10. ዐሥሩ መቅሠፍቶች

ሙሴ እሾ አሮንከ ፌርኦን ከፖፐ ኣኔን፡፡ ከ እሽ ክዴኔ፥ ‹‹ዋቀ እስራኤል እኬ ኪን፥ ‹ሰመይትዮ ዲሼ!››› ፌርኦን ኾር እሾነኤን ደከይኔ፡፡ ከ ላድ አእስራኤሌተ ነተ ሶክቶ ከ አንቶ ከፐዬ፥ አከ ኮደ ኮኮከ አቀረን ቀፕቶ ኮቶ ክቴሴ።

ፌርኦንከ ሰመይተ አንዲሾ ክደ ከመው ቻዴ፣ ሴመለ ዋቀከ ክፕስ ቀሮፐ ኤርከናተ ኩደን ኤርኬ፡፡ ዋቀከ ኤርከነዎሴን ቁደኔ አክመ ፌርኦን እሾ ክለነደ አክፕስ ፕሰ ቀሮፐ ሁፕነ ቀፖ ፌርኦን አክሼ፡፡

ዋቀከ ፕሸ ክራ አፐይ ዲኮፐ ፑርሼ፣ መ ኾር ፌርኦን አመ ከሱ እስራኤሌተን ዲኔ፡፡

ዋቀከ ፒተ ክፕስ ፕሰ ቀሮፐ ሞኮወ ኤርኬ፡፡ ፌርኦንከ አከ ሙሴ ሞኮዎሴን አሌ ተውሾኤ እሸ ቅንሰዴ፡፡ ሞኮዋሴኔ ፕሰከ ሌኤን፡፡ ፌርኦን ኾር ከርታድ ኮኮነይሼ ከ አከ እስራኤሌተ ፒተ ክፕስ ከረ ሶክቶ እንዲንን፡፡

ሴመለ ዋቀከ ኩኜተ አኦረ ቆምቶ ኤርኬው፡፡ ከ ከመኤ ኻጨ አኦረ ቆሞ ኤርኬው፡፡ ፌርኦንከ ሙሴ እሾ አሮን ሀላችሴ ከ ኦቶን ኤርከናቶሴኤ ቃትንይ አክመ እስራኤሌተ ክፕስ ከረ ሶኬተ ኤተንሶ እሾተ ሌሌ፡፡ ኤቴ ሙሴ ቅንሰዴዬ፥ ዋቀከ ኻጨሴ ፕሰ ክፕስ ከረ አሌ መይሼ፡፡ መ ኾር ፌርኦን ከርታድ ኮኮነይሼ ዲሼይ ሰመይሴ አሌኤን ዲኔ፡፡

ከመዬ፥ ዋቀከ አከ ሆሬተ ክፕስ ፕሰ ፓቅቶ ከ ቶቶ ኮዴ፡፡ መ ኾር ፌርኦን ከርታድ ኮኮነይሼ ከ እስረኤሌተ አሌኤን ዲንን፡፡

ሴከመዬ ዋቀ፥ አከ ሙሴ ፉለ ፌርኦን ቱረ ተረ ሞንተንዴለ ፑሎ እሽ ሌሌ። ኤቴ ተረሴ ፑሌዬ፥ ክፕሴተ ቁደኤ ፈይክቴተ ሱረውንቶከ ሶክቴ፣ እስራኤሌተ ቁደኤ ኾር ፈይክቴሴ እንሶክኔ፡፡ ዋቀከ ከርተ ፌርኦን ኮኮነይሼ፤ ፌርኦንከ እስራኤሌተ እንዲንን፡፡

ሴከመዬ ዋቀከ ድሽመ ክፕስ ከረ ቾ ቁደ ከረ ኩተ ፐሼ፤ ከ አፕቴንተ ነመ ትኬዬ ለከ ቱለ ቾ ፕሰ ሌይሼ ኤርኬ፡፡ ፌርኦንከ ሙሴ እሾ አሮን ሀለችሴ ከ እሾነ ክዴ፥ ‹‹እን እሽን ደፔይ፥ ሶከ እኤተንሰን፡፡›› ሴመለ ሙሴከ ቅንሰዴ፣ አፕቴንተሴከ ሞንቴ ኸተ ሮፐ ቃትሴ፡፡

መ ኾር ፌርኦን አመ ኦፐ ኦሬው ከ ጩፖተ ኮዴ፤ ከ ከርታድ ኮኮነይሼ፡፡ ኡመ እስራኤሌተን ዲኔ፡፡

ሴመለ ዋቀከ ክፕስ ቀሮፐ ኼሎተ ቶረይተ ቄዴ፡፡ ቶረይቶሴከ ድሽመ አፕቴንተ ኬለ ሀሴ ፒሰ ደሜ፡፡

ሴከመዬ ዋቀከ ቱከንተ አሌተ ሴሰ ፕርቴ ኤርኬ፡፡ ሀከ ክፕሴተ ትካሶ ከረ ሶከ መላልቶኤ ቱከንሴ አከተ ነን ኪቴ፡፡ ቅንደ እስራኤሌተ እሽ ከልቶ ኾር ለአይተ ቸ፡፡

ኤርከነዎሴን ኩደን ከመዬ ኔፎ ፌርኦን እክእ እስራኤሌተን ዲኔ፡፡ ፌርኦን ቆተ ደከይንንክንን መለ፥ ዋቀ ኤርከናተ አፕራምፕረ ተከ ኤርከ ፒሰዴ፡፡ ሴዴ ከርተ ፌርኦን ፑርሰይ፡፡