22,भागो, युहना का जनम

सुटु भगवान डिजा आगासो भगियाकु टेन डो सुटु भगवान माँडि घगाल मिनकु टेन डिजा कोरकु खे घालखे । फिनी उफुन सड्डि सालो ओलेन टेन डिज चोला का बी डिकु खे हेबा माँडिखे डान । अचानक मिया आगासो भगिया भगवान कोना टेन जिखरियाह जिमु मेँटोन मिया साना याजक डो डिजा जपाये एलिजावेत मेरान मिया आवल माँडि टेन हेएन डान । डिकिँज भगवान खे हिगरा लज्जेन डान , फिनी डि बाइ चोज का बी कोनकु डाउ गा लायको हेबु डान ।

डि आगासो भगिया जिखरियाह खे मेनान " आमा जपाय खे मिया कोन डाउबा , आम डिज खे यहुना जिमु मेँटोन डोखे । डिज चोखा रावन टेन भरटिउबा , डो मसिह हेजे का कोरा खे तितीयार बा !”जिखरियहा मेनान कि , इँज डो इँया जपाय ठाए का सानाएन नाका चुफार टेन कोन डाउबा !इन्डि डाउबा मेँटोन इँज चुफार टेन हेडेए बा ?”

डि आगासो भगिया जिखरियाह खे जबाब जिले, “ इँज भगवान कोनटे आमा मेरान इनि आवल माँडि साये । चोजाकी आम इँया लियेन इमान हेबा ससा । बको जनम टाेएन तक आम चोज का बी माँडि का लायको हेबु ।”डि लाका जिखरियाह माँडि हेबा लज्जेन । डे बादोन आगासो भगिया डिज खे आवरा टेन ओलेन । डे बादोन जिखरियाह उरान इराएन डो डिजा जपाय खे लाज हेएन ।

मेटे एलिजाबेत तुरइ मेहनान का डान डि का आगासो भगिया एलिजाबेत कु गा कुटुम्बोकु खे टिपीखेमि, डिजा जिमु मरियम डान । डिज मिया कुवारि डान डो डिजा सगाइ मिया कोरो यिसुफ जिमु मेँटोन डिजा सेँगोन टाखा डान । डि आगासो भगिया मेनान" आम मिया कोन खे लाज टे सेगेजबा डो जनम जेबा आम डिज खे यीसु मेँटोन जिमु डोएबा । डिज सेबेटे खाड भगवान गा कोनटे डो जनम जनम का राज्जो डडा बा ।”

मरियम जबाब टेन मेनान,' इन्डि चुफार टेन डाउबा, चोजाकि इँज आय बी कुवारि का ?”डि आगासो भगिया मेनान "चोखा रावन अामेन हेजेबा डो भगवान गा सत्तो आम खे उगुरिबा , मेटे डि कोन टे चोखा आरुएबा , भगवान गा कोनटे ”मेटे मरियम इमान साले जो माँडि डि आगासो भगिया माँडिखेनेज डान।

तुरुतो का डि आगासो भगिया मरियम खे माँडि डायन बादोन , मरियम एलिजाबेत खे मिलाटिँजेन ओलेन । जेय्सा एलिजाबेत आजोम खे की मरियम गा आरि माँडि डि लाका एलिजाबेत गा कोनटे लाज तालान हुँजु लज्जेन । डि बाइकु मिया कठा जो भगवान डिकिँया खे डाके डान डि का बडाइ डाखे । मरियम एलिजाबेत मिलाटिँयेन आफिया मेहेना बादोन उरान इराएन डान ।

एलिजाबेत डिजा कोनटे के जनम डाएन बादोन , जिखरियहा डो एलिजाबेत डि कोन टे खे यहुना मेँटोन जिमु डोखेनेज । जेय्सा आगासो भागिया हुकुमो जिखे डान । मेटे भगवान एठा जिखरियहा खे माँडि घल्या हुकुम जिले डि लाका जिखरियहा माँडि लज्जेन ।"भगवान का बडाइ डाउ, चोजाकी डिज डिजा कोरकु खे यादोबा !आम इँया कोन , आम खाड सत्तो भगवान गा सुटु भगवान माँडि घगाल मिठाज मेँटोन हाकोबा , जे कि कोरकु खे डिकु गा आनुवा गुनुवा टेन माफो घाटाउ घल्या आवल माँडि घालेबा !”