን ቀለዴን ከ ላቆተ አንፑኬሰምን ኦልን ደምተን ኸሶዴን፡፡